સુપ્રીમ કોર્ટનો મોટો નિર્ણય: પેન્શનરોને કર્મચારીઓ જેટલું જ મોંઘવારી ભથ્થું આપવું પડશે

Supreme Court: સુપ્રીમ કોર્ટે પેન્શનરો અને સરકારી કર્મચારીઓ વચ્ચેના ભેદભાવને દૂર કરતા એક મોટો ચુકાદો આપ્યો છે. જસ્ટિસ મનોજ મિશ્રા અને જસ્ટિસ પ્રસન્ના બી. વરાલેની બેન્ચે સ્પષ્ટ કર્યું છે કે રાજ્ય સરકારો પેન્શનરોને અપાતી મોંઘવારી રાહત (DR) નો દર, કાર્યરત કર્મચારીઓના મોંઘવારી ભથ્થા (DA) કરતા ઓછો રાખી શકે નહીં.

સમાન મોંઘવારી, સમાન લાભ

‘કેરળ સરકાર વિરુદ્ધ એમ. વિજયકુમાર’ કેસની સુનાવણી દરમિયાન કોર્ટે નોંધ્યું હતું કે, કાર્યરત કર્મચારીઓને 14% અને પેન્શનરોને માત્ર 11% મોંઘવારી રાહત આપવી એ બંધારણની કલમ 14 (સમાનતાનો અધિકાર) નું ઉલ્લંઘન છે. કોર્ટે તાર્કિક દલીલ કરતા કહ્યું કે, મોંઘવારી કર્મચારી અને પેન્શનર બંનેને એકસરખી રીતે અસર કરે છે. વધતી કિંમતો સામે રક્ષણ મેળવવાનો હેતુ બંને માટે સમાન છે. આર્થિક તંગીનું બહાનું બતાવીને બે સમાન રીતે અસરગ્રસ્ત જૂથો વચ્ચે ભેદભાવ કરી શકાય નહીં.

નાણાકીય સ્થિતિનું બહાનું નહીં ચાલે

કેરળ સ્ટેટ ટ્રાન્સપોર્ટ કોર્પોરેશન (KSRTC) એ દલીલ કરી હતી કે તેમની નાણાકીય સ્થિતિ નબળી હોવાથી પેન્શનરોને ઓછો વધારો આપવામાં આવ્યો હતો. જોકે, સુપ્રીમ કોર્ટે આ દલીલ ફગાવી દેતા કહ્યું કે, આર્થિક મુશ્કેલીઓ ચુકવણીમાં વિલંબનું કારણ હોઈ શકે છે, પરંતુ તે ભેદભાવ કરવાનું બહાનું બની શકે નહીં.

લાખો પેન્શનરો માટે રક્ષણ

સુપ્રીમ કોર્ટે કેરળ હાઈકોર્ટના ચુકાદાને માન્ય રાખતા રાજ્ય સરકારની અપીલ રદ કરી છે. આ ચુકાદો સમગ્ર દેશના પેન્શનરો માટે સુરક્ષા કવચ સમાન છે, કારણ કે હવે કોઈપણ રાજ્ય સરકાર પગાર સુધારણા કે મોંઘવારી ભથ્થાની જાહેરાત વખતે પેન્શનરો સાથે અન્યાય કરી શકશે નહીં.

આ પણ વાંચોઃ IPL 2026: વિરાટ કોહલીનો ‘નાગિન ડાન્સ’ વાયરલ, 15 વર્ષના વૈભવે RCB પાસેથી જીત છીનવી

આ પણ વાંચોઃ ઈરાનમાં દુનિયાનું સૌથી મોટું નેટવર્ક શટડાઉન, 1000 કલાકથી ઈન્ટરનેટ બંધ

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X