Kamrej Accident: સુરત જિલ્લામાંથી પસાર થતા ભારતમાલા એક્સપ્રેસ-વે પર કામરેજ નજીક ભયાનક માર્ગ અકસ્માત સર્જાયો છે. ડીગસ ગામની સીમમાં ટેક્નિકલ ખામીના કારણે ઊભેલા ડમ્પર પાછળ પૂરઝડપે આવી રહેલી હેરિયર કાર ધડાકાભેર ઘૂસી જતાં કારમાં સવાર ચાર લોકોનાં ઘટનાસ્થળે જ કરુણ મોત નીપજ્યાં હતાં. અકસ્માત એટલો ગંભીર હતો કે કારનો આગળનો ભાગ સંપૂર્ણ રીતે કચ્ચરઘાણ થઈ ગયો હતો.

મુંબઈથી શંખેશ્વર દર્શન માટે જઈ રહ્યો હતો પરિવાર

પ્રાથમિક માહિતી અનુસાર હેરિયર કારમાં સવાર લોકો મુંબઈથી ગુજરાત તરફ આવી રહ્યા હતા અને શંખેશ્વર મંદિરે દર્શન માટે જવાનું હોવાનું જાણવા મળ્યું છે. કાર મુંબઈથી અમદાવાદ તરફ જતા માર્ગ પર કામરેજ પોલીસ સ્ટેશનની હદમાં આવેલા ડીગસ ગામ નજીક પહોંચી ત્યારે આ દુર્ઘટના સર્જાઈ હતી.

અકસ્મતમાં કારમાં સવાર ચારેય લોકોનાં ઘટનાસ્થળે જ મોત થતાં સમગ્ર વિસ્તારમાં શોકની લાગણી પ્રસરી ગઈ હતી.

ટેક્નિકલ ખામીના કારણે ડમ્પર રસ્તા પર રોકાયું

મળતી માહિતી મુજબ ડમ્પરમાં અચાનક એર પ્રેશર સંબંધિત ટેક્નિકલ ખામી સર્જાઈ હતી. જેના કારણે ડમ્પર ધીમું પડી ગયું હતું અને ચાલકે વાહન રોકીને ખામી તપાસવાનું શરૂ કર્યું હતું.

આ દરમિયાન પાછળથી ઝડપે આવી રહેલી હેરિયર કાર ડમ્પરના પાછળના ભાગ સાથે જોરદાર રીતે અથડાઈ હતી. ટક્કરની તીવ્રતા એટલી વધુ હતી કે હેરિયર કારનો આગળનો ભાગ ગંભીર રીતે ક્ષતિગ્રસ્ત થયો હતો.

ચાર લોકોના ઘટનાસ્થળે જ મોત

અકસ્મતમાં કારમાં સવાર ચાર લોકોને ગંભીર ઈજાઓ થતાં તેમના ઘટનાસ્થળે જ મોત નીપજ્યાં હતાં. દુર્ઘટનાની જાણ થતાં આસપાસના લોકો અને અન્ય વાહનચાલકો સ્થળ પર પહોંચ્યા હતા.

ઘટનાની જાણ થતાં જ કામરેજ પોલીસનો કાફલો તાત્કાલિક ઘટનાસ્થળે દોડી આવ્યો હતો. પોલીસે ચારેય મૃતદેહોને બહાર કાઢીને પોસ્ટમોર્ટમ માટે કામરેજ સામૂહિક આરોગ્ય કેન્દ્ર ખાતે મોકલવાની કાર્યવાહી હાથ ધરી હતી.

એક્સપ્રેસ-વે પર વાહનવ્યવહાર પ્રભાવિત

અકસ્મતમાં બંને વાહનો રોડ પર અટવાઈ જતાં ભારતમાલા એક્સપ્રેસ-વે પર થોડા સમય માટે વાહનવ્યવહારને અસર પહોંચી હતી. પોલીસે અકસ્માતગ્રસ્ત વાહનોને ખસેડવાની કામગીરી કરીને વાહનવ્યવહાર ફરી પૂર્વવત કરાવ્યો હતો.

પોલીસે અકસ્માત કઈ રીતે સર્જાયો, કારની ઝડપ કેટલી હતી, ડમ્પર યોગ્ય સુરક્ષા સાથે રોકવામાં આવ્યું હતું કે નહીં અને અન્ય કોઈ કારણ જવાબદાર હતું કે કેમ તે સહિતના મુદ્દાઓને ધ્યાનમાં રાખીને વધુ તપાસ શરૂ કરી છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ભારતમાલા એક્સપ્રેસ-વે પર સુરક્ષાને લઈને ફરી સવાલ

આ દુર્ઘટનાએ ફરી એકવાર એક્સપ્રેસ-વે પર ઊભાં રહેતા ભારે વાહનો અને હાઈસ્પીડ ટ્રાફિકની સુરક્ષા અંગે સવાલો ઊભા કર્યા છે. ખાસ કરીને ટેક્નિકલ ખામીના કારણે વાહન રોકાય ત્યારે પૂરતું ચેતવણી સૂચન, રિફ્લેક્ટર કે અન્ય સુરક્ષા વ્યવસ્થા કરવામાં આવી હતી કે નહીં તે પણ તપાસનો વિષય બની શકે છે.

ચાર લોકોનાં એકસાથે મોતને પગલે મૃતકોના પરિવારમાં શોકનો માહોલ છવાયો છે. કામરેજ પોલીસે સમગ્ર મામલે આગળની કાયદેસરની કાર્યવાહી હાથ ધરી છે.

આ પણ વાંચો: ડાબર-પતંજલિના નામે ‘નકલી’ ગુલાબજળનો ધંધો? સુપૌલમાં હજારો બોટલો સાથે એક ઝડપાયો