યુક્રેનને લઈને નરમ પડ્યા પુતિન: 3 વર્ષના જંગમાં પહેલીવાર સામેથી ડાયરેક્ટ વાતચીત કરવાની ઓફર આપી

મોસ્કો, 22 એપ્રિલ 2025: અમેરિકાના પ્રેશરમાં રશિયાના પ્રમુખ વ્લાદિમીર પુતિનના તેવર યુક્રેનને લઈને નરમ પડી ગયા છે. ત્રણ વર્ષના જંગ દરમ્યાન પહેલી વાર પુતિને યુક્રન સાથે સીધી વાતચીતની ઓફર આપી છે અને કહ્યું કે, તે યુદ્ધવિરામ માટે તૈયાર છે. જાણકારી અનુસાર, યુક્રેનમાં શાંતિ સ્થાપિત કરવા ઈચ્છા બતાવવા માટે અમેરિકાના પ્રેશરમાં રશિયાના રાષ્ટ્ર પ્રમુખ પુતિને સોમવારે કીવ સાથે દ્વિપક્ષીય વાર્તાનો પ્રસ્તાવ આપ્યો અને કહ્યું કે, તે એક દિવસીય ઈસ્ટર યુદ્ધવિરામ બાદ અને યુદ્ધવિરામ આગળ વધારવા માટે રાજી છે. પુતિને કહ્યું કે, કોઈ પણ શાંતિ પહેલ માટે રસ્તો ખુલ્લો છે અને કીવ પાસેથી પણ આવી જ અપેક્ષા છે.

યુક્રેનિયન પ્રતિનિધિમંડળ બુધવારે લંડન જશે

આ દરમિયાન, યુક્રેનિયન રાષ્ટ્રપતિ વોલોડીમીર ઝેલેન્સકીએ પુષ્ટિ આપી કે કિવ બુધવારે અમેરિકા અને અન્ય પશ્ચિમી દેશોને મળવા માટે લંડનમાં એક પ્રતિનિધિમંડળ મોકલી રહ્યું છે.અહીં ઉલ્લેખનિય છે કે, ગયા અઠવાડિયે પેરિસમાં એક બેઠક યોજાઈ હતી, જેમાં અમેરિકા અને યુરોપિયન દેશોએ ત્રણ વર્ષથી વધુ સમયથી ચાલી રહેલા યુદ્ધને સમાપ્ત કરવાના માર્ગો પર ચર્ચા કરી હતી.

એકબીજા પર યુદ્ધવિરામ ભંગનો આરોપ લગાવ્યો

રશિયન ટીવી રિપોર્ટર સાથે વાત કરતા પુતિને કહ્યું કે 30 કલાકના ઇસ્ટર યુદ્ધવિરામ પછી લડાઈ ફરી શરૂ થઈ છે. બંને દેશોએ એકબીજા પર પુતિનના યુદ્ધવિરામનું ઉલ્લંઘન કરવાનો આરોપ લગાવ્યો, જેને કિવે શરૂઆતથી જ એક સ્ટંટ ગણાવીને ફગાવી દીધો. રશિયાના સંરક્ષણ મંત્રાલયે રવિવારે જણાવ્યું હતું કે યુક્રેનિયન દળોએ રશિયન સ્થળો પર 444 વખત ગોળીબાર કર્યો હતો અને કહ્યું હતું કે તેણે 900 થી વધુ યુક્રેનિયન ડ્રોન હુમલાઓની ગણતરી કરી છે, જેમાં નાગરિકોના મૃત્યુ થયા છે.

વોશિંગ્ટને કહ્યું કે તે યુદ્ધવિરામ લંબાવવાનું સ્વાગત કરશે. લંડન મંત્રણામાં યુક્રેનિયન પ્રતિનિધિમંડળની જાહેરાત કરતી X પરની તેમની ટિપ્પણીમાં, ઝેલેન્સકીએ દ્વિપક્ષીય મંત્રણા પર પુતિનની ટિપ્પણીનો જવાબ આપ્યો ન હતો. સોમવારે શરૂઆતમાં, ઝેલેન્સકીએ કહ્યું હતું કે તેમણે રશિયન સૈન્યની કાર્યવાહીનો જવાબ આપવા માટે દળોને સૂચના આપી છે.

આ પણ વાંચો: ભારતે સ્ટીલ પર લગાવી 12 ટકા હંગામી ટેરિફ, 200 દિવસ સુધી રહેશે લાગુ