16 નવેમ્બરે શિયાળા માટે બંધ થશે બદ્રીનાથ ધામનાં કપાટ, પંચપૂજાનો પ્રારંભ; 2026ની ચારધામ યાત્રાનું થશે સમાપન
ઉત્તરાખંડના પ્રસિદ્ધ બદ્રીનાથ ધામમાં શિયાળાની ઋતુ માટે મંદિરનાં કપાટ બંધ કરવાની ધાર્મિક વિધિ શરૂ થઈ ગઈ છે. પાંચ દિવસીય પંચપૂજાનો પ્રારંભ થયો છે. પરંપરા અનુસાર, 16 નવેમ્બરે રાત્રે 9:37 કલાકે ભગવાન બદ્રી વિશાલના મંદિરનાં કપાટ વિધિ-વિધાન સાથે બંધ કરવામાં આવશે. આ સાથે વર્ષ 2026ની ચારધામ યાત્રાનું પણ સત્તાવાર સમાપન થશે.
16 નવેમ્બરે રાત્રે 9:37 કલાકે કપાટ બંધ થશે
ઉત્તરાખંડના વિશ્વપ્રસિદ્ધ ચારધામમાં સામેલ બદ્રીનાથ ધામમાં શિયાળાની ઋતુ માટે મંદિરનાં કપાટ બંધ કરવાની તૈયારીઓ શરૂ થઈ ગઈ છે. આ ધાર્મિક પ્રક્રિયાના ભાગરૂપે ધામમાં પાંચ દિવસીય પંચપૂજાનો પ્રારંભ કરવામાં આવ્યો છે. ધાર્મિક પરંપરા અને વિધિ-વિધાન અનુસાર 16 નવેમ્બરે રાત્રે 9:37 કલાકે ભગવાન બદ્રી વિશાલના મંદિરનાં કપાટ બંધ કરી દેવામાં આવશે.
શિયાળામાં જ્યોતિર્મઠમાં થશે ભગવાનનાં દર્શન
હરિદ્વાર પહોંચેલા શંકરાચાર્ય સ્વામી અવિમુક્તેશ્વરાનંદે જણાવ્યું હતું કે ભગવાન વર્ષ દરમિયાન બે અલગ-અલગ સ્થળોએ ભક્તોને દર્શન આપે છે. ઉનાળાની ઋતુમાં ભક્તો માણા ગામ નજીક આવેલા બદ્રીનાથ ધામમાં ભગવાનનાં દર્શન કરે છે, જ્યારે શિયાળામાં ભગવાન બદ્રી વિશાલ જ્યોતિર્મઠમાં બિરાજમાન થાય છે. તેથી કપાટ બંધ થયા બાદ શ્રદ્ધાળુઓ જ્યોતિર્મઠમાં ભગવાનનાં દર્શન કરી શકશે.
કપાટ બંધ કરવાની વિધિમાં સામેલ થશે શંકરાચાર્ય
શંકરાચાર્ય સ્વામી અવિમુક્તેશ્વરાનંદ આવતીકાલે હરિદ્વારથી બદ્રીનાથ ધામ જવા રવાના થશે. ત્યાં તેઓ ધાર્મિક પરંપરા અને વિધિ-વિધાન અનુસાર મંદિરનાં કપાટ બંધ કરવાની પ્રક્રિયામાં ભાગ લેશે.
શિયાળામાં કેમ બંધ કરવામાં આવે છે ચારધામનાં કપાટ?
બદ્રીનાથ સહિત ચારેય ધામ ઊંચા હિમાલયના વિસ્તારમાં આવેલા છે. શિયાળાની ઋતુમાં અહીં ભારે હિમવર્ષા અને કડકડતી ઠંડી પડતી હોવાથી યાત્રાળુઓ માટે પહોંચવું મુશ્કેલ બની જાય છે. આ કારણોસર દર વર્ષે ઓક્ટોબર-નવેમ્બર દરમિયાન ચારધામનાં કપાટ શ્રદ્ધાળુઓ માટે બંધ કરવામાં આવે છે.
ત્યારબાદ આગામી વર્ષે એપ્રિલ-મે મહિનામાં ફરીથી કપાટ ખોલવામાં આવે છે અને ચારધામ યાત્રાનો પ્રારંભ થાય છે. સામાન્ય રીતે આ યાત્રા લગભગ છ મહિના સુધી ચાલે છે, જેમાં દેશ-વિદેશમાંથી લાખો શ્રદ્ધાળુઓ ભગવાનનાં દર્શન માટે ઉત્તરાખંડ પહોંચે છે.
આ પણ વાંચો: ક્રિકેટમાં પસંદગી માટે તૈયારી કરતી 17 વર્ષની ખેલાડીનું શંકાસ્પદ મોત: મામાના ઘરે મૃત હાલતમાં મળી
