Anthropic Claude AI Personal Finance Feature: જેમ જેમ આર્ટિફિશિયલ ઇન્ટેલિજન્સ (AI) ના સાધનો આપણા રોજિંદા જીવનનો એક અવિભાજ્ય ભાગ બની રહ્યા છે, તેમ તેમ તેમની કામ કરવાની ક્ષમતાઓ પણ ઝડપથી વિસ્તરી રહી છે. અત્યાર સુધી એઆઈ માત્ર ટેક્સ્ટ ટાઇપ કરવા, કોડિંગ કરવા કે નવી ઇમેજ બનાવવા સુધી સીમિત હતું, પરંતુ હવે તે તમને તમારા બેંક એકાઉન્ટ્સ અને વ્યક્તિગત નાણાકીય બાબતોનું સંચાલન કરવામાં પણ સીધી મદદ કરશે. આર્ટિફિશિયલ ઇન્ટેલિજન્સ ક્ષેત્રની જાણીતી કંપની એન્થ્રોપિક દ્વારા તેના શક્તિશાળી AI મોડેલ ક્લાઉડમાં ‘પર્સનલ ફાઇનાન્સ’ નામની એક અત્યાધુનિક સુવિધા રજૂ કરવામાં આવી છે. આ નવી સુવિધા દ્વારા યુઝર્સ પોતાના બેંક એકાઉન્ટ્સ અને ક્રેડિટ કાર્ડ્સને સીધા ક્લાઉડ AI સાથે સત્તાવાર રીતે કનેક્ટ કરી શકશે, જેનાથી એઆઈ ખર્ચ ટ્રેક કરવા, ખર્ચ પેટર્નનું વિશ્લેષણ કરવા અને યોગ્ય નાણાકીય સલાહ આપવામાં સહાયક બનશે.

હવે AI જણાવશે પૈસા ક્યાં અને કેટલા ખર્ચાઈ રહ્યા છે

ક્લાઉડ એઆઈમાં ઉમેરવામાં આવેલું આ નવું ફિચર યુઝર્સને તેમના બેંક એકાઉન્ટ અને ક્રેડિટ કાર્ડની મહત્વપૂર્ણ માહિતીને સીધી ક્લાઉડ સિસ્ટમ સાથે લિંક કરવાની મંજૂરી આપે છે. આ કનેક્ટિવિટી બાદ AI આપમેળે બેંક સ્ટેટમેન્ટ વાંચી શકે છે, દૈનિક કે માસિક ખર્ચાઓને ટ્રેક કરી શકે છે અને તેનું વર્ગીકરણ કરી શકે છે. કંપનીનો દાવો છે કે આ ટૂલ લોન અને તેના વ્યાજની જટિલ ગણતરી કરવામાં પણ મદદ કરશે. એન્થ્રોપિકના જણાવ્યા મુજબ, ક્લાઉડ પોતાના યુઝર્સને બેલેન્સ અને વ્યવહારો અંગે એકદમ બોલચાલની સરળ ભાષામાં માહિતી પૂરી પાડશે. જો કોઈ બેંકિંગ કે નાણાકીય શબ્દ સમજવામાં અઘરો હોય, તો AI તેને અત્યંત સરળ શબ્દોમાં સમજાવી દેશે.

પ્લેઇડ પ્લેટફોર્મ દ્વારા સુરક્ષિત કનેક્શન

આ સુવિધાનો લાભ લેવા માટે યુઝર્સે ‘પ્લેઇડ’ (Plaid) નામના સુરક્ષિત નાણાકીય ટેકનોલોજી પ્લેટફોર્મનો ઉપયોગ કરીને પોતાના બેંક અથવા ક્રેડિટ કાર્ડ એકાઉન્ટ્સને ક્લાઉડ એઆઈ સાથે લિંક કરવા પડશે. કનેક્શન પૂર્ણ થયા બાદ એઆઈ માત્ર યુઝર દ્વારા પસંદ કરાયેલા ખાતાઓનો જ ડેટા ઍક્સેસ કરી શકશે. એકવાર ખાતું કનેક્ટ થઈ જાય પછી ક્લાઉડ બેંકનું નામ, ખાતાનો પ્રકાર, ખાતા નંબરના છેલ્લા 4 અંક, ઉપલબ્ધ બેલેન્સ, ક્રેડિટ લિમિટ અને છેલ્લા 2 વર્ષનો વ્યવહાર ઇતિહાસ (Transaction History) જોઈ શકે છે. કંપનીનું કહેવું છે કે યુઝર્સે તેમનો બેંકિંગ પાસવર્ડ AI સાથે શેર કરવાની જરૂર નથી. એકાઉન્ટ લિંક કર્યા પછી, યુઝર્સ “પર્સનલ ફાઇનાન્સ હબ” માં પ્રશ્નો પૂછી શકે છે, જેમ કે “મેં આ મહિને કેટલો ખર્ચ કર્યો?” અને ક્લાઉડ અલગ-અલગ ખાતાઓમાંથી વિગતો મેળવીને ખર્ચનું આખું વિભાજન (Breakdown) રજૂ કરશે.

મુસાફરી કે ખરીદી અગાઉ ફાઇનાન્શિયલ પરિસ્થિતિ અંગે મેળવી શકાશે સલાહ

વધુમાં, આ એઆઈ સિસ્ટમ યુઝરની ખર્ચ કરવાની ટેવો અને પેટર્નનું પણ ઊંડાણપૂર્વક વિશ્લેષણ કરી શકે છે. ઉદાહરણ તરીકે, જો કોઈ યુઝર વેકેશન કે પ્રવાસનું આયોજન કરી રહ્યો હોય, તો તેઓ ક્લાઉડને પૂછી શકે છે કે શું તેમની વર્તમાન નાણાકીય પરિસ્થિતિ અને બજેટને ધ્યાનમાં રાખીને પ્રવાસ પાછળ પૈસા ખર્ચવા એ યોગ્ય નિર્ણય છે કે નહીં. આAI સિસ્ટમ ઉપલબ્ધ બેલેન્સ અને ભવિષ્યના ખર્ચાઓને ધ્યાન પર રાખીને યોગ્ય સલાહ આપશે.

AI ખાતામાંથી કોઈ ટ્રાન્સફર કે વ્યવહાર કરી શકશે નહીં

આ મહત્વપૂર્ણ સુવિધા અમુક ચોક્કસ મર્યાદાઓ સાથે જ કામ કરે છે. તે યુઝર્સના ખાતામાંથી કોઈ નાણાકીય વ્યવહાર કરવાનો અધિકાર આપતી નથી, પરંતુ તે સંપૂર્ણપણે “રીડ-ઓન્લી” ફિચર છે. આનો અર્થ એ થયો કે AI બેંક બેલેન્સ, સ્ટેટમેન્ટ્સ અને ખર્ચ જોઈ કે વાંચી શકે છે, પરંતુ તે યુઝર વતી કોઈ પેમેન્ટ કે બિલ ચુકવણી કરી શકતું નથી. તે નાણાં ટ્રાન્સફર કરવા કે અન્ય વ્યવહારો કરવા માટે સક્ષમ નથી. તેનો મુખ્ય હેતુ યુઝર્સને પોતાની આર્થિક પરિસ્થિતિ વધુ સારી રીતે સમજવામાં મદદ કરવાનો છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

અમેરિકામાં બીટા વર્ઝન તરીકે લોન્ચ

એન્થ્રોપિક હાલમાં આ પર્સનલ ફાઇનાન્સ ફિચરને માત્ર અમેરિકા (US) માં બીટા વર્ઝન તરીકે ઓફર કરી રહ્યું છે. આ સુવિધા હાલમાં માત્ર ક્લાઉડ પ્રો (Claude Pro), મેક્સ (Max) અને અલ્ટ્રા (Ultra) પ્લાન ધરાવતા પેઇડ સબ્સ્ક્રાઇબર્સ માટે જ ઉપલબ્ધ કરાવવામાં આવી છે. આનો અર્થ એ થયો કે હાલમાં તમામ સામાન્ય ક્લાઉડ યુઝર્સ તેનો ઉપયોગ કરી શકશે નહીં, પરંતુ આગામી સમયમાં તેનો વ્યાપ અન્ય દેશો અને તમામ યુઝર્સ માટે વધારવામાં આવશે.

આ પણ વાંચો: ઇન્ટરનેટ વિના ચાલશે AI! ભારતે લોન્ચ કર્યાં 3 સ્વદેશી મોડલ