હવે PCOS નહીં, PMOS કહેવાશે આ બીમારી, જાણો કેમ બદલાયું નામ
PCOS renamed to PMOS: મહિલાઓમાં હોર્મોનલ અસંતુલનને કારણે થતી સામાન્ય બીમારી PCOS હવે નવા નામે ઓળખાશે. વિશ્વભરના ડોક્ટરો અને સંશોધકોએ આ બીમારીનું નામ બદલીને હવે પૉલીએન્ડોક્રાઇન મેટાબોલિક ઓવેરિયન સિન્ડ્રોમ (PMOS) રાખવાનો નિર્ણય કર્યો છે. એક્સપર્ટ્સનું માનવું છે કે જૂનું નામ આ ગંભીર બીમારીને સમજવા અને તેની સાચી ઓળખ કરવામાં પૂરતું નહોતું, જેના કારણે આ મહત્વનો ફેરફાર કરવામાં આવ્યો છે.
PCOS માંથી PMOS નામ કેમ રાખવામાં આવ્યું?
અત્યાર સુધી આ બીમારી ‘પૉલીસિસ્ટિક ઓવરી સિન્ડ્રોમ’ (PCOS) તરીકે જાણીતી હતી. આ નામ પરથી એવું લાગતું હતું કે સમસ્યા માત્ર અંડાશયમાં ‘સિસ્ટ’ (ગાંઠ) હોવા સાથે જોડાયેલી છે. પરંતુ, વાસ્તવમાં ઘણી મહિલાઓને આ બીમારી હોવા છતાં ઓવરીમાં સિસ્ટ હોતી નથી. આ બીમારી માત્ર પિરિયડ્સ કે ઓવરી પૂરતી મર્યાદિત નથી, પરંતુ તે આખા શરીરને અસર કરે છે.
નવા નામ PMOS ની વિશેષતા શું છે?
ડૉક્ટરોના મતે નવું નામ આ બીમારીના લક્ષણોને વધુ સચોટ રીતે સમજાવે છે.
* પૉલીએન્ડોક્રાઇન (Polyendocrine): આ બીમારી શરીરના અનેક હોર્મોન્સને અસર કરે છે.
* મેટાબોલિક (Metabolic): તેનો સીધો સંબંધ વજન, બ્લડ સુગર અને ઇન્સ્યુલિન સાથે છે.
* ઓવેરિયન (Ovarian): તે પ્રજનન સ્વાસ્થ્ય અને ઓવ્યુલેશન સાથે જોડાયેલી સમસ્યા છે.
* સિન્ડ્રોમ (Syndrome): અનેક લક્ષણોનું એકસાથે દેખાવું.
PMOS ના લક્ષણો અને અસરો
આ બીમારીથી પીડાતી મહિલાઓમાં માસિક ચક્રમાં અનિયમિતતા, ચહેરા પર વધુ પડતા વાળ, ખીલની સમસ્યા, ઝડપથી વજન વધવું અને પ્રેગ્નન્સીમાં મુશ્કેલી જેવા લક્ષણો જોવા મળે છે. આ ઉપરાંત, ભવિષ્યમાં ડાયાબિટીસ અને હૃદય રોગનું જોખમ પણ વધી શકે છે.
14 વર્ષની મહેનત બાદ બદલાયું નામ
આ નામ બદલવાની પ્રક્રિયામાં લગભગ 14 વર્ષનો લાંબો સમય લાગ્યો છે. જેમાં દુનિયાભરના હજારો ડોક્ટરો અને મહિલાઓના મંતવ્યો લેવામાં આવ્યા હતા. નિષ્ણાતોને આશા છે કે નવા નામથી આ બીમારી પ્રત્યે જાગૃતિ વધશે અને મહિલાઓને માત્ર ગાયનેકોલોજિસ્ટ જ નહીં પરંતુ મેટાબોલિક હેલ્થ એક્સપર્ટ્સ દ્વારા પણ સચોટ સારવાર મળી શકશે.
આ પણ વાંચોઃ શુભેન્દુ સરકારની ‘ટાઈમ પોલિસી’: સવારે 10:15 સુધીમાં ઓફિસ પહોંચવું હવે ફરજિયાત
અમારી WhatsApp ચેનલમાં જોડાવા આ લિંક પર ક્લીક કરો
