હરિદ્વારની ત્રણ ટ્રેનોને મંજૂરી મળી, ત્રણ મહિના બાદ પણ શરૂ થવાની રાહ
Haridwar Train Delay : સૌરાષ્ટ્રના મુસાફરોને હરિદ્વાર સુધી સીધી રેલવે સુવિધા આપવાની જાહેરાત થઈ હતી, પરંતુ ત્રણ મહિના વીતી જવા છતાં તેનો અમલ થયો નથી. રેલવે બોર્ડે હરિદ્વાર-વેરાવળ અને હરિદ્વાર-ઓખા વચ્ચે નવી એસી એક્સપ્રેસ ટ્રેનો (AC Express Trains) શરૂ કરવાની મંજૂરી આપી હતી. તેમ છતાં, ટ્રેનો કઈ તારીખથી દોડશે તે અંગે હજુ સુધી સત્તાવાર જાહેરાત કરવામાં આવી નથી.
રેલવે બોર્ડની 30 જુલાઈ, 2026ના રોજ યોજાયેલી બેઠકમાં આ નવી ટ્રેન સેવાઓને લીલી ઝંડી આપવામાં આવી હતી. આ નિર્ણયથી સોમનાથ અને દ્વારકા જેવા ધાર્મિક સ્થળો સાથે હરિદ્વારની સીધી કનેક્ટિવિટી (Rail Connectivity) વધવાની આશા ઊભી થઈ હતી. જોકે, મંજૂરી અને વાસ્તવિક સેવા શરૂ થવા વચ્ચેનો લાંબો સમય મુસાફરો માટે ચિંતાનો વિષય બન્યો છે.
ટ્રેનના નંબર, સંભવિત સમયપત્રક અને સ્ટોપેજની વિગતો જાહેર થઈ ચૂકી છે. રેલવે બોર્ડના પરિપત્ર પ્રમાણે, ટ્રેનો શરૂ કરવાની તારીખ સંબંધિત રેલવે ઝોન દ્વારા જાહેર કરવાની રહેશે. પરંતુ ત્રણ મહિના પછી પણ આ અંગે કોઈ સ્પષ્ટતા કરવામાં આવી નથી. મુસાફરોનું કહેવું છે કે માત્ર જાહેરાતથી નહીં, પરંતુ ટ્રેન શરૂ થાય ત્યારે જ તેમને તેનો વાસ્તવિક લાભ મળશે.
વેરાવળ-હરિદ્વાર ટ્રેન અઠવાડિયામાં બે દિવસ દોડાવવાની યોજના
જાહેર કરાયેલા સમયપત્રક પ્રમાણે, ટ્રેન નંબર 14326 હરિદ્વારથી સવારે 4 વાગ્યે ઉપડશે અને બીજા દિવસે સવારે 8:15 વાગ્યે વેરાવળ પહોંચશે. જ્યારે પરત ફરતી ટ્રેન નંબર 14325 વેરાવળથી સવારે 11:05 વાગ્યે ઉપડી બીજા દિવસે સાંજે 6 વાગ્યે હરિદ્વાર પહોંચશે. આ સેવા બંને દિશામાં અઠવાડિયામાં બે દિવસ ચલાવવાનો પ્રસ્તાવ છે.
ઓખા-હરિદ્વાર ટ્રેન અઠવાડિયામાં એક દિવસ દોડશે
બીજી તરફ, ટ્રેન નંબર 14328 હરિદ્વારથી શુક્રવારે સવારે 4 વાગ્યે ઉપડી બીજા દિવસે સવારે 8:15 વાગ્યે ઓખા પહોંચવાની છે. તેની પરત ટ્રેન નંબર 14327 શનિવારે સવારે 10:20 વાગ્યે ઓખાથી ઉપડશે. આ ટ્રેન સેવા અઠવાડિયામાં એક દિવસ ચલાવવાનું આયોજન છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
હવે મુસાફરોની નજર રેલવે તંત્રની આગામી જાહેરાત પર છે. ટ્રેનો શરૂ થવાની તારીખ, ટિકિટ બુકિંગ (Ticket Booking) ક્યારથી શરૂ થશે અને જો વિલંબ થઈ રહ્યો હોય તો તેનું કારણ શું છે, તે અંગે સ્પષ્ટતા કરવાની માગ ઊઠી રહી છે. મંજૂરી મળ્યા બાદ પણ સેવા શરૂ ન થતાં સૌરાષ્ટ્રના મુસાફરોમાં નિરાશા જોવા મળી રહી છે.
આ પણ વાંચો : બદ્રીનાથ હેલિકોપ્ટર દુર્ઘટના બાદ DGCAનો નવો નિયમ,ઓપરેટરોએ આપી આ ચેતવણી
