લાભ પાંચમના શુભ મુહૂર્તે ગુજરાતનાં બજારો અને માર્કેટિંગ યાર્ડ ધમધમ્યાં, વેપારીઓએ ચોપડા પૂજન કરી નવા વર્ષના વેપારનો કર્યો પ્રારંભ

દિવાળી અને નૂતન વર્ષના તહેવારોની રજાઓ પૂર્ણ થયા બાદ આજે લાભ પાંચમના પવિત્ર પર્વે સમગ્ર ગુજરાતમાં વેપાર-ધંધાની ફરી શરૂઆત થઈ છે. રાજ્યનાં નાના-મોટાં શહેરોમાં વેપારીઓએ શુભ મુહૂર્તમાં પૂજા-અર્ચના અને ચોપડા પૂજન કરીને નવા વર્ષના કામકાજના શ્રીગણેશ કર્યા છે. બીજી તરફ, રાજકોટ અને ગોંડલ સહિતનાં માર્કેટિંગ યાર્ડમાં પણ હરાજી અને ખરીદ-વેચાણની કામગીરી શરૂ થતાં બજારોમાં ફરી રોનક જોવા મળી રહી છે.

અમદાવાદ અને વડોદરાનાં બજારોમાં ફરી ધમધમાટ

લાભ પાંચમના શુભ દિવસે મેગાસિટી અમદાવાદનાં રતનપોળ, લાલ દરવાજા સહિતનાં મુખ્ય બજારોમાં વહેલી સવારથી જ વેપારીઓએ દુકાનો ખોલી હતી. પરંપરા મુજબ પૂજા-અર્ચના અને ચોપડા પૂજન કર્યા બાદ વેપારની શરૂઆત કરવામાં આવી હતી. દિવાળીની રજાઓને કારણે છેલ્લા કેટલાક દિવસોથી સુમસામ રહેલાં બજારોમાં ફરી ઉત્સાહ અને રોનક જોવા મળી રહી છે.

વડોદરાના મંગળબજાર સહિતના મુખ્ય વેપારી વિસ્તારોમાં પણ દુકાનો ફરી શરૂ થઈ છે. વેપારીઓ નવા વર્ષમાં સારા વેપાર અને ગ્રાહકોની વધુ અવરજવર રહેવાની આશા સાથે કામકાજે પરત ફર્યા છે.

રાજકોટ અને ગોંડલ માર્કેટિંગ યાર્ડમાં હરાજી શરૂ

શહેરી બજારોની સાથે સૌરાષ્ટ્રનાં અગ્રણી માર્કેટિંગ યાર્ડમાં પણ લાભ પાંચમથી વેપારની ગતિવિધિઓ ફરી શરૂ થઈ છે. ગોંડલ માર્કેટિંગ યાર્ડમાં દિવાળીના તહેવાર નિમિત્તે જાહેર કરાયેલી એક સપ્તાહની રજાઓ પૂર્ણ થયા બાદ નવી જણસીઓની ખરીદ-વેચાણની કામગીરી શરૂ કરવામાં આવી છે.

રાજકોટ માર્કેટિંગ યાર્ડમાં પણ શુભ મુહૂર્તે હરાજી અને સોદાનો પ્રારંભ થયો છે. યાર્ડમાં ઘઉં, મગફળી, સોયાબીન અને તલ સહિતની જણસીઓની આવક નોંધાઈ છે. મગફળીના ભાવ પ્રતિ મણ રૂ. 1,500થી 1,700 સુધી બોલાયા હોવાનું જણાવાયું છે.

સારા ભાવની આશા સાથે ખેડૂતો યાર્ડમાં પહોંચ્યા

દિવાળીની રજાઓ પૂર્ણ થતાં ખેડૂતો પણ પોતાની જણસીઓ વેચવા માટે વહેલી સવારથી જ માર્કેટિંગ યાર્ડમાં પહોંચ્યા હતા. નવા વર્ષમાં ખેતીપેદાશોના સારા ભાવ મળવાની આશા સાથે ખેડૂતોમાં ઉત્સાહ જોવા મળ્યો હતો.

વેપારીઓ માટે લાભ પાંચમ નવા વર્ષના ધંધા-રોજગારની શરૂઆતનું વિશેષ મહત્વ ધરાવે છે. ત્યારે રાજ્યભરમાં બજારો અને માર્કેટિંગ યાર્ડ ફરી શરૂ થતાં વેપારી આલમ તેમજ ખેડૂતોમાં નવા વર્ષના સારા વેપાર અને તેજીની આશા જાગી છે.

આ પણ વાંચો: મહારાષ્ટ્રમાં ખાનગી બસનો ભયાનક અકસ્માત: પુલની રેલિંગ તોડી નીચે ખાબકી બસ, એક મહિલાનું મોત