ચોમાસું પુરૂ થયું નથીઃ દેશ ઉપર 5 ચક્રવાતી સિસ્ટમ સક્રિય, અનેક રાજ્યોમાં ભારે વરસાદનો ખતરો
Weather Update: દેશના ઉત્તર-પશ્ચિમ ભાગોમાં દક્ષિણ-પશ્ચિમ ચોમાસાની વિદાય આગળ વધી રહી છે, છતાં વરસાદનો દોર સંપૂર્ણ રીતે અટકવાનો નથી. દેશના અલગ-અલગ ભાગોમાં એકસાથે અનેક હવામાન સિસ્ટમ સક્રિય છે, જેમાં પાંચ ચક્રવાતી પરિભ્રમણનો સમાવેશ થાય છે. તેના કારણે ઉત્તર-પૂર્વ, દક્ષિણ ભારત અને કેટલાક મધ્ય તથા પશ્ચિમ રાજ્યોમાં વરસાદ, ગાજવીજ અને તેજ પવનની શક્યતા છે.
IMDની સત્તાવાર વોર્નિંગ મુજબ 29 અને 30 સપ્ટેમ્બરે નાગાલેન્ડ, મણિપુર, મિઝોરમ અને ત્રિપુરાના વિસ્તારોમાં ભારે વરસાદ તેમજ ગાજવીજની ચેતવણી છે. તમિલનાડુ-પુડુચેરીમાં પણ 29 સપ્ટેમ્બરથી 1 ઓક્ટોબર સુધી ભારે વરસાદ અને ગાજવીજની શક્યતા દર્શાવવામાં આવી છે.
એકસાથે અનેક સિસ્ટમ સક્રિય
હવામાનની હાલની સ્થિતિ પાછળ દેશ અને આસપાસના વિસ્તારોમાં બનેલી અનેક ચક્રવાતી પરિસ્થિતિઓ જવાબદાર છે. મ્યાનમારના દરિયાકાંઠા તથા નજીકના બંગાળની ખાડી વિસ્તારમાં બનેલી ડીપ ડિપ્રેશન સિસ્ટમ ઉત્તર-ઉત્તર પશ્ચિમ તરફ આગળ વધી હતી. IMD અનુસાર આ સિસ્ટમ મ્યાનમારના કાંઠા તરફ આગળ વધ્યા બાદ નબળી પડવાની પ્રક્રિયામાં હતી. આ ઉપરાંત પૂર્વ ઉત્તર પ્રદેશ, ઉત્તર-પૂર્વ આસામ, બંગાળની ખાડી, પૂર્વ-મધ્ય અરબી સમુદ્ર અને તમિલનાડુ-આંધ્ર પ્રદેશ આસપાસના વિસ્તારમાં અલગ-અલગ ચક્રવાતી પરિભ્રમણની સ્થિતિ વરસાદી માહોલને ટેકો આપી રહી છે.
ઉત્તર-પૂર્વ ભારતમાં ભારે વરસાદનો ખતરો
નાગાલેન્ડ, મણિપુર, મિઝોરમ અને ત્રિપુરામાં 29 અને 30 સપ્ટેમ્બરે ભારે વરસાદ સાથે ગાજવીજ અને ઝંઝાવાતની ચેતવણી આપવામાં આવી છે. IMDનું વર્તમાન સબ-ડિવિઝન વોર્નિંગ પણ આ વિસ્તારો માટે હેવી રેઈન તથા વાવાઝોડું અને વીજળીની શક્યતાઓ દર્શાવે છે. આસામ અને મેઘાલયના કેટલાક વિસ્તારોમાં પણ વરસાદી પ્રવૃત્તિ ચાલુ રહેવાની શક્યતા છે.
દક્ષિણ ભારતમાં આગામી દિવસો મહત્ત્વના
તમિલનાડુ અને પુડુચેરી માટે IMDએ 29 સપ્ટેમ્બર, 30 સપ્ટેમ્બર અને 1 ઓક્ટોબર સુધી ભારે વરસાદની ચેતવણી આપી છે. કેટલાક વિસ્તારોમાં વીજળીના કડાકા અને તેજ પવન સાથે વરસાદ પડી શકે છે. કેરળ, રાયલસીમા, તટીય આંધ્ર પ્રદેશ અને કર્ણાટકમાં પણ આગામી કેટલાક દિવસ દરમિયાન વરસાદી માહોલ રહેવાની શક્યતા છે. કેટલાક વિસ્તારોમાં પવનની ઝડપ 50થી 60 કિમી પ્રતિ કલાક સુધી પહોંચી શકે છે.
ઉત્તર અને મધ્ય ભારતમાં ક્યાં વરસાદ?
29 સપ્ટેમ્બરથી 2 ઑક્ટોબર દરમિયાન જમ્મુ-કાશ્મીર, હિમાચલ પ્રદેશ, ઉત્તરાખંડ, પૂર્વી રાજસ્થાન અને ઉત્તર પ્રદેશના કેટલાક વિસ્તારોમાં હળવો અથવા છૂટોછવાયો વરસાદ થઈ શકે છે. મધ્ય પ્રદેશ, વિદર્ભ અને છત્તીસગઢમાં પણ ગાજવીજ સાથે હળવા વરસાદની શક્યતા છે.
ગુજરાતમાં ભારે વરસાદનું અલર્ટ નથી
ગુજરાત માટે હાલનો IMDનો સબ-ડિવિઝન વોર્નિંગ મહત્વનો છે. 29 સપ્ટેમ્બરથી 4 ઓક્ટોબર દરમિયાન ગુજરાત તેમજ સૌરાષ્ટ્ર અને કચ્છ માટે કોઈ ભારે વરસાદ અથવા ગાજવીજની સત્તાવાર વોર્નિંગ દર્શાવવામાં આવી નથી. એટલે રાજ્યમાં ક્યાંક છૂટાછવાયા હળવા વરસાદની શક્યતા ભલે રહે, પરંતુ હાલ વ્યાપક ભારે વરસાદની ચેતવણી નથી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
આ રાજ્યોમાં વરસાદ ચાલુ રહી શકે
29 સપ્ટેમ્બરથી આગામી દિવસોમાં અંડમાન-નિકોબાર, પશ્ચિમ બંગાળ, ઓડિશા, ઝારખંડ અને બિહારના કેટલાક વિસ્તારોમાં પણ હળવાથી મધ્યમ વરસાદ થવાની શક્યતા છે. અંડમાન-નિકોબાર માટે IMDએ ગાજવીજ અને ઝંઝાવાતની ચેતવણી દર્શાવી છે.
દિલ્હી-NCRમાં વરસાદથી રાહત
દિલ્હી અને આસપાસના વિસ્તારોમાં હવે હવામાન ધીમે ધીમે સૂકું બનવાની શક્યતા છે. 30 સપ્ટેમ્બરથી 2 ઓક્ટોબર સુધી મોટાભાગે આકાશ સ્વચ્છ રહેવાની સંભાવના છે. IMDના વર્તમાન વોર્નિંગમાં દિલ્હી-હરિયાણા-ચંદીગઢ માટે પણ કોઈ ખાસ હવામાન ચેતવણી નથી. એક તરફ ઉત્તર-પશ્ચિમ ભારતમાંથી ચોમાસાની વિદાય થઈ રહી છે, તો બીજી તરફ બંગાળની ખાડી, અરબી સમુદ્ર અને દક્ષિણ ભારત આસપાસની સિસ્ટમોને કારણે દેશના અનેક ભાગોમાં વરસાદ હજી થોડા દિવસ ચાલુ રહી શકે છે.
