સોનમ વાંગચુકની ચેતવણી, ‘ચીને લદ્દાખમાં જમીન પર કબજો કર્યો, હું LAC સુધી રેલી કરી વાસ્તવિકતા બતાવીશ’
લેહ, 20 માર્ચ, 2024: પર્યાવરણ કાર્યકર્તા સોનમ વાંગચુક છેલ્લા 14 દિવસથી બંધારણીય સુરક્ષા પગલાં અને અન્ય માંગણીઓ માટે ભૂખ હડતાળ પર છે. લેહમાં માઈનસ ડિગ્રી તાપમાનમાં ભૂખ હડતાળ પર છે. સોનમ વાંગચુકે આ બાબતે ચેતવણી આપતા કહ્યું કે, ચીને લદ્દાખમાં જમીન પર કબજો કર્યો છે, LAC સુધી રેલી કરીને વાસ્તવિકતા બતાવીશ.
સોનમ વાંગચુકે જણાવ્યું હતું કે, ‘લદ્દાખના લગભગ 10,000 લોકો આ મહિને ચીન સાથેની સરહદ તરફ કૂચ કરશે અને એ બતાવવા માટે કે આપણે પડોશી દેશને આપણી કેટલી જમીન ગુમાવી છે.’
વાંગચુકે કહ્યું કે, ‘અમને પશુપાલકો પાસેથી જાણવા મળ્યું છે કે તેઓને હવે તે સ્થાનો પર જવાની મંજૂરી નથી જ્યાં તેઓ પહેલા જતા હતા. થોડા વર્ષો પહેલા જે વિસ્તારોમાં ભરવાડો જતા હતા તે વિસ્તારો હવે કેટલાય કિલોમીટર દૂર બંધ થઈ ગયા છે. અમે ત્યાં જઈને બતાવીશું કે જમીન ખોવાઈ ગઈ છે કે નહીં. તેમણે કહ્યું કે અમારી કૂચ ફિંગર વિસ્તાર (પેંગોંગ ત્સોના ઉત્તર અને દક્ષિણ કાંઠા), ડેમચોક, ચુશુલ અને ચીન સાથેની LAC પરના અન્ય વિસ્તારોમાંથી શરૂ થશે. અમે જે બે તારીખો પર અમારી કૂચ કરીશું તે છે 27મી માર્ચ અને 7મી એપ્રિલ.
BEGINNING OF DAY 14 OF MY #CLIMATEFAST
250 people slept hungy in – 12 °C to safegurad Ladakh's land, environment and tribal indigenous culture
Our nomads are losing prime pasture land to huge Indian industrial plants to the south & Chinese encroachment to the north
To show the… pic.twitter.com/to4jUyaPJc— Sonam Wangchuk (@Wangchuk66) March 19, 2024
ચીન ઉત્તરથી જમીન પર કબજો જમાવી રહ્યું છે
વાંગચુકે કહ્યું કે આ સિવાય, ‘અમારી કૂચ દરમિયાન અમે તે વિસ્તારો, પ્રાઇમ ગોચર જમીનો પણ બતાવીશું, જેને સોલાર પાર્કમાં રૂપાંતરિત કરવામાં આવી રહ્યા છે. લોકો તેમની જમીન કોર્પોરેટરો માટે ગુમાવી રહ્યા છે.’ વાંગચુકે કહ્યું કે અહીંના લોકોએ લગભગ 1,50,000 ચોરસ કિલોમીટરની પ્રાઇમ ચરાઈ જમીન ગુમાવી દીધી છે. ચીન ઉત્તરથી અતિક્રમણ કરી રહ્યું છે, ચીનીઓએ છેલ્લા કેટલાક વર્ષોમાં જમીનના મોટા ભાગ પર કબજો કરી લીધો છે. કેટલાક લોકોએ કહ્યું કે સરહદ વિવાદને કારણે પૂર્વ લદ્દાખમાં કુલ 65 પેટ્રોલિંગ પોઈન્ટમાંથી ઓછામાં ઓછા 26 પર પેટ્રોલિંગ કરવામાં આવી રહ્યું નથી.
સોનમ વાંગચુક કઈ માંગણીઓ માટે હડતાળ પર?
લદ્દાખમાં અનુક્રમે બૌદ્ધ બહુમતી અને શિયા મુસ્લિમ બહુમતી ધરાવતા વિસ્તારોનું પ્રતિનિધિત્વ કરતા લેહ એપેક્સ બોડી (LAB) અને કારગિલ ડેમોક્રેટિક એલાયન્સ (KDA)ના સભ્યોએ બંધારણની છઠ્ઠી સૂચિમાં લદ્દાખના સમાવેશ સહિત લદ્દાખને રાજ્યનો દરજ્જો આપવા માટે સંયુક્ત રીતે મતદાન કર્યું. સ્થાનિક લોકો માટે નોકરીઓમાં આરક્ષણ, લેહ અને કારગીલ માટે એક-એક સંસદીય બેઠકની માંગ સાથે હડતાળ પર છે.
ભાજપ સરકાર પર માંગણીઓ પૂરી ન કરવાનો આરોપ
બીજી તરફ, ભાજપની આગેવાની હેઠળની કેન્દ્ર સરકાર છઠ્ઠી અનુસૂચિની માંગ પૂરી કરવાનો સ્પષ્ટ ઇનકાર કરી રહી છે. વાંગચુકનું કહેવું છે કે સરકાર છઠ્ઠી અનુસૂચિ પર આપેલું વચન પાળવાનો ઈન્કાર કરી રહી છે. ગૃહમંત્રી અમિત શાહે કહ્યું કે અમે આ આપી શકતા નથી, પરંતુ અમે તમને બંધારણીય સુરક્ષા આપીશું. આ વિશ્વાસ તોડવા જેવું છે. વાંગચુકે કહ્યું કે તેઓ ભારતના લોકોને આ અંગે જાગૃત કરશે.
‘લોકો નિરાશ છે, ભાજપને અહીંથી એક પણ બેઠક નહીં મળે’
વાંગચુકે કહ્યું કે લોકો નિરાશ, હતાશ અને ગુસ્સે છે. આગામી લોકસભા ચૂંટણીમાં ભાજપને અહીં એક પણ બેઠક નહીં મળે. અમે માત્ર લદ્દાખ જ નહીં પરંતુ સમગ્ર દેશને જાગૃત કરવાનો પ્રયાસ કરી રહ્યા છીએ. જો ચૂંટણી વચનોનું આ રીતે સન્માન કરવામાં આવશે તો ચૂંટણીઓ મજાક બની જશે. અમે શા માટે આ પક્ષને બે વાર સત્તા પર લાવવા માટે મત આપ્યો?
