એર ઈન્ડિયાની કામગીરીમાં ગંભીર બેદરકારીનો એક ચોંકાવનારો કિસ્સો સામે આવ્યો છે. ત્રણ ઈટાલિયન નાગરિકો અમૃતસરથી દિલ્હી પહોંચ્યા બાદ ફરજિયાત ઈમિગ્રેશન પ્રક્રિયા પૂર્ણ કર્યા વગર જ આંતરરાષ્ટ્રીય ફ્લાઈટમાં બેસીને જર્મનીના મ્યુનિક પહોંચી ગયા.

આ ઘટનાને લઈને સુરક્ષા એજન્સીઓ પણ ચોંકી ઉઠી છે. સમગ્ર મામલાની ગંભીરતાને જોતા કેન્દ્રીય ગૃહ મંત્રાલયે સંબંધિત વિભાગોના અધિકારીઓની મહત્વની બેઠક બોલાવી છે. નાગરિક ઉડ્ડયન મંત્રાલય દ્વારા આ મામલે એર ઈન્ડિયાને અગાઉ જ કારણદર્શક નોટિસ પણ પાઠવવામાં આવી છે.

4 સપ્ટેમ્બરે બની હતી ઘટના

આ ઘટના 4 સપ્ટેમ્બરની છે. ત્રણેય ઈટાલિયન નાગરિકો અમૃતસરથી એર ઈન્ડિયાની ફ્લાઈટ AI-1115 મારફતે દિલ્હી પહોંચ્યા હતા.

મળતી માહિતી મુજબ, તેઓ રાત્રે લગભગ 12:50 વાગ્યે દિલ્હી એરપોર્ટ પહોંચ્યા હતા. ત્યારબાદ માત્ર 55 મિનિટમાં એટલે કે લગભગ 1:45 વાગ્યે લુફ્થાન્સાની ફ્લાઈટ LH-763માં સવાર થઈને મ્યુનિક રવાના થઈ ગયા.

મુખ્ય વાત એ છે કે આ ત્રણેય મુસાફરોએ દિલ્હીમાં ફરજિયાત ઈમિગ્રેશન તપાસ કરાવી જ નહોતી.

અમૃતસર એરપોર્ટ પર જ થઈ મોટી ભૂલ?

સમગ્ર ઘટનાની પ્રાથમિક તપાસમાં એવું માનવામાં આવી રહ્યું છે કે ભૂલ અમૃતસર એરપોર્ટ પર જ થઈ હોઈ શકે છે.

મળતી માહિતી અનુસાર, ત્રણેય મુસાફરોને અમૃતસર એરપોર્ટ પર બે બોર્ડિંગ પાસ આપવામાં આવ્યા હતા. એક બોર્ડિંગ પાસ દિલ્હી જવા માટેનો હતો, જ્યારે બીજો મ્યુનિક જતી લુફ્થાન્સાની ફ્લાઈટ માટેનો હતો.

મુસાફરોએ દિલ્હી પહોંચ્યા બાદ ઈમિગ્રેશન પ્રક્રિયા પૂર્ણ કરવાની હતી. જોકે, તેમને સીધા ઈન્ટરનેશનલ ટ્રાન્સફર વિસ્તારમાં મોકલી દેવામાં આવ્યા હતા. પરિણામે તેઓ ઈમિગ્રેશન તપાસ વગર જ આંતરરાષ્ટ્રીય ફ્લાઈટમાં સવાર થઈ ગયા.

ગૃહ મંત્રાલયે બોલાવી મહત્વની બેઠક

આ ગંભીર બેદરકારી સામે આવ્યા બાદ હવે ગૃહ મંત્રાલયે સંબંધિત વિભાગોના અધિકારીઓની બેઠક બોલાવી છે. સૂત્રોના જણાવ્યા પ્રમાણે બેઠકની અધ્યક્ષતા ગૃહ સચિવ ગોવિંદ મોહન કરી શકે છે.

બેઠકમાં નાગરિક ઉડ્ડયન મંત્રાલયના સચિવ અને અધિક સચિવ, વિદેશીઓ સંબંધિત વિભાગના અધિકારી, બ્યુરો ઓફ ઈમિગ્રેશનના કમિશનર, એર ઈન્ડિયાના CEO તેમજ દિલ્હી એરપોર્ટના CEO સહિતના અધિકારીઓ હાજર રહેવાની શક્યતા છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

એર ઈન્ડિયાને કારણદર્શક નોટિસ

નાગરિક ઉડ્ડયન મંત્રાલયે આ મામલે 12 સપ્ટેમ્બરે એર ઈન્ડિયાને કારણદર્શક નોટિસ ફટકારી હતી. મંત્રાલયે સમગ્ર ઘટનાને ગંભીરતાથી લઈને જવાબ માંગ્યો છે.

હવે તપાસનો મુખ્ય મુદ્દો એ છે કે ત્રણ વિદેશી નાગરિકો જરૂરી ઈમિગ્રેશન તપાસ વિના દિલ્હીના એરપોર્ટ પરથી આંતરરાષ્ટ્રીય ફ્લાઈટ સુધી કેવી રીતે પહોંચી ગયા?

‘હબ-એન્ડ-સ્પોક મોડલ’ પણ ચર્ચામાં

અમૃતસર એરપોર્ટ એવા એરપોર્ટ્સમાં સામેલ છે જ્યાં સરકાર દ્વારા ‘હબ-એન્ડ-સ્પોક મોડલ’ લાગુ કરવામાં આવ્યું છે. આ વ્યવસ્થામાં મુસાફરો પહેલા નાના એરપોર્ટ એટલે કે ‘સ્પોક’ પરથી મોટા ‘હબ’ એરપોર્ટ પર પહોંચે છે. ત્યારબાદ હબ એરપોર્ટ પર જરૂરી ઈમિગ્રેશન પ્રક્રિયા પૂર્ણ કરીને આંતરરાષ્ટ્રીય ફ્લાઈટમાં સવાર થાય છે.

પરંતુ આ કેસમાં અમૃતસરથી દિલ્હી અને ત્યારબાદ મ્યુનિકની ફ્લાઈટ આ પ્રકારની હબ-એન્ડ-સ્પોક વ્યવસ્થા હેઠળ ન હોવાનું જણાવાયું છે. તેથી ત્રણેય મુસાફરો માટે દિલ્હીમાં ઈમિગ્રેશન પ્રક્રિયા પૂર્ણ કરવી ફરજિયાત હતી.

સૌથી મોટો સવાલ: તપાસ વગર વિદેશ કેવી રીતે પહોંચ્યા?

આ સમગ્ર ઘટનાએ એરપોર્ટની સુરક્ષા વ્યવસ્થા અને મુસાફરોની ઈમિગ્રેશન ચકાસણી અંગે ગંભીર સવાલો ઊભા કર્યા છે.

બોર્ડિંગ પાસથી લઈને ઈન્ટરનેશનલ ટ્રાન્સફર અને ઈમિગ્રેશન સુધી કયા સ્તરે બેદરકારી થઈ અને ત્રણેય વિદેશી નાગરિકો તપાસ વિના મ્યુનિક કેવી રીતે પહોંચી ગયા, તે હવે તપાસનો મુખ્ય વિષય બન્યો છે.

ગૃહ મંત્રાલયની બેઠક બાદ આ મામલે વધુ વિગતો અને જવાબદારી નક્કી થવાની શક્યતા છે.

આ પણ વાંચો: ગણપતિ બાપ્પાના દર્શને PM મોદી અને ઉપરાષ્ટ્રપતિ: પીયૂષ ગોયલના ઘરે કરી પૂજા, દેશની સુખ-સમૃદ્ધિ માટે પ્રાર્થના