અમદાવાદ 3 ડિસેમ્બર 2025: ગુજરાતમાં ચર્ચાનું કેન્દ્ર બનેલા BZ ગ્રૂપના અંદાજે ૪૫૦થી ૬૦૦૦ કરોડ રૂપિયાના પોન્ઝી સ્કીમ કૌભાંડમાં CID ક્રાઇમને મોટી સફળતા મળી છે. મુખ્ય આરોપી ભૂપેન્દ્રસિંહ ઝાલાના પિતા પરબતસિંહ ઝાલાની ધરપકડ કરવામાં આવી છે. આ ધરપકડ કેસની તપાસ શરૂ થયાને એક વર્ષ પૂર્ણ થયું ત્યારે કરવામાં આવી છે.
BZ ગ્રૂપના સીઈઓ ભૂપેન્દ્રસિંહ ઝાલાએ ઉંચા વ્યાજની લાલચ આપીને હજારો રોકાણકારો પાસેથી કરોડો રૂપિયા ઉઘરાવ્યા હતા. તેમણે ૭%થી ૩૬% સુધીનું વાર્ષિક વળતર આપવાનું વચન આપ્યું હતું, સાથે ગિફ્ટ તરીકે ટીવી, મોબાઇલ અને ગોવા ટ્રિપ જેવી લાલચો પણ આપી હતી. તપાસમાં ખુલ્યું છે કે આ સ્કીમમાં ૧૧ હજારથી વધુ રોકાણકારો જોડાયા હતા, જેમાં શિક્ષકો, ક્રિકેટરો અને સામાન્ય નાગરિકોનો સમાવેશ થાય છે.
મુખ્ય આરોપી ભૂપેન્દ્રસિંહ ઝાલાની ૨૦૨૪ના અંતમાં ધરપકડ કરાઈ હતી, ત્યારપછી તેમના ભાઈ રણજીતસિંહ અને અન્ય સંબંધીઓની પણ તપાસ ચાલી રહી છે. હવે પિતા પરબતસિંહ ઝાલાની ધરપકડથી કેસમાં નવો વળાંક આવ્યો છે. સૂત્રો પાસેથી મળતી માહિતી અનુસાર, પરબતસિંહને કૌભાંડમાં સીધી કે આડકતરી ભૂમિકા હોવાની શંકા છે, જેની તપાસ ચાલુ છે.
ધરપકડ બાદ પરબતસિંહ ઝાલાએ કોર્ટમાં જામીન અરજી કરી છે. સુનાવણી બાદ કોર્ટે ચુકાદો અનામત રાખ્યો છે. CID ક્રાઇમના અધિકારીઓએ જણાવ્યું કે હજુ કેટલાક આરોપીઓની ધરપકડ બાકી છે અને તપાસમાં વધુ ખુલાસા થશે. રોકાણકારોના પૈસા પરત કરવા માટે મિલકતો જપ્ત કરવાની પ્રક્રિયા પણ ચાલુ છે.
આ પણ વાંચો: આરોગ્ય વ્યવસ્થાની હૃદયદ્રાવક હકીકત, પ્રસૂતિ માટે 6 કિમી ચાલી ગર્ભવતી મહિલા, રસ્તામાં જ થયું મોત
