IPL 2026 માં કોણ બનશે ઓરેન્જ અને પર્પલ કેપના કિંગ? લીગ રાઉન્ડના અંતિમ તબક્કામાં રેસ બની ભારે રોમાંચક
IPL 2026: IPL 2026 ના લીગ રાઉન્ડમાં 62 મેચો રમાઈ ચૂકી છે અને હવે માત્ર 12 મેચો બાકી છે. આ ટૂર્નામેન્ટ હવે પ્લેઓફની ટીમો નક્કી કરવાના આખરી તબક્કામાં છે, તેની સાથે જ ઓરેન્જ કેપ (સૌથી વધુ રન) અને પર્પલ કેપ (સૌથી વધુ વિકેટ) મેળવવાની જંગ પણ અત્યંત રસપ્રદ બની ગઈ છે. આ સીઝનની સૌથી ખાસ વાત એ છે કે એક તરફ વિરાટ કોહલી અને ભુવનેશ્વર કુમાર જેવા અનુભવી યોદ્ધાઓ પોતાનો દબદબો બતાવી રહ્યા છે, તો બીજી તરફ સાઈ સુદર્શન, વૈભવ સૂર્યવંશી અને અંશુલ કંબોજ જેવા યુવા ભારતીય ચહેરાઓ પોતાની વિસ્ફોટક રમતથી આખી લીગની વાર્તા બદલી રહ્યા છે.
ઓરેન્જ કેપ: સાઈ સુદર્શન અને શુભમન ગીલ વચ્ચે માત્ર ૨ રનનો તફાવત
ગુજરાત ટાઇટન્સના ઓપનરોએ આ સીઝનમાં ધમાકો મચાવ્યો છે:
1. સાઈ સુદર્શન (554 રન): ગત સીઝનનો ઓરેન્જ કેપ વિનર સાઈ સુદર્શન આ વર્ષે પણ 554 રન સાથે રેસમાં સૌથી આગળ છે. તેની ક્લાસિક અને આક્રમક બેટિંગે તેને ટૂર્નામેન્ટનો સૌથી ભરોસાપાત્ર બેટ્સમેન બનાવ્યો છે.
2. શુભમન ગીલ (552 રન): સાઈ સુદર્શનના બરાબર પાછળ ગુજરાતનો કેપ્ટન શુભમન ગીલ માત્ર 2 રનના તફાવત સાથે બીજા ક્રમે છે. આ ઓપનિંગ જોડીએ નવી ગેંગથી વિરોધી ટીમો પર સતત દબાણ બનાવ્યું છે.
ટોપ પોઝિશનની રેસમાં ‘ચેઝ માસ્ટર’ વિરાટ કોહલી
આરસીબીના સ્ટાર બેટ્સમેન વિરાટ કોહલી 542 રન સાથે ત્રીજા સ્થાને છે અને નંબર-1 ના સ્થાનથી માત્ર 12 રન જ દૂર છે. વિરાટ આ સીઝનમાં 54.20 ની શાનદાર એવરેજથી રન બનાવી રહ્યો છે, જે 500થી વધુ રન બનાવનારા તમામ બેટ્સમેનોમાં સૌથી શ્રેષ્ઠ છે. આ ટૂર્નામેન્ટ દરમિયાન વિરાટે એમ.એસ. ધોનીના 278 આઈપીએલ મેચ રમવાના રેકોર્ડને તોડીને ઇતિહાસમાં સૌથી વધુ આઈપીએલ મેચ રમવાનો અનોખો રેકોર્ડ પણ પોતાના નામે કરી લીધો છે.
આ સિવાય દિલ્હી માટે રમી રહેલા કે.એલ. રાહુલે 533 રન અને સનરાઇઝર્સ હૈદરાબાદના હેનરિક ક્લાસેને 508 રન બનાવીને પોતાની તાકાત બતાવી છે. જ્યારે 15 વર્ષના યુવા બેટ્સમેન વૈભવ સૂર્યવંશીએ 237 ના સ્ટ્રાઈક રેટથી 486 રન અને 43 છગ્ગા ફટકારીને આખી દુનિયાનું ધ્યાન ખેંચ્યું છે.
પર્પલ કેપ: સ્વિંગના જાદુગર ભુવનેશ્વર કુમાર ટોપ પર
બોલિંગની વાત કરીએ તો અનુભવી તેજ બોલર ભુવનેશ્વર કુમાર (Bhuvneshwar Kumar) 24 વિકેટ ઝડપીને પર્પલ કેપની રેસમાં સૌથી આગળ છે. પાવરપ્લેમાં સ્વીંગ અને ડેથ ઓવર્સમાં યોર્કર ફેંકવાની તેની કળા હજુ પણ અદભુત છે. ટૂર્નામેન્ટમાં 23 રન આપીને 4 વિકેટ એ તેનું સર્વશ્રેષ્ઠ પ્રદર્શન રહ્યું છે.
રબાડા અને યુવા અંશુલ કંબોજ તરફથી ટક્કર
* કગિસો રબાડા (21 વિકેટ): દક્ષિણ આફ્રિકાનો આ સ્પીડ સ્ટાર પોતાની ઝડપ અને બાઉન્સરના જોરે બીજા ક્રમે છે.
* અંશુલ કંબોજ (19 વિકેટ): ચેન્નાઈ સુપર કિંગ્સનો આ યુવા ભારતીય બોલર આ સીઝનની સૌથી મોટી શોધ સાબિત થયો છે, જેણે પોતાની લાઈન-લેન્થથી પ્રભાવિત કર્યા છે.
* આ સિવાય જોફ્રા આર્ચર (17 વિકેટ), પંજાબના પ્રિન્સ યાદવ (16 વિકેટ) અને રાશિદ ખાન (16 વિકેટ) પણ રેસમાં યથાવત છે.
આ પણ વાંચોઃ રાજ્યમાં IAS અધિકારીઓની નવી નિમણૂક અને બદલીથી વહીવટી માળખામાં ફેરફાર, જુઓ સંપૂણ યાદી
આ પણ વાંચોઃ ભારતીય વિદ્યાર્થીઓની લાગી લોટરી ! આ દેશમાં ફ્રી શિક્ષણ સાથે લાખો રૂપિયા કમાવાની તક
અમારી WhatsApp ચેનલમાં જોડાવા આ લિંક પર ક્લીક કરો
