Groundnut Oil Price Hike:  ગુજરાતમાં મગફળીના ઉત્પાદનમાં ઘટાડાની શક્યતા વચ્ચે સીંગતેલના ભાવ વધવાની ચર્ચા તેજ બની છે. ખાસ કરીને સૌરાષ્ટ્રના દ્વારકા, પોરબંદર અને જામનગર જિલ્લામાં ઓછા વરસાદને કારણે મગફળીના પાકને અસર થઈ છે. બીજી તરફ, સારી ગુણવત્તાની મગફળીનો ઉપયોગ સીંગતેલ ઉપરાંત ખારી સીંગ, ચેવડા અને અન્ય ફરસાણ બનાવવામાં થતો હોવાથી પીલાણ માટેનો જથ્થો ઘટવાની આશંકા છે.

હાલમાં 15 કિલોના સીંગતેલના ડબ્બાનો ભાવ આશરે ₹3,000 છે. બજારના અંદાજ મુજબ, જો મગફળીનો પુરવઠો ઘટશે અને માંગ યથાવત્ રહેશે તો ડબ્બાનો ભાવ ₹3,500થી વધીને ₹4,000 સુધી પહોંચી શકે છે. જોકે, ભાવમાં વધારો કેટલો થશે તે બજારની સ્થિતિ પર નિર્ભર રહેશે.

મગફળીના પાકમાં કેટલો ઘટાડો?

ગુજરાતમાં સામાન્ય રીતે દર વર્ષે આશરે 35થી 36 લાખ ટન મગફળીનું ઉત્પાદન થતું હોવાનું જણાવાય છે. આ વર્ષે ધ સોલવન્ટ એક્સટ્રેક્ટર્સ એસોસિએશન (SEA)ના સર્વે મુજબ, ગયા વર્ષની સરખામણીએ ઉત્પાદન આશરે 20.5 ટકા ઘટીને 33.30 લાખ ટન થવાનો અંદાજ છે.

દેવભૂમિ દ્વારકા અને પોરબંદર જેવા વિસ્તારોમાં ઓછા વરસાદની અસર વધુ જોવા મળી છે. મગફળીના ઉત્પાદનમાં ઘટાડાથી ખેડૂતોની આવક અને તેલ ઉત્પાદકોને મળતા કાચા માલના જથ્થા પર અસર થઈ શકે છે. જોકે, કેટલાક વિસ્તારોમાં મગફળીની ગુણવત્તા સારી રહેતાં ખેડૂતોને બજારમાં સારા ભાવ મળી રહ્યા છે.

અમારી WhatsApp ચેનલમાં જોડાવા આ લિંક પર ક્લીક કરો

સીંગતેલ મોંઘું થવાનું કારણ શું?

તેલના ભાવ નક્કી કરવામાં મગફળીની ઉપલબ્ધતા અને પીલાણ માટે યોગ્ય ગુણવત્તાનો જથ્થો મહત્ત્વપૂર્ણ છે. આ વર્ષે તેલ કાઢવા માટે ઉપયોગી મગફળીની કેટલીક જાતોનું ઉત્પાદન ઘટવાની આશંકા છે. સાથે જ સારી ગુણવત્તાની મગફળીનો ઉપયોગ ફરસાણ અને નિકાસમાં થવાથી તેલ મિલોને ઓછો જથ્થો મળી શકે છે.

બીજી તરફ, સીંગતેલમાં ભેળસેળ અંગે પણ ચિંતા વ્યક્ત કરવામાં આવી છે. ગ્રાહકોએ વિશ્વસનીય બ્રાન્ડનું તેલ ખરીદવું, પેકિંગ પરની વિગતો તપાસવી અને ખરીદીનું બિલ રાખવું જોઈએ. હાલમાં સીંગતેલનો ડબ્બો ₹4,000 સુધી પહોંચશે તેવી શક્યતા વ્યક્ત થઈ રહી છે, પરંતુ આ ભાવવધારો નિશ્ચિત નથી. મગફળીની આવક, તેલનું ઉત્પાદન અને બજારમાં માંગ આગામી દિવસોમાં ભાવની દિશા નક્કી કરશે.

આ પણ વાંચો : પ્રજાને વીજબચતની સલાહ, સચિવાલયની ખાલી ચેમ્બરોમાં AC-લાઈટ ચાલુ હોવાના આક્ષેપથી સવાલો