migrant-boat-tragedy:     પૂર્વ આફ્રિકાના જિબૂતીના દરિયાકાંઠે પ્રવાસીઓને લઈ જતી હોડી પલટી જતાં મોટી દુર્ઘટના સર્જાઈ છે. આંતરરાષ્ટ્રીય સ્થળાંતર સંગઠન (International Organization for Migration – IOM)ના જણાવ્યા મુજબ, આ અકસ્માતમાં ઓછામાં ઓછા 109 લોકોનાં મોત થયાં છે. મૃતકોમાં 15 બાળકોનો પણ સમાવેશ થાય છે. હોડીમાં કુલ 305 પ્રવાસીઓ સવાર હતા. દુર્ઘટના બાદ 80થી વધુ લોકોને બચાવી લેવામાં આવ્યા છે, જ્યારે 116 લોકો હજુ પણ લાપતા છે.

IOMના અહેવાલ અનુસાર, આ હોડી જિબૂતીથી યમન તરફ જઈ રહી હતી. ગુરુવારની રાત્રે અથવા શુક્રવારની વહેલી સવારે હોડી દરિયામાં પલટી ગઈ હતી. મૃતકોમાં 52 પુરુષો, 42 મહિલાઓ અને 15 બાળકોનો સમાવેશ થાય છે. અકસ્માત બાદ બચાવ કામગીરી હાથ ધરવામાં આવી હતી, પરંતુ હજુ પણ અનેક લોકોનો કોઈ પત્તો મળ્યો નથી.

At least 109 migrants, including 15 children, have died and over 116 remain missing after a boat capsized off #Djibouti.

IOM is assisting survivors as search and rescue operations continue.
https://t.co/zLxda3CM1c

— IOM – UN Migration 🇺🇳 (@UNmigration) October 11, 2026

રોજગારની શોધમાં જોખમી દરિયાઈ મુસાફરી

આફ્રિકાના હોર્ન ઑફ આફ્રિકા (Horn of Africa) વિસ્તારમાંથી દર વર્ષે હજારો લોકો સારી રોજગારી અને જીવનની વધુ સારી તકોની શોધમાં સ્થળાંતર કરે છે. આ પ્રવાસીઓ જિબૂતી થઈને બાબ અલ-મંદેબની સામુદ્રધુની (Bab-el-Mandeb Strait) પાર કરી યમન અને ત્યારબાદ ખાડી દેશો તરફ જવાનો પ્રયાસ કરે છે.

યમનમાં હિંસા અને અસ્થિરતા હોવા છતાં આ માર્ગે લોકોની અવરજવર ચાલુ છે. આર્થિક મુશ્કેલીઓમાંથી બહાર નીકળવા અને પરિવારને વધુ સારું જીવન આપવા માટે ઘણા લોકો જોખમી દરિયાઈ માર્ગ પસંદ કરે છે. આ દુર્ઘટનાએ ફરી એકવાર આવા પ્રવાસીઓની સુરક્ષા અંગે ચિંતા વધારી છે.

IOMએ દુર્ઘટના અંગે વ્યક્ત કર્યું દુઃખ

જિબૂતીમાં IOMના મિશન પ્રમુખ એલેક્ઝાન્ડર કોયસેકે આ ઘટનાને જાનમાલનું મોટું નુકસાન ગણાવ્યું હતું. તેમના જણાવ્યા અનુસાર, આ દુર્ઘટના એ વાતની ગંભીર યાદ અપાવે છે કે રોજગાર અને આર્થિક તકોની શોધમાં સ્થળાંતર કરનારાઓને આ માર્ગ પર કેટલાં જોખમોનો સામનો કરવો પડે છે.

બચી ગયેલા લોકોને તબીબી સારવાર અપાઈ રહી છે

અકસ્માત બાદ સ્થાનિક વહીવટીતંત્ર અને IOMની ટીમો બચી ગયેલા લોકોને તબીબી સહાય પૂરી પાડવામાં તથા રાહત અને બચાવ કામગીરીમાં લાગી છે. બીજી તરફ, લાપતા થયેલા લોકોને શોધવાના પ્રયાસો પણ ચાલુ છે. સારી આજીવિકાની આશા સાથે નીકળેલા પ્રવાસીઓ માટે આ સફર જીવલેણ બની છે. 109 લોકોનાં મોત અને 116 લોકો લાપતા હોવાની આ ઘટના જોખમી સ્થળાંતર માર્ગો પર માનવજીવનની સુરક્ષા સુનિશ્ચિત કરવાની જરૂરિયાતને ફરી ઉજાગર કરે છે.

આ પણ વાંચો : ઓક્ટોબરમાં IPOનો ધમધમાટ, જિયો પ્લેટફોર્મ્સ સહિત 12 કંપનીઓ બજારમાં ઉતરવાની તૈયારીમાં