ભારતનો મોટો સંરક્ષણ કરાર: ₹2.38 લાખ કરોડના સૈન્ય હાર્ડવેરની ખરીદીને DACની મંજૂરી

Defence Boost: સંરક્ષણ સંપાદન પરિષદ (DAC) એ શુક્રવારે ભારતીય સેનાની તાકાત વધારવા માટે વિવિધ દરખાસ્તોને મંજૂરી આપી છે. આ અંતર્ગત અંદાજે 2.38 લાખ કરોડ રૂપિયાના સૈન્ય હાર્ડવેરની ખરીદી કરવામાં આવશે. આ મંજૂરી સાથે ચાલુ નાણાકીય વર્ષમાં અત્યાર સુધીનો સૌથી મોટો સંરક્ષણ સોદો સાકાર થયો છે.

ભારતીય સેના માટે અત્યાધુનિક સિસ્ટમ

ભારતીય સેના માટે એર ડિફેન્સ ટ્રેક સિસ્ટમ, આર્મર્ડ પિયર્સિંગ ટેન્ક એમ્યુનિશન, હાઈ-કેપેસિટી રેડિયો રિલે, અને ધનુષ ગન સિસ્ટમની ખરીદીને મંજૂરી અપાઈ છે.

• ધનુષ ગન સિસ્ટમ: આનાથી તોપખાનાની ક્ષમતા વધશે અને લાંબા અંતરના લક્ષ્યોને વધુ સચોટ રીતે નિશાન બનાવી શકાશે.
• એર ડિફેન્સ સિસ્ટમ: આ સિસ્ટમ રીઅલ-ટાઇમમાં હવાઈ સંરક્ષણ નિયંત્રણ અને રિપોર્ટિંગ ક્ષમતા પૂરી પાડશે.
• સર્વેલન્સ: ‘રનવે ઇન્ડિપેન્ડન્ટ એરિયલ સર્વેલન્સ સિસ્ટમ’ દ્વારા સૈન્ય એકમોની દેખરેખ ક્ષમતામાં વધારો થશે.

વાયુસેના અને તટરક્ષક દળનું મજબૂતીકરણ

વાયુસેના માટે મધ્યમ પરિવહન વિમાન, લાંબા અંતરની સપાટીથી હવામાં પ્રહાર કરતી S-400 મિસાઇલ સિસ્ટમ, અને રિમોટલી કંટ્રોલ્ડ એટેક એરક્રાફ્ટના પ્રસ્તાવ મંજૂર કરાયા છે.

• સુખોઈ-30 અપડેટ: સુખોઈ-30ના એરો એન્જિનના સ્પેરપાર્ટ્સના સમારકામ અને ઓવરહોલિંગ (સંપૂર્ણ તપાસ અને નવીનીકરણ) ને મંજૂરી મળી છે, જેનાથી વિમાનની કાર્યકાળ મર્યાદા વધશે.
• ટ્રાન્સપોર્ટ એરક્રાફ્ટ: નવા વિમાનો સામેલ થવાથી જૂના AN-32 અને IL-76 ના બેડાને બદલવામાં આવશે.
• તટરક્ષક દળ: ઇન્ડિયન કોસ્ટ ગાર્ડ માટે હાઈ-કેપેસિટી એર કુશન વ્હિકલ ખરીદવામાં આવશે, જેનો ઉપયોગ પેટ્રોલિંગ, બચાવ કામગીરી અને લોજિસ્ટિક્સ માટે થશે.

ઐતિહાસિક આંકડો

નાણાકીય વર્ષ 2025-26માં અત્યાર સુધીમાં 55 પ્રસ્તાવોને મંજૂરી આપવામાં આવી છે, જેની કુલ કિંમત 6.73 લાખ કરોડ રૂપિયા છે. સત્તાવાર નિવેદન અનુસાર, કોઈપણ નાણાકીય વર્ષમાં આપવામાં આવેલી આ સૌથી વધુ મંજૂરી અને મૂડી કરારો છે.

આ પણ વાંચોઃ મિડલ-ઈસ્ટ સંકટ: ભારત રશિયા પાસેથી 40% તેલ ખરીદશે, LNG માટે મોટી ડીલની તૈયારી

આ પણ વાંચોઃ ફુલ સાઉન્ડમાં ગીત, અંદર હત્યાનો ખેલ: કાકાએ 3 બાળકોને મોતને ઘાટ ઉતાર્યા

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X