બસ આ જ એક બાકી હતું? લો માણસોને ધોવા માટે આવી ગયું છે વૉશિંગ મશીન!

• જેમ તમે વોશિંગ મશીનમાં તમારા કપડાં ધોઈ લો છો, તેવી જ રીતે હ્યુમન વોશિંગ મશીન માનવીઓને સાફ કરવા માટે બનાવવામાં આવ્યું છે

HD ન્યુઝ ડેસ્કઃ મહાન અભિનેતા ચાર્લી ચેપ્લિનની ધ મોડર્ન ટાઈમ્સ ફિલ્મ જોઈ હશે તેમને આ સમાચાર એ ફિલ્મની યાદ અપાવશે એમાં શંકા નથી. પોતાના સમય કરતાં ઘણું આગળ જોઈ શકતા ચાર્લી ચેપ્લિને છેક 1936માં બનાવેલી આ ફિલ્મમાં એવી ઘણી કલ્પનાઓ રજૂ કરી હતી જે ત્યારપછીના દાયકાઓમાં વાસ્તવિક બની હતી. જોકે અહીં જે સમાચાર છે તેને મોડર્ન ટાઈમ્સ ફિલ્મ સાથે સીધી કોઈ લેવાદેવા નથી પરંતુ એ ફિલ્મમાં ચાર્લીએ કરેલી કેટલીક કલ્પનાઓ, જે પછીથી સાકાર થઈ તે સંદર્ભે વાત કરી છે.

જો તમને એવું કહેવામાં આવે કે હવે નહાવાના દિવસો પૂરા થઈ ગયા છે તો શું તમે માનશો? જાપાને મનુષ્યો માટે એક વોશિંગ મશીન બનાવ્યું human washing machine છે. તેનો અર્થ એ છે કે હવે તમારે સ્નાન નહીં પણ ખુદને ધોવા પડશે. જાપાન તેની અનોખી અને નવી ટેકનિકલ શોધો માટે પ્રખ્યાત રહ્યું છે. જાપાનની શોધ સાથે વ્યક્તિગત સ્વચ્છતાનું ભવિષ્ય સંપૂર્ણપણે બદલાઈ જશે. જાપાનની આ શોધનું નામ મીરાઈ નિંગેન સેન્તાકુકી એટલે કે હ્યુમન વોશિંગ મશીન છે. ચાલો આ અદ્ભુત નવા મશીન વિશે વિગતવાર જાણીએ જે ભવિષ્યમાં નહાવાની ઝંઝટને દૂર કરી શકે છે.

હ્યુમન વોશિંગ મશીન શું છે?

જેમ તમે વોશિંગ મશીનમાં તમારા કપડાં ધોઈ લો છો અને મશીન આ સમગ્ર પ્રક્રિયા આપેલા પ્રોગ્રામ હેઠળ કરે છે, તેવી જ રીતે હ્યુમન વોશિંગ મશીન માનવીઓને સાફ કરવા માટે બનાવવામાં આવ્યું છે. આ મશીન ઓસાકાની એક વિજ્ઞાન કંપની દ્વારા બનાવવામાં આવ્યું છે. આ કંપનીનો દાવો છે કે હ્યુમન વોશિંગ મશીન 15 મિનિટની પ્રક્રિયામાં શરીરને સાફ કરવાની સાથે મનને પણ આરામ આપશે. તે ખાસ કરીને એવા લોકો માટે બનાવવામાં આવ્યું છે, જેમની પાસે ઘણીવાર સ્નાન જેવી વસ્તુઓ માટે ઓછો સમય હોય છે અથવા કેટલાક એવા લોકો જે નહાવાના આળસુ હોય છે.

તે કેવી રીતે કામ કરે છે?

આ મશીન એક કેપ્સ્યુલ જેવું દેખાય છે. તેમાંથી સરળતાથી આરપાર જોઈ શકાય છે. તમે તેને એક પારદર્શક કોકપીટ પણ વિચારી શકો છો. સ્નાન કરનાર વ્યક્તિએ આ કોકપીટની અંદર આપેલી જગ્યામાં જઈને બેસવું પડે છે. આ પછી મશીન ગરમ પાણીથી અડધું ભરાઈ જાય છે અને પછી જ્યારે આ મશીન શરૂ થાય છે, ત્યારે ખાસ માઈક્રો એર બબલ્સ વાળા વોટર જેટ્સ ત્વચામાંથી ગંદકી દૂર કરી દે છે. આ મશીનની ખાસિયત એ છે કે સીટમાં ફીટ કરાયેલા ઈલેક્ટ્રોડ્સ શરીરના બાયોલોજિકલ સંકેતો વાંચીને પાણીના તાપમાન અને દબાણને આપમેળે ગોઠવી શકે છે. આવી સ્થિતિમાં આ મશીનમાંથી મળતી સ્વચ્છતા સામાન્ય સ્નાન કરતા ઘણી સારી હશે.

તે મનને શાંતિ આપશે

માનવીઓ માટે વોશિંગ મશીન બનાવતી કંપનીનો દાવો છે કે આ મશીન ફક્ત શરીરને જ નહીં, પરંતુ મનને પણ આરામ આપશે. આ મશીનમાં રહેલા AI-સજ્જ સેન્સર સ્નાન કરતી વ્યક્તિની લાગણીઓને સમજશે અને શાંત અને સુંદર દ્રશ્યો બતાવશે. તે વ્યક્તિને આરામ આપશે. આ અંગે કંપનીના ચેરમેન યાસુઆકી આઓયામા કહે છે કે “આ મશીન ફક્ત સફાઈ માટે જ નહીં, પરંતુ સુખાકારીનો અનુભવ આપવા માટે પણ ડિઝાઇન કરવામાં આવ્યું છે.

જૂના વિચારોથી પ્રેરિત

આ દુનિયાનું પહેલું માનવ વોશિંગ મશીન નથી. 1970ની શરૂઆતમાં સાન્યો ઈલેક્ટ્રિકે જાપાન વર્લ્ડ એક્સ્પોમાં પહેલું હ્યુમન વોશિંગ મશીન બનાવ્યું હતું. જોકે તે સમયે તે બજારમાં આવી શક્યું ન હતું. હવે તેનું નવું વર્ઝન આધુનિક જરૂરિયાતો અનુસાર બનાવવામાં આવ્યું છે. આ મશીન 2025માં ઓસાકા કાન્સાઈ એક્સ્પોમાં ડેબ્યૂ કરવામાં આવશે, જ્યાં 1,000 લોકો તેને અજમાવી શકશે. કંપનીનું કહેવું છે કે ભવિષ્યમાં તેને રિટાયરમેન્ટ હોમ, હોસ્પિટલો અને બિઝી પ્રોફેશનલ્સ માટે પણ લાવવાની યોજના છે. તે જ સમયે તેના એવા વર્ઝન પર પણ કામ ચાલી રહ્યું છે જેનો ઉપયોગ ઘરે પણ થઈ શકે છે.

આ પણ વાંચોઃ શ્રીકૃષ્ણને મારવા પહોંચેલી પૂતના કોણ હતી? વિષ્ણુના વામન અવતાર સાથે છે ખાસ સંબંધ