ગાંધી જયંતિ પર રાજઘાટ પહોંચ્યા રાષ્ટ્રપતિ-વડાપ્રધાન, બાપુને આપી શ્રદ્ધાંજલિ
નવી દિલ્હી: મહાત્મા ગાંધીની જયંતિ નિમિત્તે સમગ્ર દેશ આજે રાષ્ટ્રપિતા મહાત્મા ગાંધીને શ્રદ્ધાંજલિ અર્પણ કરી રહ્યો છે. રાષ્ટ્રપતિ દ્રૌપદી મુર્મૂ અને વડાપ્રધાન નરેન્દ્ર મોદીએ નવી દિલ્હીના રાજઘાટ ખાતે પહોંચીને ગાંધીજીને પુષ્પાંજલિ અર્પણ કરી હતી. આ પ્રસંગે દેશના અનેક વરિષ્ઠ નેતાઓ અને કેન્દ્રીય મંત્રીઓ પણ હાજર રહ્યા હતા.
રાજઘાટ ખાતે નેતાઓએ આપી શ્રદ્ધાંજલિ
ઉપરાષ્ટ્રપતિ સી.પી. રાધાકૃષ્ણન, લોકસભાના સ્પીકર ઓમ બિરલા, કેન્દ્રીય મંત્રી જે.પી. નડ્ડા સહિત અનેક નેતાઓએ મહાત્મા ગાંધીને શ્રદ્ધાંજલિ આપી હતી. લોકસભામાં વિપક્ષના નેતા રાહુલ ગાંધી પણ રાજઘાટ પહોંચ્યા હતા અને ગાંધીજીની સમાધિ પર પુષ્પ અર્પણ કર્યા હતા.
દિલ્હીના મુખ્યમંત્રી રેખા ગુપ્તા અને દિલ્હીના ઉપરાજ્યપાલ તરનજીત સિંહ સંધૂ પણ ગાંધીજીને શ્રદ્ધાંજલિ આપવા પહોંચ્યા હતા. રાજઘાટ ખાતે આયોજિત સર્વધર્મ પ્રાર્થના સભામાં પણ અનેક મહાનુભાવો હાજર રહ્યા હતા.
#WATCH | Delhi: Prime Minister Narendra Modi pays tribute to former Prime Minister Lal Bahadur Shastri at Vijay Ghat on the occasion of his birth anniversary.
(Source: DD) pic.twitter.com/IV8pKJrcXk
— ANI (@ANI) October 2, 2026
લાલ બહાદુર શાસ્ત્રીને પણ નમન
મહાત્મા ગાંધીની સાથે દેશના પૂર્વ વડાપ્રધાન લાલ બહાદુર શાસ્ત્રીની પણ આજે જન્મજયંતિ છે. વડાપ્રધાન નરેન્દ્ર મોદીએ વિજય ઘાટ ખાતે જઈને લાલ બહાદુર શાસ્ત્રીને શ્રદ્ધાંજલિ અર્પણ કરી હતી.
લોકસભાના અધ્યક્ષ ઓમ બિરલા અને ઉપરાષ્ટ્રપતિ સી.પી. રાધાકૃષ્ણને પણ વિજય ઘાટ ખાતે શાસ્ત્રીજીને પુષ્પાંજલિ અર્પણ કરી હતી. નેતાઓએ શાસ્ત્રીજીના સાદગીપૂર્ણ જીવન અને દેશસેવાના યોગદાનને યાદ કર્યું હતું.
જે.પી. નડ્ડાએ કર્યું શ્રમદાન
ગાંધી જયંતિ નિમિત્તે કેન્દ્રીય આરોગ્ય મંત્રી જગત પ્રકાશ નડ્ડાએ નવી દિલ્હીમાં કર્તવ્ય ભવન-1 નજીક શ્રમદાન કર્યું હતું. આ દરમિયાન તેમણે સ્વચ્છતા અભિયાનમાં ભાગ લઈને સ્વચ્છ ભારતનો સંદેશ આપ્યો હતો.
હરિયાણાના મુખ્યમંત્રી નાયબ સિંહ સૈનીએ પણ ‘સ્વચ્છ ભારત અભિયાન’માં ભાગ લીધો હતો અને લોકોને પોતાના શહેર તથા આસપાસના વિસ્તારો સ્વચ્છ રાખવા અપીલ કરી હતી.
રાષ્ટ્રપતિ મુર્મૂએ આપ્યો શાંતિ-અહિંસાનો સંદેશ
ગાંધી જયંતિની પૂર્વ સંધ્યાએ રાષ્ટ્રપતિ દ્રૌપદી મુર્મૂએ દેશવાસીઓને સંદેશ આપતાં જણાવ્યું હતું કે વિશ્વના અનેક વિસ્તારોમાં ચાલી રહેલા સંઘર્ષ અને યુદ્ધની પરિસ્થિતિ વચ્ચે મહાત્મા ગાંધીનો શાંતિ અને અહિંસાનો સંદેશ આજે વધુ પ્રાસંગિક બન્યો છે.
રાષ્ટ્રપતિએ જણાવ્યું કે ગાંધીજીના જીવન, વિચારો અને આદર્શોને સમગ્ર વિશ્વમાં સન્માન મળે છે. તેમણે લોકોને ગાંધીજીના સત્ય, અહિંસા અને શાંતિના માર્ગ પરથી પ્રેરણા લેવાની અપીલ કરી હતી.
મહાત્મા ગાંધી અને લાલ બહાદુર શાસ્ત્રીની જન્મજયંતિ નિમિત્તે દેશભરમાં વિવિધ કાર્યક્રમો, પ્રાર્થના સભાઓ અને સ્વચ્છતા અભિયાનનું આયોજન કરવામાં આવ્યું છે.
આ પણ વાંચો: Asian Games 2026: લવલીના બની ચેમ્પિયન, બર્થડે પર જીત્યો ગોલ્ડ મેડલ












