આંધ્ર પ્રદેશના દરિયાકાંઠે ‘મુરાસુ’ ચક્રવાતનો કહેર! 120 કિમીની ઝડપે પવન સાથે ત્રાટક્યું વાવાઝોડું, 32 ટ્રેનો અને 11 ફ્લાઇટ્સ રદ
Cyclone Murasu LIVE Update: બંગાળની ખાડીમાં સર્જાયેલું ગંભીર ચક્રવાતી તોફાન ‘મુરાસુ’ આંધ્ર પ્રદેશના દરિયાકાંઠે ત્રાટકતાં ભારે તબાહીનો ખતરો ઊભો થયો છે. મંગળવારે વહેલી સવારે વાવાઝોડાની લેન્ડફોલ પ્રક્રિયા શરૂ થતાં દરિયાકાંઠાના વિસ્તારોમાં ભારે પવન સાથે મુશળધાર વરસાદ શરૂ થયો છે. પવનની ઝડપ 120 કિલોમીટર પ્રતિ કલાક સુધી પહોંચતાં અનેક વિસ્તારોમાં જનજીવન અસ્તવ્યસ્ત થઈ ગયું છે. વાવાઝોડાની અસરને પગલે રેલવે અને હવાઈ સેવાઓને પણ મોટો ફટકો પડ્યો છે. આશરે 32 ટ્રેનો અને 11 ફ્લાઇટ્સ રદ કરવામાં આવી છે. બીજી તરફ, પડોશી રાજ્ય તેલંગાણામાં પણ ભારે વરસાદની આગાહીને પગલે અનેક જિલ્લાઓમાં ઓરેન્જ એલર્ટ જાહેર કરવામાં આવ્યું છે.
#WATCH | Ongole, Andhra Pradesh: Collector P. Rajababu conducted a surprise midnight inspection of the Command Control Room at the Collectorate to review ground-level preparedness for Cyclone Murasu. He directed officials to ensure the prompt clearance of fallen trees, restoration of traffic movement and immediate repair of damaged power infrastructure. He also instructed officials to restore electricity supply in Kothapatnam at the earliest and urged people to remain alert and exercise caution during the cyclone’s landfall. (02.11)
(Source: I&PR)
— ANI (@ANI) November 2, 2026
120 કિમીની ઝડપે પવન સાથે આંધ્રના દરિયાકાંઠે લેન્ડફોલ
ભારતીય હવામાન વિભાગ (IMD)ના જણાવ્યા અનુસાર, ચક્રવાત ‘મુરાસુ’ ઉત્તર-ઉત્તર-પશ્ચિમ દિશામાં આગળ વધીને દક્ષિણ આંધ્ર પ્રદેશના દરિયાકાંઠે પહોંચ્યું હતું. મંગળવારે વહેલી સવારે 3:30થી 5:30 વાગ્યાની વચ્ચે નેલ્લોર અને નરસપુર વચ્ચે ઓંગોલ નજીક વાવાઝોડાની લેન્ડફોલ પ્રક્રિયા શરૂ થઈ હતી.
આ દરમિયાન પવનની ઝડપ 100થી 110 કિલોમીટર પ્રતિ કલાક નોંધાઈ હતી, જ્યારે પવનના જોરદાર ઝાપટાં 120 કિલોમીટર પ્રતિ કલાક સુધી પહોંચ્યાં હતાં. વાવાઝોડાના આગળના ભાગમાં રહેલા વિશાળ ‘વૉલ ક્લાઉડ’નો મોટો હિસ્સો દરિયાકાંઠાના વિસ્તારોમાં પ્રવેશી ચૂક્યો હતો. ભારે પવન અને વરસાદને કારણે તટીય વિસ્તારોમાં મુશ્કેલ પરિસ્થિતિ સર્જાઈ છે.
VIDEO | Cyclone Murasu: Trees uprooted as heavy rainfall accompanied by winds lashed the Chirala region in Andhra Pradesh.
(Full video available on PTI Videos – https://t.co/d8jp61yd2p) https://t.co/kUb3sZLXoo
— Press Trust of India (@PTI_News) November 2, 2026
દરિયામાં હોડીઓ ફસાઈ, માછીમારોને દરિયો ન ખેડવાની સૂચના
ચક્રવાતની અસરને કારણે દરિયામાં ભારે ઊંચાં મોજાં ઉછળી રહ્યાં છે. સોમવારે વિશાખાપટ્ટનમના ઋષિકોંડા દરિયાકાંઠે એક બોટ મુશ્કેલીમાં ફસાઈ હોવાના અહેવાલ સામે આવ્યા હતા. નેલ્લોરમાં પણ એક બોટ ફસાઈ હતી. જોકે, બંને ઘટનાઓમાં સવાર તમામ લોકોને સુરક્ષિત રીતે બચાવી લેવામાં આવ્યા હોવાનું જાણવા મળ્યું છે.
દરિયાની સ્થિતિ જોખમી હોવાથી તંત્ર દ્વારા માછીમારોને દરિયો ન ખેડવાની કડક સૂચના આપવામાં આવી છે. દરિયાકાંઠાના વિસ્તારોમાં રહેતા લોકોને પણ સાવચેત રહેવા અને જરૂરી સુરક્ષા સૂચનાઓનું પાલન કરવા અપીલ કરવામાં આવી છે.
32 ટ્રેનો અને 11 ફ્લાઇટ્સ રદ, મુસાફરો મુશ્કેલીમાં
વાવાઝોડાની અસરને કારણે આંધ્ર પ્રદેશ અને આસપાસના વિસ્તારોમાં પરિવહન વ્યવસ્થા ખોરવાઈ છે.
- ટ્રેનો રદ: દક્ષિણ મધ્ય રેલવે અને પૂર્વ તટ રેલવે દ્વારા આશરે 32 ટ્રેનો રદ કરવામાં આવી છે. કેટલીક ટ્રેનોના રૂટમાં પણ ફેરફાર કરવામાં આવ્યો છે.
- ફ્લાઇટ્સ રદ: ચેન્નાઈ એરપોર્ટ પરથી વિજયવાડા, રાજમુંદ્રી, કડપ્પા અને તિરુચિ જતી ઇન્ડિગોની 11 ફ્લાઇટ્સ 2 નવેમ્બરે રદ કરવામાં આવી હતી.
- એરપોર્ટ પર અસર: વિજયવાડા, રાજમુંદ્રી, તિરુપતિ અને વિશાખાપટ્ટનમ એરપોર્ટ પર પણ ફ્લાઇટ ઓપરેશન ખોરવાયાં છે.
તંત્ર દ્વારા મુસાફરોને એરપોર્ટ જતાં પહેલાં સંબંધિત એરલાઇન્સની વેબસાઇટ અથવા મોબાઇલ મેસેજ દ્વારા ફ્લાઇટની સ્થિતિ તપાસવાની સલાહ આપવામાં આવી છે.
3થી 5 નવેમ્બર સુધી ઘાટ રોડ પર મુસાફરી ટાળવા ચેતવણી
ભારે વરસાદને કારણે પહાડી અને ડુંગરાળ વિસ્તારોમાં ભૂસ્ખલન થવાની શક્યતા વધી ગઈ છે. પહાડો પરથી પથ્થરો ધસી પડવા અને રસ્તાઓ પર પાણી ભરાવાના જોખમને ધ્યાનમાં રાખીને તંત્ર દ્વારા 3, 4 અને 5 નવેમ્બર દરમિયાન ઘાટ રોડ પર બિનજરૂરી મુસાફરી ટાળવા ચેતવણી આપવામાં આવી છે.
ખાસ કરીને પહાડી વિસ્તારોમાં મુસાફરી કરતા વાહનચાલકોને સાવચેતી રાખવા અને સ્થાનિક વહીવટીતંત્રની સૂચનાઓનું પાલન કરવા જણાવાયું છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
તેલંગાણાના 6 જિલ્લાઓમાં ઓરેન્જ એલર્ટ
ચક્રવાત ‘મુરાસુ’ની અસર માત્ર આંધ્ર પ્રદેશ પૂરતી મર્યાદિત નથી. પાડોશી રાજ્ય તેલંગાણામાં પણ ભારે વરસાદની સંભાવના વ્યક્ત કરવામાં આવી છે.
હવામાન વિભાગે ખમ્મમ, નલગોંડા, સૂર્યાપેટ, મહેબૂબનગર, વાનાપર્થી અને નાગરકુરનૂલ સહિતના જિલ્લાઓમાં ઓરેન્જ એલર્ટ જાહેર કર્યું છે. આ ઉપરાંત હૈદરાબાદ, રંગારેડ્ડી, મેડચલ અને વારંગલ સહિતના વિસ્તારોમાં પણ મધ્યમથી ભારે વરસાદની આગાહી કરવામાં આવી છે.
‘અર્નબ’ બાદ હવે ‘મુરાસુ’નો માર, ખેડૂતોની ચિંતા વધી
આંધ્ર પ્રદેશના ખેડૂતો માટે આ ચક્રવાત વધુ એક મોટો પડકાર બનીને આવ્યું છે. અગાઉ 28 અને 29 ઓક્ટોબર દરમિયાન આવેલા ‘અર્નબ’ ચક્રવાતના કારણે થયેલા નુકસાનમાંથી ખેડૂતો હજુ બહાર આવ્યા નથી, ત્યાં ફરી ‘મુરાસુ’ વાવાઝોડાએ મુશ્કેલી વધારી દીધી છે.
કૃષ્ણા, કાકીનાડા, શ્રીકાકુલમ, વિજયનગરમ અને પાર્વતીપુરમ મન્યમ સહિતના જિલ્લાઓમાં સતત વરસાદને કારણે ખેતીના પાકને નુકસાન થવાની ભીતિ છે.
ખાસ કરીને કૃષ્ણા જિલ્લામાં ડાંગર ઉપરાંત બાજરી, મગફળી, કપાસ, શેરડી અને બાગાયતી પાકો પર ભારે વરસાદની અસર પડી રહી છે. ખેતરોમાં પાણી ભરાવાને કારણે ખેડૂતોની ચિંતા વધી છે. જો વરસાદનું પાણી સમયસર નહીં ઓસરે અને ફરી ભારે વરસાદ પડશે તો ઉભા પાકને વ્યાપક નુકસાન થઈ શકે છે.
તંત્ર એલર્ટ મોડ પર, દરિયાકાંઠાના વિસ્તારોમાં સતર્કતા
ચક્રવાત ‘મુરાસુ’ને પગલે આંધ્ર પ્રદેશ અને તેલંગાણામાં વહીવટીતંત્ર દ્વારા સાવચેતીનાં પગલાં લેવામાં આવી રહ્યાં છે. દરિયાકાંઠાના વિસ્તારોમાં રહેતા લોકોને સુરક્ષિત સ્થળોએ રહેવા અને હવામાન વિભાગની સૂચનાઓનું પાલન કરવા અપીલ કરવામાં આવી છે.
એક તરફ ભારે પવન અને વરસાદે જનજીવન ખોરવી નાખ્યું છે, તો બીજી તરફ ટ્રેનો, ફ્લાઇટ્સ અને ખેતી પર પડેલી અસરથી લોકોની મુશ્કેલીઓ વધી છે. હવે સૌની નજર ચક્રવાતની આગળની દિશા અને તેની તીવ્રતામાં થતા ફેરફાર પર છે.
