મહારાષ્ટ્રમાં NEET-UG ની રી-એક્ઝામ આપનાર 18 વર્ષના વિદ્યાર્થીએ ટૂંકાવ્યો જીવ, કૂવામાં કૂદતા પહેલા બનાવ્યો ભાવુક વીડિયો

NEET UG Student: મહારાષ્ટ્રના હિંગોલી જિલ્લામાં NEET-UG રી-એક્ઝામ (ફરીથી લેવાયેલી પરીક્ષા) આપનારા ૧૮ વર્ષના એક વિદ્યાર્થીએ કથિત રીતે આત્મહત્યા કરી લીધી હોવાની આઘાતજનક ઘટના સામે આવી છે. પોલીસ હાલ આ મામલાની ગંભીરતાથી તપાસ કરી રહી છે અને એ જાણવાનો પ્રયાસ કરી રહી છે કે વિદ્યાર્થીના આ આત્યંતિક પગલાં પાછળ મેડિકલ પ્રવેશ પરીક્ષા (NEET) નું દબાણ જવાબદાર છે કે નહીં.

આત્મહત્યા પહેલા 33 સેકન્ડનો વીડિયો બનાવ્યો

અહેવાલ મુજબ, મૃતક વિદ્યાર્થીની ઓળખ સુશીલ ઢાગે તરીકે થઈ છે, જે હિંગોલી શહેરના અષ્ટવિનાયક નગર વિસ્તારનો રહેવાસી હતો. પોલીસના જણાવ્યા અનુસાર, બુધવારે સવારે આશરે ૧૦:૩૦ વાગ્યે સુશીલે એક કૂવામાં કૂદીને પોતાનો જીવ આપી દીધો હતો. આત્મહત્યા કરતા પહેલા તેણે પોતાના મોબાઈલ ફોનમાં 33 સેકન્ડનો એક વીડિયો રેકોર્ડ કર્યો હતો, જેમાં તેણે પોતાની માતાની માફી માંગી હતી અને પરિવાર પ્રત્યે પોતાની લાગણી વ્યક્ત કરી હતી.

વીડિયોમાં વિદ્યાર્થીના અંતિમ શબ્દો

પોલીસ અધિકારીના જણાવ્યા મુજબ, સુશીલે વિડીયો રેકોર્ડિંગમાં ખૂબ જ ભાવુક થઈને પોતાની માતાને સંબોધતા સંદેશ આપ્યો હતો. સુશીલે વીડિયોમાં કહ્યું કે, ‘હું આત્મહત્યા કરવા જઈ રહ્યો છું. માં, તમે ચિંતા ન કરતા. આવતા જન્મમાં પણ હું તમારો જ દીકરો બનવા માંગું છું. સુમેધની સાથે રહેજો. મને માફ કરી દેજો.’

પરીક્ષાનું પેપર અઘરું લાગતા તણાવમાં હતો વિદ્યાર્થી

પરિવારજનોએ પોલીસ પૂછપરછમાં જણાવ્યું કે, સુશીલે તાજેતરમાં જ આયોજિત થયેલી NEET-UG ની રી-એક્ઝામ આપી હતી. પરીક્ષા આપીને આવ્યા બાદ તેણે જણાવ્યું હતું કે પેપર ઘણું અઘરું હતું. પરિવારનો દાવો છે કે તે પરીક્ષાના ખરાબ પ્રદર્શન અને પરિણામને લઈને ભારે માનસિક તણાવ (સ્ટ્રેસ) માં સરી પડ્યો હતો અને તેના કારણે જ તેણે આ પગલું ભર્યું હોઈ શકે છે.

હાલમાં પોલીસે અકસ્માત મોત (ADR) નો ગુનો નોંધીને કાયદેસરની તપાસ હાથ ધરી છે. હિંગોલી સિટી પોલીસ સ્ટેશનના એક અધિકારીએ જણાવ્યું કે પરિવાર તરફથી મળેલી ફરિયાદમાં NEET ની રી-એક્ઝામનો સ્પષ્ટ ઉલ્લેખ કરવામાં આવ્યો છે. આથી, પરીક્ષાના તણાવ અને વિદ્યાર્થીના મોત વચ્ચે કોઈ સીધો સંબંધ છે કે નહીં તે દિશામાં પોલીસ ઝીણવટભરી તપાસ કરી રહી છે.

શા માટે યોજાઈ હતી NEET રી-એક્ઝામ?

નોંધનીય છે કે, દેશભરમાં ભારે હોબાળો મચાવનારા પ્રશ્નપત્ર લીક (Paper Leak) વિવાદ અને ગેરરીતિઓની તપાસના કારણે રાષ્ટ્રીય પરીક્ષા એજન્સી (NTA) દ્વારા ૩ મેના રોજ લેવાયેલી મૂળ NEET-UG પરીક્ષાને રદ કરવામાં આવી હતી. ત્યારબાદ ૨૧ જૂનના રોજ આ પરીક્ષા ફરીથી (Re-exam) યોજવામાં આવી હતી, જેમાં દેશભરના લાખો વિદ્યાર્થીઓએ ફરીથી ભાગ લીધો હતો.

આ પણ વાંચોઃ મોરબીના જેતપરમાં ખેડૂતોનું આમરણાંત ઉપવાસ આંદોલન, વીજપોલ અને વળતરના મુદ્દે ઉગ્ર વિરોધ

આ પણ વાંચોઃ બાંકે બિહારી મંદિરમાં આરતી સમયે નથી વગાડાતો ઘંટ, જાણો આ પરંપરાનું રહસ્ય

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X