India Squad Announced for West Indies ODI Series: ભારતીય ક્રિકેટ કંટ્રોલ બોર્ડ (BCCI) એ આગામી વેસ્ટ ઇન્ડીઝ સામેની ઘરેલુ ODI શ્રેણી માટે 15 સભ્યોની ભારતીય ટીમની જાહેરાત કરી દીધી છે. આ શ્રેણીમાં 9 જેટલા સ્ટાર ભારતીય ખેલાડીઓની બિનઅનુભવતા અને ગેરહાજરીના કારણે ટીમમાં કેટલાક આશ્ચર્યજનક ચહેરાઓ જોવા મળ્યા છે. પસંદગી સમિતિએ યુવા ઓલરાઉન્ડર નમન ધીર અને ફાસ્ટ બોલર આકિબ નબી ડારને પ્રથમ વખત ભારતીય ODI ટીમમાં સ્થાન આપીને તક પૂરી પાડી છે.

કેએલ રાહુલને વાઇસ કેપ્ટનશીપની જવાબદારી

શ્રેયસ ઐયર 2026 એશિયન ગેમ્સમાં ભારતીય ટીમનું નેતૃત્વ કરવાના હોવાથી આ શ્રેણી માટે ઉપલબ્ધ રહેશે નહીં. તેમની ગેરહાજરીમાં અનુભવી વિકેટકીપર-બેટ્સમેન કેએલ રાહુલને વેસ્ટ ઇન્ડીઝ સામેની ODI શ્રેણી માટે ભારતીય ટીમના વાઇસ કેપ્ટન તરીકે નિયુક્ત કરવામાં આવ્યા છે.

27 સપ્ટેમ્બરથી શરૂ થશે 3 મેચોની ODI શ્રેણી

વેસ્ટ ઈન્ડિઝની ટીમ ભારત પ્રવાસે 3 ODI અને 5 T20 મેચોની શ્રેણી રમવા માટે આવી રહી છે. ODI શ્રેણીનો પ્રારંભ 27 સપ્ટેમ્બરના રોજ તિરુવનંતપુરમ ખાતે રમાનારી પહેલી મેચથી થશે. ત્યારબાદ બીજી ODI 30 સપ્ટેમ્બરે ગુવાહાટીમાં અને ત્રીજી તથા અંતિમ ODI 3 ઓક્ટોબરના રોજ નવા ચંદીગઢ સ્થિત મુલ્લાનપુર સ્ટેડિયમમાં યોજાશે.

4 ફાસ્ટ બોલરો અને 2 અનુભવી સ્પિનરોની પસંદગી

ટીમમાં ફાસ્ટ બોલિંગ આક્રમણને મજબૂત કરવા માટે પ્રસિદ્ધ કૃષ્ણા, ગુરનુર બ્રાર, મોહમ્મદ સિરાજ અને આકિબ નબી ડાર જેવા 4 ફાસ્ટ બોલરોનો સમાવેશ કરાયો છે. સ્પિન વિભાગની જવાબદારી કુલદીપ યાદવ અને રવિન્દ્ર જાડેજાના અનુભવી ખભા પર રહેશે. ધ્રુવ જુરેલને રિઝર્વ વિકેટકીપર તરીકે પસંદ કરવામાં આવ્યા છે, જ્યારે એશિયન ગેમ્સ T20 ટીમનો હિસ્સો રહેલા નીતિશ કુમાર રેડ્ડીને પણ આ ODI ટીમમાં સ્થાન મળ્યું છે.

15 સભ્યોની ભારતીય ટીમ

શુભમન ગિલ (કેપ્ટન), કેએલ રાહુલ (વાઇસ-કેપ્ટન/વિકેટકીપર), રોહિત શર્મા, વિરાટ કોહલી, રુતુરાજ ગાયકવાડ, યશસ્વી જયસ્વાલ, નમન ધીર, ધ્રુવ જુરેલ (રિઝર્વ વિકેટકીપર), નીતિશ કુમાર રેડ્ડી, રવિન્દ્ર જાડેજા, કુલદીપ યાદવ, પ્રસિદ્ધ કૃષ્ણા, મોહમ્મદ સિરાજ, ગુરનુર બ્રાર અને આકિબ નબી ડાર.

આ પણ વાંચો: સિરીઝ જીત્યા બાદ શ્રેયસ અય્યરે ટીમનું ટેન્શન કેમ વધાર્યું?