સુપ્રીમ કોર્ટે સમય રૈનાને 10 લાખનો દંડ ફટકાર્યો, રણવીર અલ્હાબાદિયાને પણ લગાવી ફટકાર

Entertainment News: ‘ઇન્ડિયાઝ ગોટ લેટન્ટ’ વિવાદ મામલે સુપ્રીમ કોર્ટે કોમેડિયન સમય રૈના અને યુટ્યુબર રણવીર અલ્હાબાદિયા સામે કડક વલણ અપનાવ્યું છે. મંગળવારે થયેલી સુનાવણી દરમિયાન સુપ્રીમ કોર્ટે સમય રૈનાને કોર્ટના આદેશોનું પાલન ન કરવા બદલ ફટકાર લગાવતા 10 લાખ રૂપિયાનો દંડ ફટકાર્યો છે.
સુપ્રીમ કોર્ટે કહ્યું કે સમય રૈનાએ કોર્ટ સમક્ષ ખોટી માહિતી રજૂ કરી હતી અને ન્યાયિક પ્રક્રિયાને ગેરમાર્ગે દોરવાનો પ્રયાસ કર્યો હતો. કોર્ટે નારાજગી વ્યક્ત કરતા જણાવ્યું કે તેમણે અદાલતને ગંભીરતાથી લીધી નથી અને અગાઉના આદેશોનું ઉલ્લંઘન કર્યું છે.
કોર્ટે સમય રૈનાને આદેશ આપ્યો છે કે તેઓ બે અઠવાડિયાની અંદર 10 લાખ રૂપિયાની દંડની રકમ જમા કરાવે. સુનાવણી દરમિયાન બેન્ચે કહ્યું કે કોર્ટના આદેશોનું ખુલ્લેઆમ પાલન ન કરવું ગંભીર બાબત છે.
આ મામલાની સુનાવણી મુખ્ય ન્યાયાધીશ સૂર્યકાંત, ન્યાયમૂર્તિ જોયમાલ્યા બાગચી અને ન્યાયમૂર્તિ વી. મોહનની બેન્ચ દ્વારા કરવામાં આવી હતી. સુપ્રીમ કોર્ટમાં યુટ્યુબર રણવીર અલ્હાબાદિયા, આકાશ ચંચલાની અને ક્યોર SMA ફાઉન્ડેશન દ્વારા દાખલ કરાયેલી અરજીઓ પર સુનાવણી ચાલી રહી હતી.
દેશના યુવાનો પાસે અનેક આદર્શ વ્યક્તિઓ
સુનાવણી દરમિયાન વરિષ્ઠ વકીલ અપરાજિતા સિંહે સમય રૈનાના વલણ પર સવાલ ઉઠાવતા કહ્યું કે તેઓ સતત શો કરી રહ્યા છે, પરંતુ કોર્ટના આદેશ છતાં તેમણે SMA ફાઉન્ડેશન અથવા સ્પાઇનલ મસ્ક્યુલર એટ્રોફી (SMA)થી પીડિત લોકો સાથે કોઈ સંપર્ક કર્યો નથી. આ મામલે સોલિસિટર જનરલ તુષાર મહેતાએ પણ ટિપ્પણી કરતા કહ્યું કે દેશના યુવાનો પાસે આ પ્રકારના લોકો કરતાં ઘણા સારા આદર્શ વ્યક્તિઓ છે.
‘ઇન્ડિયાઝ ગોટ લેટન્ટ’ શોમાં થયેલી વિવાદાસ્પદ ટિપ્પણીઓ બાદ આ મામલો સુપ્રીમ કોર્ટ સુધી પહોંચ્યો હતો. હવે કોર્ટના કડક વલણ બાદ સમય રૈના અને રણવીર અલ્હાબાદિયા માટે મુશ્કેલીઓ વધી શકે છે.












