વંદે ભારત એક્સપ્રેસ મોટી હોનારતમાંથી બચી: રેલવે ટ્રેક પર ચઢી ગઈ ઓટો રિક્ષા, લોકો પાયલટની સતર્કતાથી બચ્યા હજારો જીવ

કેરળઃ 24 ડિસેમ્બર, 2025: કેરળના તિરુવનંતપુરમ જિલ્લામાં અકાથુમુરી હાલ્ટ સ્ટેશન પાસે એક મોટી રેલ દુર્ઘટના ટળી છે. ટ્રેક પર અચાનક એક ઓટો રિક્ષા આવી જવા છતાં લોકો પાયલટની સમયસૂચકતાને કારણે હાઈ-સ્પીડ વંદે ભારત એક્સપ્રેસ ટ્રેન સુરક્ષિત રીતે રોકાઈ ગઈ હતી.

મધરાતે સર્જાઈ કટોકટીની સ્થિતિ

મળતી માહિતી મુજબ, કાસરગોડથી તિરુવનંતપુરમ જતી ટ્રેન નંબર 20633 મંગળવારે રાત્રે આશરે 10:10 વાગ્યે વર્કલા-કડાક્કાવુર સેક્શનમાંથી પસાર થઈ રહી હતી. લોકો પાયલટે જોયું કે ડાઉન લાઇન ટ્રેક પર એક ઓટો રિક્ષા લાવારિસ હાલતમાં પડી છે. પાયલટે વિલંબ કર્યા વગર ઈમરજન્સી બ્રેક લગાવી દીધી, જેના કારણે ટ્રેન રિક્ષા સાથે અથડાતા બચી ગઈ.

નશામાં ધૂત ડ્રાઈવરે સર્જ્યો હોબાળો

રેલવે સુરક્ષા દળ (RPF) અને સ્થાનિક પોલીસે ઘટનાસ્થળે પહોંચી તપાસ કરી ત્યારે જાણવા મળ્યું કે, રિક્ષામાં કોઈ મુસાફર કે ડ્રાઈવર હાજર નહોતા. તપાસ બાદ પોલીસે ઓટો રિક્ષાના ડ્રાઈવર સુધીની ધરપકડ કરી છે. પ્રાથમિક તપાસમાં બહાર આવ્યું છે કે ડ્રાઇવર દારૂના નશામાં હતો અને તે રિક્ષા ટ્રેક પર મૂકીને ભાગી ગયો હતો.

ટ્રેન વ્યવહાર પર અસર

ટ્રેક પરથી વાહન હટાવવાની પ્રક્રિયાને કારણે ટ્રેન લગભગ એક કલાક સુધી રોકાઈ રહી હતી. રાત્રે 11:15 વાગ્યે ટ્રેન ફરી રવાના થઈ. વિલંબ હોવા છતાં ટ્રેન રાત્રે 11:50 વાગ્યે તિરુવનંતપુરમ સેન્ટ્રલ પહોંચી હતી. સદનસીબે, આ ઘટનામાં કોઈ મુસાફર કે રેલવે કર્મચારીને ઈજા થઈ નથી.

રેલવે અધિકારીઓએ લોકો પાયલટની પ્રશંસા કરતા જણાવ્યું કે જો બ્રેક લગાવવામાં સેકન્ડની પણ વાર લાગી હોત, તો મોટી જાનહાનિ થઈ શકી હોત.