દિલ્હીમાં પ્રદૂષણને લઈને PMOમાં બેઠક, BS-I અને BS-III શ્રેણીના વાહનો સામે કડક કાર્યવાહી કરવા નિર્દેશ

દિલ્હી: રાજ્યમાં સતત વધી રહેલા પ્રદૂષણ પર કેન્દ્ર સરકાર પણ કડક વલણ અપનાવી રહી છે. પ્રદૂષણને નિયંત્રિત કરવા માટે ઝડપી અને અસરકારક પગલાં લેવા માટે પ્રધાનમંત્રીના મુખ્ય સચિવની અધ્યક્ષતામાં PMOમાં એક ઉચ્ચ સ્તરીય બેઠક બોલાવવામાં આવી હતી, જેમાં કેન્દ્રીય અને સંબંધિત એજન્સીઓના વરિષ્ઠ અધિકારીઓ હાજર રહ્યા હતા.

આ બેઠકમાં દિલ્હીમાં ઇલેક્ટ્રિક વાહનોની સંખ્યા વધારવા, EV ઇન્ફ્રાસ્ટ્રક્ચર, ચાર્જિંગ સ્ટેશન અને સબસિડી સંબંધિત મુદ્દાઓ પર ઝડપી પ્રગતિ સુનિશ્ચિત કરવા માટે કહેવામાં આવ્યું, જેથી પરંપરાગત પેટ્રોલ અને ડીઝલ વાહનો પર નિર્ભરતા ઓછી થાય.

BS-I અને BS-III શ્રેણીના વાહનો સામે કડક કાર્યવાહી

આ બેઠકમાં, PMOએ ગંભીર ચિંતા વ્યક્ત કરતા કહ્યું કે, દિલ્હી-NCRમાં લગભગ 37% વાહનો હજુ પણ BS-I અને BS-III શ્રેણીના છે, જે વાયુ પ્રદૂષણમાં નોંધપાત્ર ફાળો આપે છે. આ અંગે કડક વલણ અપનાવીને, આવા વાહનો સામે કડક કાર્યવાહી કરવા સૂચનાઓ જારી કરવામાં આવી હતી.

વાહનોને ટ્રેક કરવા નવી ટેકનોલોજીનો ઉપયોગ કરવા નિર્દેશ

બેઠકમાં અધિકારીઓને પ્રદૂષણ ફેલાવતા વાહનોને ટ્રેક કરવા માટે નવી ટેકનોલોજીનો ઉપયોગ કરવાનો નિર્દેશ આપવામાં આવ્યો હતો, જેમાં રીઅલ-ટાઇમ ટ્રેકિંગ, હાઇ-ટેક સ્કેનર્સ, સેન્સર-આધારિત ચેકિંગ અને AI-સક્ષમ મોનિટરિંગ સિસ્ટમનો સમાવેશ થાય છે. દિલ્હી-NCRમાં પ્રદૂષણ સંબંધિત નિયમોનું ઉલ્લંઘન કરનારાઓ સામે તાત્કાલિક કાર્યવાહી કરવાનો પણ નિર્ણય લેવામાં આવ્યો.

બેઠકમાં એમ પણ કહેવામાં આવ્યું કે, PMO દિલ્હીમાં પ્રદૂષણમાં સતત વધારો થવામાં ફાળો આપતા પરિબળો પર નજીકથી નજર રાખી રહ્યું છે અને ભવિષ્યમાં વધુ કડક પગલાં લેવામાં આવશે.

આ પણ વાંચો: ’40 વાર ફોન કર્યા, જવાબ મળ્યો-એમ્બ્યુલન્સ ફુલ છે’, મહોબામાં મજુરના મોતથી પરિવારમાં શોક છવાયો