અમેરિકામાં ટ્રમ્પને મિડટર્મ ચૂંટણીમાં મોટો ઝટકો! એકદમ નજીકના ખાસ 3 ઉમેદાવારોની હાર

US Midterm Elections 2026: અમેરિકાની મિડટર્મ ચૂંટણીમાં રાષ્ટ્રપતિ ડોનાલ્ડ ટ્રમ્પ અને તેમની રિપબ્લિકન પાર્ટીને મોટો રાજકીય ઝટકો લાગ્યો હોવાના અહેવાલો સામે આવ્યા છે. વિપક્ષી ડેમોક્રેટિક પાર્ટીએ અનેક મહત્ત્વની બેઠકો પર જીત મેળવીને રિપબ્લિકન પાર્ટી માટે પડકાર ઊભો કર્યો છે. સૌથી વધુ ચર્ચા ટેક્સાસની ચૂંટણીની થઈ રહી છે, જ્યાં લાંબા સમયથી રિપબ્લિકન પાર્ટીનું વર્ચસ્વ રહ્યું છે. અહીં ડેમોક્રેટિક ઉમેદવાર જેમ્સ ટાલારિકોએ રિપબ્લિકન ઉમેદવાર કેન પેક્સ્ટનને હરાવ્યા હોવાનું અહેવાલોમાં જણાવાયું છે.

આ જીત સાથે ડેમોક્રેટ્સે લગભગ 33 વર્ષ બાદ ટેક્સાસની સેનેટ બેઠક પર ફરી કબજો મેળવ્યો હોવાનો દાવો કરવામાં આવ્યો છે. આ ઉપરાંત ટ્રમ્પના નજીકના ગણાતા ભારતીય મૂળના વિવેક રામાસ્વામી સહિતના ઉમેદવારોને પણ હારનો સામનો કરવો પડ્યો હોવાનું જણાવાયું છે.

ટેક્સાસમાં 33 વર્ષ બાદ ડેમોક્રેટ્સની વાપસી

ટેક્સાસને રિપબ્લિકન પાર્ટીનો મજબૂત ગઢ માનવામાં આવે છે. અગાઉની રાષ્ટ્રપતિ ચૂંટણીમાં પણ ડોનાલ્ડ ટ્રમ્પે અહીં નોંધપાત્ર લીડ મેળવી હતી. જોકે, આ મિડટર્મ ચૂંટણીમાં પરિણામોનું ચિત્ર અલગ જોવા મળ્યું.

ડેમોક્રેટિક ઉમેદવાર જેમ્સ ટાલારિકોએ રિપબ્લિકન કેન પેક્સ્ટનને હરાવીને મહત્ત્વપૂર્ણ જીત મેળવી છે. 37 વર્ષીય ટાલારિકો રાજ્યના ધારાસભ્ય રહી ચૂક્યા છે અને અગાઉ મિડલ સ્કૂલમાં શિક્ષક તરીકે પણ કામ કરી ચૂક્યા છે. તેમણે પ્રેસ્બિટેરિયન ધર્મશાસ્ત્રનો અભ્યાસ પણ કર્યો છે.

આ જીતનું મહત્ત્વ એટલા માટે છે કે 1993 બાદ પહેલીવાર ટેક્સાસમાંથી ડેમોક્રેટિક પાર્ટીના ઉમેદવારને સેનેટમાં સ્થાન મળ્યું હોવાનું અહેવાલમાં જણાવાયું છે. ટાલારિકો લાંબા સમયથી સેનેટર રહેલા જ્હોન કોર્નિનનું સ્થાન લેશે અને સેનેટના સૌથી યુવા સભ્યોમાં સામેલ થશે.

કેન પેક્સ્ટનની છબી પણ બની ચૂંટણીનો મુદ્દો

કેન પેક્સ્ટન સામે અગાઉ ભ્રષ્ટાચાર સંબંધિત તપાસ થઈ હતી. જોકે, આ મામલે તેમની સામે આરોપો નક્કી થયા નહોતા. આ ઉપરાંત ટેક્સાસની વિધાનસભામાં તેમના પર હોદ્દાનો દુરુપયોગ કરીને એક રાજકીય મદદગારને લાભ પહોંચાડવાનો આરોપ પણ લાગ્યો હતો. બાદમાં રાજ્યની સેનેટે તેમને આ આરોપોમાંથી મુક્ત કર્યા હતા.

રિપબ્લિકન પાર્ટીના કેટલાક નેતાઓને આશંકા હતી કે પેક્સ્ટનની છબીને કારણે પાર્ટીને નુકસાન થઈ શકે છે. તેમ છતાં ટ્રમ્પે જ્હોન કોર્નિનની જગ્યાએ પેક્સ્ટનને સમર્થન આપ્યું હતું. જોકે, ચૂંટણીનાં પરિણામોમાં આ સમર્થન તેમને જીત અપાવી શક્યું નહીં.

ટાલારિકોએ સામાન્ય લોકોના મુદ્દા ઉઠાવ્યા

ચૂંટણી પ્રચાર દરમિયાન જેમ્સ ટાલારિકોએ સામાન્ય નાગરિકોના પ્રશ્નો પર ભાર મૂક્યો હતો. તેમણે અબજોપતિઓના વધતા રાજકીય પ્રભાવ સામે સવાલો ઉઠાવ્યા હતા.

તેમનું કહેવું હતું કે રાજકારણમાં ધનિક લોકોનો વધતો હસ્તક્ષેપ સામાન્ય અમેરિકન નાગરિકોના હિતોને નુકસાન પહોંચાડી શકે છે. સોશિયલ મીડિયા પર તેમના પ્રચારના વીડિયો પણ ચર્ચામાં રહ્યા હતા. અહેવાલો અનુસાર, તેમના પ્રચારને કારણે રિપબ્લિકન અને અપક્ષ મતદારોનો પણ ટેકો મળ્યો હતો.

વિવેક રામાસ્વામી સહિત ટ્રમ્પના બે નજીકના ઉમેદવારો હાર્યા

ઓહાયોના ગવર્નરપદની ચૂંટણીમાં ભારતીય મૂળના વિવેક રામાસ્વામીને ડેમોક્રેટિક ઉમેદવાર એમી એક્ટન સામે હારનો સામનો કરવો પડ્યો હોવાનું અહેવાલમાં જણાવાયું છે. રામાસ્વામીને ટ્રમ્પના નજીકના અને પસંદગીના ઉમેદવાર તરીકે ઓળખવામાં આવતા હતા.

આ ચૂંટણી અમેરિકાના ઉપરાષ્ટ્રપતિ જેડી વાન્સના ગૃહ રાજ્ય ઓહાયોમાં યોજાઈ હતી. અહીં રિપબ્લિકન પાર્ટીની અંદર પણ ઉમેદવારી અને ચૂંટણીને લઈને મતભેદો સામે આવ્યા હતા.

બીજી તરફ, દક્ષિણ કેરોલિનાની સેનેટ બેઠક પર ડેમોક્રેટિક ઉમેદવાર એન્ની એન્ડ્ર્યૂઝે ટ્રમ્પ સમર્થિત ડાર્લિન ગ્રેહામને હરાવ્યા હોવાનો દાવો કરવામાં આવ્યો છે. ડાર્લિન દિવંગત રિપબ્લિકન સેનેટર લિન્ડસે ગ્રેહામનાં બહેન છે. આ જીતને ડેમોક્રેટ્સ માટે વધુ એક મહત્ત્વપૂર્ણ સફળતા તરીકે જોવામાં આવી રહી છે.

જ્યોર્જિયામાં કીશા લાન્સ બોટમ્સની ઐતિહાસિક જીત

જ્યોર્જિયામાં પણ ડેમોક્રેટિક પાર્ટીને સફળતા મળી હોવાનું અહેવાલમાં જણાવાયું છે. કીશા લાન્સ બોટમ્સ રાજ્યનાં પ્રથમ અશ્વેત મહિલા ગવર્નર તરીકે ચૂંટાયાં છે. તેમણે રિપબ્લિકન ઉમેદવાર રિક જેક્સનને હરાવ્યા હતા.

કીશા લાન્સ બોટમ્સ અગાઉ એટલાન્ટાનાં મેયર રહી ચૂક્યાં છે. તેઓ પૂર્વ રાષ્ટ્રપતિ જો બાઇડનનાં સલાહકાર તરીકે પણ કામ કરી ચૂક્યાં છે.

જ્યોર્જિયામાં ડેમોક્રેટિક સેનેટર જ્હોન ઓસોફે પોતાની બેઠક જાળવી રાખી હોવાનું જણાવાયું છે. જ્યારે નોર્થ કેરોલિનામાં ડેમોક્રેટ રોય કૂપરે રિપબ્લિકન પાર્ટી પાસેથી સેનેટ બેઠક છીનવી હોવાનું અહેવાલમાં કહેવાયું છે.

ટ્રમ્પના બાકીના કાર્યકાળ પર પડી શકે છે અસર

અમેરિકાની મિડટર્મ ચૂંટણીમાં પ્રતિનિધિ સભાની તમામ 435 બેઠકો અને સેનેટની 37 બેઠકો માટે મતદાન યોજાયું હોવાનું આપવામાં આવેલી માહિતીમાં જણાવાયું છે. આ ઉપરાંત 36 રાજ્યોમાં ગવર્નરપદ માટે પણ ચૂંટણી યોજાઈ હતી.

ચૂંટણી પહેલાંના સર્વેમાં અર્થતંત્ર અને લોકશાહીની સ્થિતિ મતદારો માટે મહત્ત્વના મુદ્દા તરીકે સામે આવ્યા હતા. પ્રારંભિક સર્વે મુજબ, મોટી સંખ્યામાં મતદારો દેશની સ્થિતિ અને ટ્રમ્પના કામકાજથી અસંતુષ્ટ હોવાનું જણાવાયું હતું.

જો ડેમોક્રેટિક પાર્ટી પ્રતિનિધિ સભા અને સેનેટમાં બહુમતી મેળવવામાં સફળ થાય, તો ટ્રમ્પના બાકીના કાર્યકાળ દરમિયાન કાયદા પસાર કરાવવા અને નવી નીતિઓ લાગુ કરવામાં મુશ્કેલીઓ ઊભી થઈ શકે છે. ખાસ કરીને સંસદીય સમિતિઓ પર ડેમોક્રેટ્સનું નિયંત્રણ વધે તો સરકારના નિર્ણયો અને વહીવટીતંત્રની કામગીરીની તપાસ પણ વધુ તેજ બની શકે છે.

આમ, ટેક્સાસથી લઈને જ્યોર્જિયા સુધીનાં પરિણામો અમેરિકાના રાજકારણમાં નવા સમીકરણો ઊભાં કરી શકે છે.

આ પણ વાંચો: કૂતરાને બચાવવાના ચક્કરમાં ડિવાઈડર સાથે બાઈક અથડાઈ, બે સગા ભાઈ સહિત 3 યુવકોના મોત