7 ફેરા લીધા બાદ જીવવા-મરવાની કસમો ખાધી, સુહાગરાત બાદ અચાનક હોસ્પિટલમાં પહોંચ્યા વર-કન્યા
મુંબઈના ભાંડુપ વિસ્તારમાં લગ્નનો ખુશીભર્યો માહોલ અચાનક અફરાતફરી અને ચીસાચીસીમાં ફેરવાઈ ગયો હતો. લગ્નપ્રસંગમાં ભોજન લીધા બાદ વર-વધૂ સહિત 30થી વધુ લોકોને અચાનક પેટમાં દુખાવો, ઊલટી અને ઝાડાની ફરિયાદ શરૂ થઈ હતી. સ્થિતિ ગંભીર બનતાં અનેક મહેમાનોને તાત્કાલિક હોસ્પિટલમાં ખસેડવાની ફરજ પડી હતી. આ ઘટનાને પગલે લગ્નમાં હાજર પરિવારોમાં ચિંતાનો માહોલ ફેલાયો હતો.
અગ્રવાલ હોસ્પિટલમાં 27 દર્દીઓ દાખલ, 7 બાળકોનો સમાવેશ
ભોજન લીધા બાદ તબિયત બગડતાં અસરગ્રસ્ત લોકોને મુંબઈના મુલુંડ વિસ્તારમાં આવેલી BMC સંચાલિત અગ્રવાલ હોસ્પિટલ સહિત આસપાસની અન્ય હોસ્પિટલોમાં લઈ જવામાં આવ્યા હતા. રાત્રે આશરે 11:40 વાગ્યે અગ્રવાલ હોસ્પિટલના ઇમરજન્સી વિભાગમાં એક પછી એક દર્દીઓ પહોંચતાં હોસ્પિટલમાં દોડધામ મચી ગઈ હતી.
હોસ્પિટલના મેડિકલ ઓફિસરના જણાવ્યા અનુસાર, અગ્રવાલ હોસ્પિટલમાં કુલ 27 દર્દીઓને દાખલ કરવામાં આવ્યા છે. તેમાં 11 મહિલાઓ, 9 પુરુષો અને 7 બાળકોનો સમાવેશ થાય છે.
તમામ દર્દીઓને તાત્કાલિક પ્રાથમિક સારવાર અને જરૂરી દવાઓ આપવામાં આવી રહી છે. રાહતની વાત એ છે કે હાલ તમામ દર્દીઓની સ્થિતિ સ્થિર હોવાનું જણાવાયું છે. ઊલટી અને શરીરમાં પાણીની અછત એટલે કે ડિહાઇડ્રેશનની સમસ્યા સંપૂર્ણપણે નિયંત્રણમાં ન આવે ત્યાં સુધી દર્દીઓને તબીબોની દેખરેખ હેઠળ રાખવામાં આવ્યા છે.
કેટરર્સ સામે બેદરકારીના આક્ષેપ
લગ્નપ્રસંગમાં અચાનક સર્જાયેલી આ પરિસ્થિતિથી વર-વધૂ પક્ષના પરિવારોમાં ભારે રોષ જોવા મળી રહ્યો છે. અસરગ્રસ્ત પરિવારજનોએ કેટરિંગ સર્વિસ પર ગંભીર બેદરકારી દાખવવાનો અને હલકી ગુણવત્તાવાળું અથવા વાસી ભોજન પીરસવાનો આક્ષેપ કર્યો છે.
પરિવારજનોના જણાવ્યા મુજબ, ભોજનની ગુણવત્તા યોગ્ય ન હોવાને કારણે બાળકો સહિત અનેક લોકોની તબિયત બગડી હતી. જોકે, ભોજન ખરેખર દૂષિત હતું કે નહીં અને બીમારીનું ચોક્કસ કારણ શું છે, તે તપાસ બાદ જ સ્પષ્ટ થશે.
પરિવારજનોએ મહારાષ્ટ્રના ફૂડ એન્ડ ડ્રગ એડમિનિસ્ટ્રેશન (FDA)ના કમિશનર તુકારામ મુંઢેને સમગ્ર મામલે નિષ્પક્ષ તપાસ કરાવવા અને જવાબદાર કેટરર્સ સામે કડક કાયદેસરની કાર્યવાહી કરવાની માગ કરી છે. સાથે જ બેદરકારી સાબિત થાય તો સંબંધિત કેટરર્સના લાઇસન્સ રદ કરવાની પણ માગ ઉઠાવી છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
લગ્નના મંડપથી હોસ્પિટલના વોર્ડ સુધી પહોંચ્યા વર-વધૂ
થોડા કલાકો પહેલાં જ્યાં શરણાઈના સૂર, ઢોલ-નગારાં અને હાસ્ય-મજાક વચ્ચે લગ્નની ખુશીઓ છવાયેલી હતી, ત્યાં મોડી રાત્રે અચાનક સ્થિતિ બદલાઈ ગઈ હતી. લગ્નની વિધિઓ અને ઉજવણી બાદ જીવનની નવી શરૂઆતનાં સપનાં જોનારા વર-વધૂને પણ હોસ્પિટલમાં સારવાર લેવાની ફરજ પડી હતી.
લગ્નના પોશાકમાં સજ્જ વર-વધૂ હોસ્પિટલના બેડ પર સારવાર લેતાં જોવા મળ્યાં હતાં. જે પ્રસંગ જીવનભર યાદગાર બનવાનો હતો, તે અચાનક આરોગ્ય સંકટમાં ફેરવાઈ ગયો હતો. હવે પરિવારજનો આ સમગ્ર ઘટનાની તપાસ અને જવાબદારો સામે કાર્યવાહી થાય તેની રાહ જોઈ રહ્યા છે.
આ પણ વાંચો: દિવાળી પહેલા સોના-ચાંદીમાં ફરી ચમક: એક જ દિવસમાં ચાંદીમાં ₹2,400નો ઉછાળો, સોનું ₹1.40 લાખની નજીક
