યુરોપમાં મહા સાયબર એટેક: કેટલાય સ્ટોર્સના ફ્રિજ હેક કર્યા, તાપમાન 50 ડિગ્રીએ પહોંચાડી દીધું

Supermarket Cyberattack: યુરોપમાં સુપરમાર્કેટ્સ પર થયેલા મોટા સાઇબર હુમલાએ ખળભળાટ મચાવી દીધો છે. સ્વીડનથી લઈને બેલ્જિયમ અને લક્ઝમબર્ગ સુધી ફેલાયેલા આ ડિજિટલ હુમલામાં સુપરમાર્કેટ્સના ફ્રિજ અને ફ્રીઝર સિસ્ટમને નિશાન બનાવવામાં આવ્યા હતા. સાઇબર હુમલાના કારણે અનેક સ્ટોર્સમાં કૂલિંગ સિસ્ટમ ખોરવાઈ ગઈ અને ફ્રિજ-ફ્રીઝરનું તાપમાન અચાનક વધી જતાં મોટા પ્રમાણમાં ખાદ્ય સામગ્રી બગડી ગઈ હતી. પરિણામે અનેક સ્ટોર્સને લાખો રૂપિયાની કિંમતનો ખોરાક ફેંકવાની ફરજ પડી હતી.

આ હુમલાથી બેલ્જિયમ અને લક્ઝમબર્ગના સુપરમાર્કેટ ગ્રુપ Ahold Delhaize અને Colruyt, જ્યારે સ્વીડનના ICA અને Coop સ્ટોર્સ પ્રભાવિત થયા છે. ફર્નિચર અને ફૂડ રિટેલ ક્ષેત્રે જાણીતી IKEAની એક શાખા પણ આ હુમલાની ઝપેટમાં આવી હોવાનું અહેવાલોમાં જણાવાયું છે.

મધરાતે થયો હુમલો, ફ્રીઝરનું તાપમાન 50 ડિગ્રી સુધી પહોંચ્યું

મીડિયા અહેવાલો અનુસાર, સ્ટોકહોમના એક ICA સ્ટોરનાં સેલ્સ મેનેજર એન્ગ્લા ઇંગવોલે જણાવ્યું હતું કે સોમવારે રાત્રે આશરે 2 વાગ્યે સાઇબર હુમલો થયો હતો. જોકે, તેની જાણકારી સ્ટોરને કેટલાક કલાકો બાદ મળી હતી. હુમલાના કારણે ફ્રીઝરનું તાપમાન વધીને 50 ડિગ્રી સેલ્સિયસ સુધી પહોંચી ગયું હતું, જેના પરિણામે તેમાં રાખવામાં આવેલી ખાદ્ય સામગ્રી બગડી ગઈ હતી.

ICAના પ્રવક્તાએ પણ પુષ્ટિ કરી હતી કે રાત્રે થયેલી આ ઘટનાથી કંપનીના કેટલાક સ્ટોર્સ પ્રભાવિત થયા હતા અને તેમની કૂલિંગ સિસ્ટમને ભારે નુકસાન પહોંચ્યું હતું.

ફ્રાન્સમાં પણ ગયા મહિને થયો હતો આવો જ હુમલો

આ ઘટના ગયા મહિને ફ્રાન્સમાં થયેલા આવા જ સાઇબર હુમલાની યાદ અપાવે છે. તે સમયે હેકર્સે સેંકડો સુપરમાર્કેટ્સના કૂલિંગ યુનિટ્સને નિશાન બનાવ્યા હતા. તેના કારણે આગ લાગવાની ઘટનાઓ અને મોટા પ્રમાણમાં ખાદ્ય સામગ્રી બગડવાના અહેવાલો સામે આવ્યા હતા.

હાલ સુધી કોઈ હેકર ગ્રુપે આ હુમલાઓની જવાબદારી સ્વીકારી નથી. જોકે, વર્ષ 2022માં યુક્રેન પર રશિયાના આક્રમણ બાદ યુરોપમાં સુરક્ષાને લઈને ચિંતાઓ વધી છે. યુરોપના અધિકારીઓ હવે મહત્ત્વપૂર્ણ માળખાકીય સુવિધાઓને નિશાન બનાવતા હાઇબ્રિડ ખતરાઓ અંગે વધુ સતર્ક બન્યા છે. બીજી તરફ, મોસ્કોએ આવા હુમલાઓ અથવા હાઇબ્રિડ યુદ્ધમાં પોતાની સંડોવણી હોવાનો હંમેશાં ઇનકાર કર્યો છે.

બેલ્જિયમના સેન્ટર ફોર સાઇબર સિક્યોરિટીની પ્રવક્તા કેટ્રિએન એગર્સે જણાવ્યું હતું કે હુમલા પાછળ કોણ છે તે હજુ જાણી શકાયું નથી અને કદાચ ભવિષ્યમાં પણ તેની ઓળખ ન થઈ શકે. તેમણે ચેતવણી આપી હતી કે આર્ટિફિશિયલ ઇન્ટેલિજન્સ (AI)ના વધતા ઉપયોગને કારણે IT સિસ્ટમની સુરક્ષા સામે નવા પડકારો ઊભા થયા છે અને હેકર્સ નબળાઈઓનો લાભ લેવા AIની અદ્યતન ટેક્નિકનો ઉપયોગ કરી રહ્યા છે.

રિટેલ સેક્ટર હેકર્સ માટે સરળ નિશાન કેમ?

સાઇબર સુરક્ષા નિષ્ણાતોના મતે રિટેલ સેક્ટર લાંબા સમયથી હેકર્સ માટે સરળ નિશાન રહ્યું છે. તેનું મુખ્ય કારણ એ છે કે મોટી રિટેલ ચેઇન અનેક પ્રકારની ડિજિટલ સિસ્ટમ પર નિર્ભર હોય છે. તેમાં કૂલિંગ સિસ્ટમ, બિલ્ડિંગ મેનેજમેન્ટ સિસ્ટમ અને પોઇન્ટ-ઓફ-સેલ મશીનોનો સમાવેશ થાય છે. આ તમામ સિસ્ટમના વિશાળ નેટવર્કમાં રહેલી નબળાઈઓનો હેકર્સ લાભ ઉઠાવી શકે છે.

આ હુમલામાં પ્રભાવિત થયેલી કેટલીક કૂલિંગ સિસ્ટમ ડેનિશ કંપની Danfossની ટેક્નોલોજીનો ઉપયોગ કરતી હતી. ફ્રાન્સમાં થયેલા અગાઉના હુમલામાં પણ આ જ કંપનીની ટેક્નોલોજી નિશાન બની હોવાનું જણાવાયું છે. યુરોપિયન કમિશને આ ઘટનાને ફૂડ સપ્લાય ચેઇન ખોરવવા અને ગ્રાહકોનો વિશ્વાસ તોડવાના હેતુથી કરવામાં આવેલી સુનિયોજિત પ્રવૃત્તિ ગણાવી છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

Carrefour અને SuperValuના સ્ટોર્સ પણ પ્રભાવિત

આ સાઇબર હુમલાની અસર બેલ્જિયમમાં Carrefourના 15 સ્ટોર્સ અને આયર્લેન્ડમાં SuperValuના 13 સ્ટોર્સ સુધી પહોંચી હતી. આ સ્ટોર્સને ઝડપથી બગડી શકે તેવી ખાદ્ય સામગ્રી વેચાણમાંથી દૂર કરવાની ફરજ પડી હતી.

બેલ્જિયમમાં મીટ શોપ ચલાવતા લુક ડે લેટે જણાવ્યું હતું કે સવારે લગભગ 3:30 વાગ્યે તેમના કર્મચારીએ ફોન કરીને ફ્રીઝરનું તાપમાન વધીને 18 ડિગ્રી સેલ્સિયસ થઈ ગયાની જાણ કરી હતી. આના કારણે તેમની દુકાનમાં રાખવામાં આવેલું આશરે 15,000 યુરો એટલે કે લગભગ 16 લાખ રૂપિયાનું માંસ બગડી ગયું હતું.

લુક ડે લેટે આ ઘટનાને યુરોપની અર્થવ્યવસ્થાને અસ્થિર કરવાનો પ્રયાસ ગણાવ્યો હતો. તેમણે સરકાર અને પોલીસને તાત્કાલિક પગલાં લેવા તથા આવા અદૃશ્ય સાઇબર ખતરાઓ સામે કડક સુરક્ષા વ્યવસ્થા ઊભી કરવાની અપીલ કરી હતી.

આ ઘટનાએ ફરી એકવાર સાબિત કર્યું છે કે સાઇબર હુમલા માત્ર કમ્પ્યુટર કે ડેટા સુધી મર્યાદિત નથી રહ્યા. હવે તે ખાદ્ય પુરવઠા, વેપાર અને સામાન્ય નાગરિકોના રોજિંદા જીવનને પણ સીધી અસર કરી શકે છે.

આ પણ વાંચો: નેપાળમાં મોટી દુર્ઘટના: લેન્ડિંગ સમયે બે હેલીકોપ્ટર અથડાયા, એકનું મોત