ટ્રેન્ડિંગનેશનલ

‘મારા ચહેરા અને અવાજનો દુરુપયોગ થઈ રહ્યો છે… આ બધું નકલી છે,’ રાજ્યસભા સાંસદ સુધા મૂર્તિએ ડીપફેક વીડિયો પર કહ્યું

રાજ્યસભા સાંસદ સુધા મૂર્તિ આજકાલ એક અલગ જ કારણે ચર્ચામાં છે. તેમના ચહેરા અને અવાજનો ઉપયોગ કરીને બનાવવામાં આવેલા ડીપફેક વીડિયો સોશિયલ મીડિયા પર વાયરલ થઈ રહ્યા છે. આ વીડિયોમાં તેમને એવું બતાવવામાં આવે છે કે જાણે તેઓ કોઈ રોકાણ યોજનાની ભલામણ કરી રહ્યા હોય, જેમાં થોડા પૈસા રોકીને મોટી કમાણી કરી શકાય. પરંતુ સુધા મૂર્તિએ આ તમામ વીડિયોને સંપૂર્ણપણે નકલી અને છેતરપિંડીનો ભાગ ગણાવ્યા છે.

આ વર્ષે, ખાસ કરીને 2025માં, આવા અનેક વીડિયો વાયરલ થયા છે. એક વીડિયોમાં સુધા મૂર્તિને ‘ક્વોન્ટમ એઆઈ’ નામની એક કથિત રોકાણ પ્લેટફોર્મની પ્રમોટ કરતા બતાવવામાં આવ્યા હતા, જ્યાં માત્ર 21,000 રૂપિયા રોકીને લાખો કમાવી શકાય તેવા વાયદા કરવામાં આવ્યા હતા. પરંતુ તપાસમાં જાણવા મળ્યું કે આ વીડિયો 2021ના એક પોડકાસ્ટમાંથી લેવામાં આવેલા વિઝ્યુઅલ્સ પર આધારિત છે, જેમાં AI-જનરેટેડ ઑડિયો ઉમેરીને બનાવવામાં આવ્યો હતો.

આ બધું નકલી છે…

સુધા મૂર્તિએ તાજેતરમાં દિલ્હીમાં આ અંગે વાત કરતા કહ્યું, “આ બધું નકલી છે. આ AI અને તેની પાછળના ચાલાક મગજની રમત છે. હું રોકાણકારોને કહેવા માંગુ છું કે હું ક્યારેય રોકાણ વિશે વાત કરતી નથી. જો તમે મારું નામ, ચહેરો કે અવાજ કોઈ રોકાણ યોજના સાથે જોડાયેલું જુઓ, તો તે ફેક છે.” મૂર્તિએ કહ્યું કે આ મામલો સોશિયલ મીડિયા પર ખોટી માહિતી ફેલાવનારા વ્યક્તિઓનો છે, જે સામાન્ય લોકોના મહેનતથી કમાયેલા પૈસાને નિશાન બનાવે છે. તેમણે નાગરિકોને આવા વીડિયો પર વિશ્વાસ ન કરવા અને પોતાની સુરક્ષાને પ્રાથમિકતા આપવા વિનંતી કરી.

સુધા મૂર્તિએ લોકોને અપીલ કરી છે કે કોઈપણ રોકાણ કરતા પહેલા વિશ્વસનીય બેંક કે નાણાકીય સંસ્થા પાસેથી માહિતી મેળવો. “તમારા પૈસાની સુરક્ષા તમારા હાથમાં છે,” તેમણે કહ્યું. આ ઘટના AI ટેક્નોલોજીના દુરુપયોગનું એક ઉદાહરણ છે.

આ પણ વાંચો: શિયાળુ સત્ર સ્થગિત, શાસક અને વિપક્ષી સાંસદોએ સાથે ચા પીધી… આ ‘ચા કેમિસ્ટ્રી’ પાછળનું કારણ શું ?

Back to top button