દેશમાં વધતા માર્ગ અકસ્માતો પર સુપ્રીમ કોર્ટ કડક, જાણો કયા નવા નિયમો અમલમાં મૂકવાના આદેશ આપ્યા

Road Safety India: દેશમાં સતત વધી રહેલા માર્ગ અકસ્માતો અંગે સુપ્રીમ કોર્ટે એક મોટો અને કડક ચુકાદો આપ્યો છે. કોર્ટે સ્પષ્ટપણે કહ્યું છે કે રાષ્ટ્રીય હાઇવે પર બેદરકારી કોઈપણ સંજોગોમાં સહન કરવામાં આવશે નહીં. કોર્ટે એ પણ સ્વીકાર્યું કે સલામત માર્ગ મુસાફરી એ દરેક નાગરિકનો અધિકાર છે અને આ સુનિશ્ચિત કરવાની સરકારની જવાબદારી છે. નવેમ્બર 2025 માં રાજસ્થાન અને તેલંગાણામાં થયેલા બે ભયાનક માર્ગ અકસ્માતોમાં 34 લોકોના મોત થયા બાદ આ મુદ્દો સામે આવ્યો હતો. આ ઘટનાઓ બાદ, સુપ્રીમ કોર્ટે સંજ્ઞાન લીધું અને સમગ્ર દેશ માટે મહત્વપૂર્ણ નિર્દેશો જારી કર્યા.

નેશનલ હાઇવે પર ગમે ત્યાં પાર્કિંગ કરવા પર સંપૂર્ણપણે પ્રતિબંધ

કોર્ટના આદેશ મુજબ, હવે નેશનલ હાઇવે પર ગમે ત્યાં પાર્કિંગ કરવા પર સંપૂર્ણપણે પ્રતિબંધ રહેશે. વાહનો ફક્ત નિયુક્ત પાર્કિંગ વિસ્તારોમાં જ પાર્ક કરવામાં આવશે. ઉલ્લંઘન કરનારાઓને કેમેરા અને GPS ટ્રેકિંગ દ્વારા દંડ કરવામાં આવશે. હાઇવે પર ગેરકાયદેસર ખાણીપીણી, દુકાનો અને અન્ય અતિક્રમણો દૂર કરવા માટે પણ સૂચનાઓ આપવામાં આવી છે. નવા બાંધકામનું કામ તાત્કાલિક બંધ કરવાનો પણ આદેશ આપવામાં આવ્યો છે. સુપ્રીમ કોર્ટે દરેક જિલ્લામાં ‘હાઇવે સેફ્ટી ટાસ્ક ફોર્સ’ બનાવવાનો આદેશ આપ્યો છે, જેમાં વહીવટ, પોલીસ અને NHAI ના અધિકારીઓનો સમાવેશ થાય છે. આ ટીમ નિયમિતપણે હાઇવેની દેખરેખ રાખશે.

દર 75 કિલોમીટરે એમ્બ્યુલન્સ અને ક્રેન તૈનાત કરવાના નિર્દેશો

માર્ગ અકસ્માત બાદ તાત્કાલિક મદદ પહોંચે તે માટે કોર્ટે દર 75 કિલોમીટર પર એમ્બ્યુલન્સ અને ક્રેન તૈનાત કરવાનો આદેશ આપ્યો છે. ઉપરાંત, જ્યાં વારંવાર અકસ્માત થાય છે એવા ‘બ્લેકસ્પોટ્સ’ની ઓળખ કરીને ત્યાં વધુ સારી લાઇટિંગ, કેમેરા અને ચેતવણી બોર્ડ લગાવવા આદેશો આપવામાં આવ્યા છે. સુપ્રીમ કોર્ટે એ પણ ચિંતા વ્યક્ત કરી હતી કે દેશના કુલ રોડ નેટવર્કમાં નેશનલ હાઇવેનો હિસ્સો માત્ર 2 ટકા છે, છતાં અહીં લગભગ 30 ટકા માર્ગ અકસ્માત થાય છે, જે ગંભીર પરિસ્થિતિ દર્શાવે છે. કોર્ટે તમામ સંબંધિત એજન્સીઓને 75 દિવસની અંદર આ અંગે વિગતવાર અહેવાલ રજૂ કરવાનો આદેશ આપ્યો છે.

આ પણ વાંચો: મહિલા અનામત બિલ: 30 વર્ષથી ચાલતો ‘ગ્રહણ’ યથાવત, 7મી વખત મિશન નિષ્ફળ