અફઘાનિસ્તાનમાં વહેલી સવારે ભૂકંપના આંચકા અનુભવાયા. રિક્ટર સ્કેલ પર 5.1ની તીવ્રતા નોંધાઈ

Afghanistan Earthquake : ભારતના પાડોશી દેશ અફઘાનિસ્તાનમાં સોમવારે વહેલી સવારે ભૂકંપના આંચકાથી ધરતી ધ્રૂજી ઉઠી હતી. નેશનલ સેન્ટર ફોર સિસ્મોલોજી (National Center for Seismology) દ્વારા આપવામાં આવેલી માહિતી અનુસાર, ભૂકંપની તીવ્રતા રિક્ટર સ્કેલ (Richter Scale) પર 5.1 નોંધાઈ હતી. જોકે, અત્યાર સુધી આ કુદરતી આફતને કારણે કોઈ જાનહાનિ કે નુકસાન થયાના સમાચાર સામે આવ્યા નથી.
અફઘાનિસ્તાનમાં ભૂકંપની તીવ્રતા કેટલી નોંધાઈ?
નેશનલ સેન્ટર ફોર સિસ્મોલોજી (NCS)ના જણાવ્યા અનુસાર, 16 નવેમ્બર, સોમવારે વહેલી સવારે 3:07 વાગ્યે અફઘાનિસ્તાનમાં ભૂકંપ આવ્યો હતો. આ ભૂકંપની તીવ્રતા 5.1 નોંધાઈ હતી, જ્યારે તેનું કેન્દ્ર જમીનથી લગભગ 179 કિલોમીટર ઊંડે હતું. ભૂકંપના આંચકા બાદ હાલ કોઈ જાનમાલના નુકસાનની માહિતી સામે આવી નથી. જોકે, ભૂકંપની ઘટનાને પગલે ફરી એકવાર આ વિસ્તારમાં ભૂકંપીય પ્રવૃત્તિઓ અંગે ચર્ચા શરૂ થઈ છે.
સપ્ટેમ્બરમાં પણ અનુભવાયા હતા ભૂકંપના આંચકા
અફઘાનિસ્તાનમાં સપ્ટેમ્બર મહિનામાં પણ બે વખત ભૂકંપના આંચકા અનુભવાયા હતા. 7 સપ્ટેમ્બરના રોજ આવેલા ભૂકંપની તીવ્રતા 4.1 નોંધાઈ હતી. આ ભૂકંપ સવારે 5:36 વાગ્યે આવ્યો હતો અને તેનું કેન્દ્ર જમીનથી 130 કિલોમીટર ઊંડે હતું. ત્યારબાદ 9 સપ્ટેમ્બરના રોજ ફરી ભૂકંપ આવ્યો હતો, જેની તીવ્રતા રિક્ટર સ્કેલ પર 4.2 નોંધાઈ હતી.
આખરે ભૂકંપ શા માટે આવે છે?
ભૂકંપ (Earthquake) આવવાનું મુખ્ય કારણ પૃથ્વીની અંદર રહેલી ટેક્ટોનિક પ્લેટો (Tectonic Plates)ની હિલચાલ છે. આ પ્લેટો જ્યારે એકબીજા સાથે અથડાય છે, ઘસાય છે અથવા ખસે છે, ત્યારે જમીનની અંદર ઊર્જા એકઠી થાય છે. આ ઊર્જા અચાનક મુક્ત થતાં ધરતીમાં કંપન પેદા થાય છે, જેને આપણે ભૂકંપના આંચકા તરીકે અનુભવીએ છીએ. વિશ્વના અનેક વિસ્તારોમાં આવી ભૂકંપની ઘટનાઓ સતત નોંધાતી રહે છે.
આ પણ વાંચો : પીએમ મોદીની છઠ્ઠી મૈયાને ખાસ વિનંતી; કહ્યું, ‘દૃઢ સંકલ્પ અને આધ્યાત્મિક સાધનાનો અદ્ભુત સંગમ દેખાયો’












