BLO ડ્યુટી બની શિક્ષકો માટે ‘કાળ’: ત્રણ શિક્ષકોના મોતથી શિક્ષણ જગતમાં હાહાકાર, વિપક્ષ આક્રમક

Team Hum Dekhenge Last Updated: નવેમ્બર 21, 2025

2 minutes read

અમદાવાદ, 21 નવેમ્બર: રાજ્યમાં મતદાર યાદી સુધારણા (Special Intensive Revision – SIR)ની કામગીરીમાં બૂથ લેવલ ઓફિસર (BLO) તરીકે ફરજ બજાવતા શિક્ષકો પરના અસહ્ય કામના ભારણ અને ઉપરી અધિકારીઓના કથિત દબાણને કારણે ગંભીર ઘટનાઓ સામે આવી છે. છેલ્લા કેટલાક દિવસોમાં BLOની કામગીરી સાથે જોડાયેલા ત્રણ શિક્ષકોના મૃત્યુ થતાં શિક્ષણ જગતમાં હાહાકાર મચી ગયો છે અને આ મામલે રાજકીય ગરમાવો આવ્યો છે.

BLOની કામગીરીના તણાવથી મૃત્યુની ઘટનાઓ

ખેડા (કપડવંજ): નવાપુરા પ્રાથમિક શાળાના આચાર્ય અને BLO તરીકે ફરજ બજાવતા રમેશભાઈ પરમારનું હાર્ટ એટેકથી નિધન થયું છે. પરિવારજનોએ આક્ષેપ કર્યો છે કે BLOની વધારે પડતી કામગીરી, મોડી રાત સુધીના ઉજાગરા અને સતત મુસાફરીના કારણે તેઓ ગંભીર ડિપ્રેશનમાં હતા, જેના પરિણામે તેમનું અવસાન થયું.

ગીર સોમનાથ (કોડીનાર): દેવળી ગામમાં ફરજ બજાવતા BLO શિક્ષક અરવિંદ મૂળજી વાઢેરએ માનસિક તણાવને કારણે આત્મહત્યા કરી લીધી. તેમણે લખેલી સ્યૂસાઇડ નોટમાં સ્પષ્ટ ઉલ્લેખ કર્યો છે કે તેઓ SIR કામગીરીના ભારે દબાણથી થાકી ગયા હતા અને આ કારણે આ પગલું ભર્યું.

તાપી (વાલોડ): તાપીના વાલોડમાં પણ એક BLO સહાયકને હાર્ટ એટેક આવ્યો હોવાની ઘટના સામે આવી છે.

શિક્ષક સંગઠનો અને વિપક્ષનો આક્રોશ

શિક્ષકોના આ ઉપરા-છાપરી મૃત્યુને કારણે સમગ્ર રાજ્યના શિક્ષક આલમમાં ભારે રોષ ફેલાયો છે.

શિક્ષક સંગઠનો: શિક્ષક સંગઠનોએ BLOની કામગીરીને શિક્ષણ કાર્ય સિવાયના કામ તરીકે ગણાવીને તેનો વિરોધ કર્યો છે. તેઓએ સ્પષ્ટપણે કહ્યું છે કે અસહ્ય કામગીરીના ભારણને કારણે શિક્ષકો માનસિક તણાવ અને ડિપ્રેશનનો ભોગ બની રહ્યા છે. આ કામગીરી તાત્કાલિક અન્ય સરકારી કર્મચારીઓને સોંપવાની માગણી કરવામાં આવી છે.

વિપક્ષ: કોંગ્રેસ સહિતના વિપક્ષી દળોએ આ ઘટનાઓને સરકારના “માનસિક ત્રાસ”નું પરિણામ ગણાવ્યું છે. વિપક્ષે આક્ષેપ કર્યો છે કે રાજકીય એજન્ડા પાર પાડવા માટે BLOને હથિયાર બનાવવામાં આવી રહ્યા છે, જેના કારણે નિર્દોષ શિક્ષકોના જીવ જઈ રહ્યા છે.

સરકાર અને ચૂંટણી પંચનું વલણ
આ મામલે રાજકારણ ગરમાયું હોવા છતાં, ચૂંટણી પંચે આ BLOના મૃત્યુ અને આપઘાત અંગેના આક્ષેપોથી હાથ અધ્ધર કરી દીધા છે અને તેને BLOની કામગીરી સાથે સીધો સંબંધ ન હોવાનું જણાવ્યું છે. જોકે, વધતા વિરોધને ધ્યાનમાં રાખીને તંત્રએ તપાસના આદેશ આપ્યા છે.

આમ આદમી પાર્ટી (AAP) નેતા ઈસુદાન ગઢવી: ગઢવીએ સીધો આક્ષેપ કર્યો કે “ભાજપની ચૂંટણી જીતવાની લ્હાયમાં ત્રણ BLO એ જીવ ગુમાવ્યા છે.” તેમણે દાવો કર્યો કે ભાજપ સ્થાનિક સ્વરાજની ચૂંટણી પાછી ઠેલાવાને કારણે SIRની કામગીરી વહેલી પતાવવા માટે BLO પર દબાણ કરી રહી છે, જે આ ઘટનાઓનું મૂળ કારણ છે. તેમણે શિક્ષકોને ખોટું પગલું ન ભરવાની અપીલ કરીને દબાણકર્તા અધિકારીઓ સામે AAPનો સંપર્ક કરવા જણાવ્યું છે.
કોંગ્રેસ નેતા ડૉ. હેમાંગ વસાવડા: તેમણે આક્ષેપ કર્યો કે ફરજમાંથી મુક્ત થવા માંગતા કર્મચારીઓને પોલીસ ફરિયાદ, ધાકધમકી અને ધરપકડની ધમકી આપીને માનસિક ત્રાસ આપવામાં આવે છે. તેમણે ગીર સોમનાથની ઘટના માટે જવાબદાર કોણ છે, તેનો જવાબ પોલીસ પાસે માંગ્યો છે.

આ ગંભીર ઘટનાઓએ સરકારી કર્મચારીઓ પર લાદવામાં આવતા કામના ભારણ અને તેની માનવીય કિંમત પર ગંભીર પ્રશ્નાર્થ ઊભો કર્યો છે.

ઝડપથી સમાચાર મેળવવા માટે જોઈન કરો અમારા વોટ્સઅપ ગ્રુપમાં
https://chat.whatsapp.com/FU8bgMOynfgJl4wCoEeiJw