TRAI Report: ભારતમાં મોબાઇલ અને ઇન્ટરનેટ સેવાઓની પહોંચ સતત નવી ઊંચાઈઓ સર કરી રહી છે. ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI) દ્વારા જારી કરવામાં આવેલા જૂન, 2026 ના ટેલિકોમ સબ્સ્ક્રિપ્શન રિપોર્ટ અનુસાર, દેશમાં ટેલિફોન સબ્સ્ક્રાઇબર્સની કુલ સંખ્યા મે મહિનામાં 1.343 અબજથી વધીને જૂન મહિનાના અંત સુધીમાં 1.348 અબજ પર પહોંચી ગઈ છે. આ આંકડા સ્પષ્ટ કરે છે કે માત્ર એક જ મહિનામાં લાખો નવા ગ્રાહકો દેશના ટેલિકોમ નેટવર્ક સાથે સત્તાવાર રીતે જોડાયા છે.

ગ્રામીણ-શહેરી વિસ્તારોમાં વિસ્તરણ

દેશમાં પ્રતિ 100 લોકો દીઠ ટેલિફોન કનેક્શનની ઉપલબ્ધતા દર્શાવતી ટેલિ-ડેન્સિટીમાં પણ સારો એવો વધારો નોંધાયો છે. જૂન મહિનાના અંત સુધીમાં આ પ્રમાણ વધીને 94.31% થઈ ગયું છે, જે અગાઉ મે મહિનામાં 94.02% હતું. ટ્રાઈના ડેટા મુજબ, શહેરી વિસ્તારોમાં ટેલિફોન સબ્સ્ક્રાઇબર્સ વધીને 792.0 મિલિયન થયા છે, જ્યારે ગ્રામીણ ભારતમાં પણ આંકડો વધીને 556.0 મિલિયન પર પહોંચ્યો છે, જે સાબિત કરે છે કે અંતરિયાળ વિસ્તારોમાં પણ કનેક્ટિવિટી મજબૂત થઈ રહી છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

બ્રોડબેન્ડ અને વાયરલેસ કનેક્શનમાં રેકોર્ડબ્રેક વધારો

ઝડપી ઇન્ટરનેટની વધતી જતી માંગને કારણે બ્રોડબેન્ડ સબ્સ્ક્રાઇબર્સની સંખ્યામાં પણ નવો સીમાચિહ્ન સર થયો છે. જૂન મહિનાના અંત સુધીમાં દેશમાં કુલ બ્રોડબેન્ડ કનેક્શન વધીને 1.087 અબજ થઈ ગયા છે. આ ઉપરાંત, મોબાઇલ અને ફિક્સ્ડ વાયરલેસ એક્સેસ (FWA) સહિત કુલ વાયરલેસ સબ્સ્ક્રાઇબર્સ મે મહિનાના 1.29 અબજથી વધીને જૂનમાં 1.3 અબજ થઈ ગયા છે, જેમાં માસિક 0.45% નો વધારો જોવા મળ્યો છે. મોબાઇલ વાયરલેસ સબ્સ્ક્રાઇબર્સની સંખ્યા વધીને 1.282 અબજ થઈ ગઈ છે.

ખાનગી કંપનીઓનું પ્રભુત્વ

ભારતીય મોબાઇલ માર્કેટમાં ખાનગી ટેલિકોમ કંપનીઓનું પ્રભુત્વ યથાવત છે અને કુલ મોબાઇલ સબ્સ્ક્રાઇબર્સમાં તેમનો હિસ્સો 92.73% છે, જ્યારે સરકારી કંપનીઓ BSNL અને MTNL નો સંયુક્ત હિસ્સો 7.27% રહ્યો છે. આ સાથે જ 5G ફિક્સ્ડ વાયરલેસ એક્સેસ (FWA) ના સબ્સ્ક્રાઇબર્સ વધીને 12.9 મિલિયન પર પહોંચી ગયા છે, જેમાં ગ્રામીણ વપરાશકર્તાઓનું પ્રમાણ નોંધપાત્ર રહ્યું છે. બીજી તરફ, ગ્રાહકો દ્વારા ઓપરેટર બદલવા માટે મોબાઇલ નંબર પોર્ટેબિલિટી (MNP) હેઠળ જૂન મહિનામાં કુલ 14.7 મિલિયન અરજીઓ કરવામાં આવી હતી.

આ પણ વાંચો: સ્માર્ટફોનની આ 10 સેટિંગ્સ અત્યારે જ બદલી લો, નહીંતર દરરોજ લીક થતો રહેશે તમારો ડેટા