કેન્દ્રીય કર્મચારીઓને મોટો ઝટકો લાગે તેવા સમાચાર સામે આવ્યા છે. કેન્દ્ર સરકારે લોકસભામાં જણાવ્યું કે કોરોના મહામારી દરમિયાન કેન્દ્રીય કર્મચારીઓ અને પેન્શનરોને રોકેલું 18 મહિનાનું મોંઘવારી ભથ્થું (DA) તેમને આપવામાં આવશે નહીં. કેન્દ્રીય નાણા રાજ્ય મંત્રી પંકજ ચૌધરીએ લેખિતમાં જવાબ આપ્યો કે કેન્દ્રીય કર્મચારીઓ અને પેન્શનરોને મોંઘવારી ભથ્થા અને મોંઘવારી રાહતના ત્રણ હપ્તાના એરિયર્સ આપવાની કોઈ યોજના નથી.
શું કહ્યું પંકજ ચૌધરીએ ?
તેમણે કહ્યું કે 1 જાન્યુઆરી, 2020, 1 જુલાઈ, 2020 અને 1 જાન્યુઆરી, 2021 ના રોજ જારી કરાયેલ મોંઘવારી ભથ્થું બંધ કરવાનો નિર્ણય કોરોના રોગચાળાને કારણે આર્થિક વિક્ષેપને કારણે લેવામાં આવ્યો હતો, જેથી સરકાર પરનો નાણાકીય બોજ ઓછો કરી શકાય. આ દ્વારા સરકારે 34,402.32 કરોડ રૂપિયાની બચત કરી હતી.
સંરક્ષણ ઉત્પાદન વધારવાનો લક્ષ્યાંક
બીજી તરફ, કેન્દ્રીય સંરક્ષણ રાજ્ય મંત્રી અજય ભટ્ટે રાજ્યસભામાં જણાવ્યું હતું કે સરકારે આગામી નાણાકીય વર્ષ (2024-25) સુધીમાં સંરક્ષણ ઉત્પાદન વધારીને 1.75 લાખ કરોડ રૂપિયા કરવાનું લક્ષ્ય રાખ્યું છે. તેમાંથી લગભગ 35,000 કરોડ રૂપિયાના સંરક્ષણ ઉત્પાદનોની નિકાસનો લક્ષ્યાંક પણ સામેલ છે. વર્ષ 2021-22માં ખાનગી કંપનીઓ અને સરકારી સંરક્ષણ ઉત્પાદકોનું ઉત્પાદન રૂ. 86,078 કરોડે પહોંચ્યું છે.
અગાઉ સંરક્ષણ ઉત્પાદન કેટલું હતું ?
વર્ષ 2020-21માં દેશમાં સંરક્ષણ ઉત્પાદન 88,631 કરોડ રૂપિયા હતું. અગાઉ 2019-20માં 63,722 કરોડ રૂપિયાનું સંરક્ષણ ઉત્પાદન હતું. દેશમાં 2018-19માં 50,499 કરોડ રૂપિયા અને 2017-18માં 54,951 કરોડ રૂપિયાનું સંરક્ષણ ઉત્પાદન થયું હતું. આ સાથે તેમણે જણાવ્યું કે 2021-22માં 12,815 કરોડ રૂપિયાના સંરક્ષણ ઉત્પાદનોની નિકાસ કરવામાં આવી હતી.












