સાબરમતી રિવરફ્રન્ટ પર 23 ઓક્ટોબરથી હસ્તકલાનો મહાકુંભ, 100થી વધુ કારીગરો લેશે ભાગ
Ahmedabad : અમદાવાદનો સાબરમતી રિવરફ્રન્ટ આગામી 23 ઓક્ટોબરથી ભારતીય પરંપરાગત શિલ્પ-સ્થાપત્ય અને અર્વાચીન કલાના ભવ્ય સમન્વયનો સાક્ષી બનવા જઈ રહ્યો છે. નેશનલ ઇન્સ્ટિટ્યૂટ ઓફ ફેશન ટેકનોલોજી (NIFT), ગાંધીનગર દ્વારા આઠ દિવસીય હસ્તકલા મહોત્સવ ‘છાપ@સાબરમતી 2026’નું ભવ્ય આયોજન હાથ ધરાયું છે. આ સાંસ્કૃતિક મહોત્સવમાં દેશભરમાંથી 100થી વધુ ખ્યાતનામ કારીગરો, સમકાલીન કલાકારો તેમજ નિફ્ટના વર્તમાન અને ભૂતપૂર્વ વિદ્યાર્થીઓ ઉત્સાહભેર ભાગ લેશે.
‘વારસામાં મૂળ, આવતીકાલ માટે નવી કલ્પના’ની થીમ પર આયોજન
સંસ્થા દ્વારા ‘રૂટ્સ ઇન હેરિટેજ, રીઇમેજિનિંગ ફોર ટુમોરો’ની સંકલ્પના સાથે આ આયોજન કરવામાં આવ્યું છે, જેનો મુખ્ય ઉદ્દેશ સદીઓ જૂની ભારતીય હસ્તકળાને યુવા પેઢી સમક્ષ નવીન દ્રષ્ટિકોણ સાથે રજૂ કરવાનો છે. પરંપરાગત હુનરને આધુનિક ડિઝાઇનિંગ અને વૈશ્વિક ટ્રેન્ડ સાથે સાંકળીને હસ્તકલાને બજારમાં નવી ઓળખ આપવાની આ નવતર પહેલ છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
બાંધણી, બ્લોક પ્રિન્ટિંગ અને ક્લે-આર્ટનું લાઈવ ડેમોન્સ્ટ્રેશન
આ મહોત્સવ દરમિયાન કલાપ્રેમીઓ માટે બાંધણી, લાકડાના બીબાં વડે થતું બ્લોક પ્રિન્ટિંગ તેમજ માટીકામ (ટેરાકોટા/પોટરી) સહિતની વિસરાતી કળાઓનું લાઈવ ડેમોન્સ્ટ્રેશન યોજાશે. મુલાકાતીઓ કારીગરોની સર્જનપ્રક્રિયાને નજરોનજર નિહાળી શકશે. આ સાથે આયોજિત વિશેષ ક્રાફ્ટ બજારમાં મુલાકાતીઓ સીધા કારીગરો પાસેથી અસલ હસ્તકલા ઉત્પાદનોની ખરીદી કરી શકશે.
આ પણ વાંચો: પતિની હત્યા કરાવી સાપ કરડાવ્યો, પત્ની અને પ્રેમીને ફાંસીની સજા!
વર્કશોપ, પેનલ ચર્ચા અને સાંસ્કૃતિક સંધ્યા
23થી 30 ઓક્ટોબર સુધી ચાલનારા આ મહોત્સવમાં માત્ર પ્રદર્શન પૂરતું સીમિત ન રહેતાં ઇન્ટરેક્ટિવ વર્કશોપ્સ, ડિઝાઇન ટોક્સ અને માસ્ટર ક્લાસિસનું પણ આયોજન કરાયું છે. નિફ્ટ ગાંધીનગરના ડિરેક્ટર ડૉ. સમીર સુદના જણાવ્યા મુજબ, પરંપરાગત શિલ્પીઓ અને યુવા ડિઝાઇનર્સ વચ્ચે સંવાદ થકી હસ્તકલા ક્ષેત્રે નવા સર્જનાત્મક આયામો ખુલશે. દરરોજ સાંજે કલાપ્રદર્શન સાથે વિવિધ સાંસ્કૃતિક કાર્યક્રમો પણ યોજાશે, જે 30 ઓક્ટોબરે સમાપન સમારોહ સાથે સંપન્ન થશે.
કારીગરો માટે આર્થિક અને વ્યાપારી તક
વચેટિયાઓ વિના સીધું ગ્રાહક જોડાણ (Direct Artisan-to-Consumer Market), જેથી કારીગરોને તેમની કળાનું વાજબી મૂલ્ય મળી રહે. ડિઝાઇનર્સ અને ઈ-કોમર્સ પ્લેટફોર્મ સાથે કારીગરોનું નેટવર્કિંગ થાય તે માટે વિશેષ B2B (બિઝનેસ-ટુ-બિઝનેસ) મીટ્સ અને ચર્ચા સત્રોનું આયોજન કરવામાં આવ્યું છે.
મુલાકાતીઓ માટે વ્યવસ્થા
સાબરમતી રિવરફ્રન્ટ પર 23થી 30 ઓક્ટોબર દરમિયાન દરરોજ બપોરથી મોડી સાંજ સુધી આ પ્રદર્શન, ફૂડ સ્ટોલ્સ અને સાંસ્કૃતિક સંગીત-નૃત્યના કાર્યક્રમો લોકો માટે ખુલ્લા રહેશે.
ગુજરાતની પ્રખ્યાત બાંધણી, અજરખ બ્લોક પ્રિન્ટિંગ, રોગન આર્ટ, પટોળા અને કચ્છની ભરતકામ શૈલીનું જીવંત નિદર્શન. પરંપરાગત પોટરી, ટેરાકોટા ક્રાફ્ટ અને પિત્તળ/તાંબાના વાસણો પર થતું કલાત્મક નકશીકામ. મુલાકાતીઓ માત્ર વસ્તુઓ ખરીદવા પૂરતા સીમિત નહીં રહે, પરંતુ તેઓ જાતે ક્રાફ્ટ ટૂલ્સ અને બ્લોક્સનો ઉપયોગ કરી પ્રાયોગિક ધોરણે છાપકામ કે માટીકામનો અનુભવ પણ લઈ શકશે.
