Dia Mirza Pollution Free Diwali Campaign Controversy: દિવાળીના પાવન પર્વની નજીક આવતા જ મનોરંજન જગતથી લઈને રાજકારણ સુધી ગરમાવો આવી ગયો છે. બોલિવૂડ અભિનેત્રી દિયા મિર્ઝા દ્વારા લોકોને પ્રદૂષણ મુક્ત અને પર્યાવરણ-મૈત્રીપૂર્ણ ગ્રીન દિવાળી ઉજવવાની અપીલ કરવામાં આવ્યા બાદ એક મોટો રાજકીય વિવાદ સર્જાયો છે. મુંબઈ મહાનગરપાલિકા (BMC) દ્વારા સોશિયલ મીડિયા પર અભિનેત્રીનો કથિત વીડિયો શેર કરવામાં આવતા જ તેની ભારે ટીકા શરૂ થઈ ગઈ હતી. ભાજપના દિગ્ગજ નેતા અને મંત્રી નિતેશ રાણેએ આ મામલે આકરી પ્રતિક્રિયા આપીને દિયા મિર્ઝા પર સનાતન અને હિન્દુ ધર્મ વિરોધી હોવાના ગંભીર આરોપો લગાવ્યા છે, જેના કારણે રાજકીય માહોલ ગરમાયો છે.

‘અભિનેત્રી માત્ર હોળી-દિવાળી પર જ કેમ પર્યાવરણની સલાહ આપે છે?’

રાજ્ય મંત્રી નિતેશ રાણેએ દિયા મિર્ઝાના અભિયાન પર પ્રહાર કરતા જણાવ્યું હતું કે દિયા મિર્ઝા દિવાળી કે હોળીના સમયે જ પર્યાવરણ અને પ્રદૂષણની વાતો કરે છે, પરંતુ તે ક્યારેય ઈદ, મોહરમ કે બકરી ઈદ જેવા તહેવારો પર આવી કોઈ સલાહ આપતી નથી કે ટ્વીટ કરતી નથી. તેમણે વધુમાં આક્રમક વલણ અપનાવતા કહ્યું કે, “તેણી જેવા લોકો સનાતન હિન્દુ ધર્મની વિરુદ્ધ કામ કરે છે.” નિતેશ રાણેએ એવું પણ એલાન કર્યું છે કે તેઓ આ મુદ્દે રાજ્યના મુખ્યમંત્રી સાથે ચર્ચા કરશે અને ભવિષ્યમાં આવી ઘટનાઓ ન બને તે માટે યોગ્ય પગલાં લેવા પર ધ્યાન કેન્દ્રિત કરશે. વિવાદ વકર્તા જોઈ BMC દ્વારા આ વિવાદાસ્પદ વીડિયો સોશિયલ મીડિયા પરથી હટાવી લેવામાં આવ્યો હોવાના અહેવાલ પણ સામે આવ્યા છે.

ભાજપના મુંબઈ પ્રમુખ અમિત સાટમે પણ ઉઠાવ્યો સવાલ

આ વિવાદમાં ભાજપના નેતાઓ દ્વારા સતત વિરોધ નોંધાવવામાં આવી રહ્યો છે. આ અગાઉ ભાજપના મુંબઈ પ્રમુખ અમિત સાટમે પણ સોશિયલ મીડિયા પ્લેટફોર્મ ઇન્સ્ટાગ્રામ પર એક પોસ્ટ શેર કરીને બીએમસી (BMC) ને ટેગ કરતા પોતાનો તીવ્ર વાંધો વ્યક્ત કર્યો હતો. તેમણે સ્પષ્ટ શબ્દોમાં લખ્યું હતું કે, “આપણે દીયા મિર્ઝા પાસેથી એ શીખવાની જરૂર નથી કે આપણી દિવાળી કેવી રીતે ઉજવવી જોઈએ. આપણી પરંપરાઓ અને સંસ્કૃતિ આપણી રગોમાં ઊંડે સુધી વણાયેલી છે.” ભાજપના નેતાઓના આ પ્રહારો બાદ સોશિયલ મીડિયા પર પણ બે પક્ષો વચ્ચે ભારે ચર્ચાઓ અને વિવાદો શરૂ થઈ ગયા છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

વિવાદ પર મૌન તોડતા દિયા મિર્ઝાનો પલટવાર

ચારેબાજુથી ઘેરાયા બાદ અભિનેત્રી દિયા મિર્ઝાએ આ સમગ્ર વિવાદ પર પોતાનું મૌન તોડ્યું છે અને સ્પષ્ટતા આપી છે. દિયાએ જણાવ્યું હતું કે, “માનનીય બોમ્બે હાઈકોર્ટ અને BMC દ્વારા જાહેર હિતમાં જ મને આ વીડિયો રેકોર્ડ કરવા માટે કહેવામાં આવ્યું હતું, તો પછી કોઈ આ વાતની ટીકા કેમ કરી રહ્યું છે?” તેણીએ વધુમાં ઉમેર્યું હતું કે આજની તારીખમાં વાયુ પ્રદૂષણ એ આપણા સૌ માટે એક ગંભીર ચિંતાનો વિષય છે. પ્રદૂષણને ઘટાડવા માટે લેવામાં આવતા તમામ સકારાત્મક પ્રયાસોનું દિલથી સ્વાગત કરવું જોઈએ, કારણ કે આ સીધેસીધો જનસામાન્યના સ્વાસ્થ્ય અને તંદુરસ્તી સાથે જોડાયેલો અત્યંત મહત્વપૂર્ણ મામલો છે.

આ પણ વાંચો: ‘ભારતમાં રહો છો, કમાણી કરો છો તો નાગરિકતા કેમ નથી લેતા?’ ઇમરાન ખાનને હાઈકોર્ટની ટકોર