ગુજરાતમાં બોમ્બ ધમકીથી ખળભળાટ! સુરત, વડોદરા અને જામનગર મનપાને મળ્યા ધમકીભર્યા ઈમેલ

Gujarat bomb threat email: ગુજરાતમાં આજે ફરી એક વખત બોમ્બ ધમકીની ઘટનાએ તંત્રમાં ખળભળાટ મચાવ્યો છે. વડોદરા, સુરત અને જામનગર મહાનગરપાલિકાની મુખ્ય કચેરીઓને બોમ્બથી ઉડાવી દેવાની ધમકીભર્યા ઈમેલ મળ્યા છે. આ ધમકી મ્યુનિસિપલ કમિશનર અને મેયરના અધિકૃત ઈમેલ આઈડી પર આવી હોવાનું જાણવા મળ્યું છે.

ધમકી મળતાની સાથે જ ત્રણેય શહેરોમાં સુરક્ષા એજન્સીઓ તાત્કાલિક હરકતમાં આવી ગઈ છે. વડોદરા અને સુરત મનપા કચેરીઓમાં પોલીસનો મોટો કાફલો, બોમ્બ સ્ક્વોડ અને ડોગ સ્ક્વોડની ટીમો ઘટનાસ્થળે પહોંચી ગઈ છે. જામનગરમાં તો કચેરીમાંથી 1000થી વધુ કર્મચારીઓ અને અરજદારોને તાત્કાલિક સુરક્ષિત સ્થળે ખસેડી આખું પરિસર ખાલી કરાવવામાં આવ્યું છે.

ઘટનાની વિગતો

• સુરત મહાનગરપાલિકા (SMC): સુરત મનપાની મુખ્ય કચેરીને ઈમેલ દ્વારા ધમકી મળી. તુરંત કચેરી ખાલી કરાવી દેવાઈ અને સર્ચ ઓપરેશન શરૂ કરવામાં આવ્યું. પોલીસ અને બોમ્બ સ્ક્વોડની ટીમોએ તપાસ હાથ ધરી છે.
• વડોદરા મહાનગરપાલિકા (VMC): વડોદરા મનપા કચેરીને પણ સમાન ધમકીભર્યો ઈમેલ મળ્યો. અહીં પણ પોલીસ અને બોમ્બ સ્ક્વોડની ટીમો સક્રિય છે અને સઘન તપાસ ચાલી રહી છે.
• જામનગર મહાનગરપાલિકા: સવારે ધમકી મળતા કર્મચારીઓ અને નાગરિકોને બહાર કાઢવામાં આવ્યા. ફાયર વિભાગ, પોલીસ અને સ્ક્વોડ ટીમોએ તપાસ શરૂ કરી.

પ્રાથમિક તપાસમાં અત્યાર સુધી કોઈ શંકાસ્પદ વસ્તુ કે વિસ્ફોટક સામગ્રી મળી નથી. તેમ છતાં સુરક્ષાના દૃષ્ટિકોણે તમામ જરૂરી પગલાં લેવામાં આવી રહ્યાં છે. સાયબર સેલ દ્વારા ધમકી આપનારની ઓળખ અને ઈમેલના સ્ત્રોતની તપાસ શરૂ કરવામાં આવી છે.

સુરક્ષા વ્યવસ્થા કડક

મહાનગરપાલિકાની કચેરીઓની આસપાસ પોલીસનો ચુસ્ત બંદોબસ્ત ગોઠવવામાં આવ્યો છે. અધિકારીઓએ નાગરિકોને શાંતિ જાળવવા અને અફવાઓથી દૂર રહેવાની અપીલ કરી છે. આવી ધમકીઓ અગાઉ પણ શાળાઓ, કોર્ટ, RTO અને અન્ય સરકારી કચેરીઓને મળી ચૂકી છે, જેમાં મોટા ભાગના કિસ્સાઓ હોક્સ સાબિત થયા છે.

આ પણ વાંચો: શું કંઈ નવાજૂની થવાની? ગુજરાતમાં ભાજપના નેતાઓ સેલિબ્રિટીની મુલાકાતે