ACP SUSPENDED :   દિલ્હી પોલીસ (Delhi Police) વિભાગમાં આંતરિક વિવાદે હવે નવો વળાંક લીધો છે. પોલીસ હેડક્વાર્ટરની બહાર પોતાના જ વિભાગના નિર્ણય સામે વિરોધ પ્રદર્શનમાં જોડાયેલા ACP મનસ્વી વશિષ્ઠને સસ્પેન્ડ કરવામાં આવ્યા છે. પોલીસ સૂત્રોના જણાવ્યા અનુસાર, આ કાર્યવાહી તાજેતરમાં પોલીસકર્મીઓ દ્વારા કરવામાં આવેલા વિરોધ પ્રદર્શન સાથે જોડાયેલી છે. જોકે, ACPના સસ્પેન્શન અંગે દિલ્હી પોલીસ તરફથી હજુ સુધી કોઈ સત્તાવાર નિવેદન આપવામાં આવ્યું નથી.

બે અધિકારીઓની બદલીના વિરોધમાં પોલીસકર્મીઓ રસ્તા પર ઉતર્યા

સોમવારે દિલ્હી પોલીસના આશરે 150 જવાનો પોલીસ હેડક્વાર્ટરની બહાર એકઠા થયા હતા. આ પ્રદર્શનમાં મહિલા પોલીસકર્મીઓ પણ જોડાઈ હતી. તેમની મુખ્ય માંગ હતી કે ACP મનસ્વી વશિષ્ઠ અને ઇન્સ્પેક્ટર અરુણ કુમારની બદલીનો નિર્ણય પાછો ખેંચવામાં આવે અને બંને અધિકારીઓને તેમની અગાઉની જગ્યાએ ફરીથી નિયુક્ત કરવામાં આવે.

બંને અધિકારીઓની બદલીથી પોલીસ વિભાગના નીચલા સ્તરના કર્મચારીઓમાં નારાજગી જોવા મળી હતી. આ જ મુદ્દે પોલીસકર્મીઓએ હેડક્વાર્ટરની બહાર વિરોધ નોંધાવ્યો હતો. આ પ્રદર્શનમાં ACP મનસ્વી વશિષ્ઠ પોતે પણ સામેલ થયા હતા.

શાહદરા પોલીસ સ્ટેશનમાં વકીલ સાથેના વિવાદથી શરૂ થયો હતો મામલો

આ સમગ્ર વિવાદની શરૂઆત શાહદરા પોલીસ સ્ટેશન (Shahdara Police Station) ખાતે બનેલી એક ઘટનાથી થઈ હતી. અહીં વકીલ લલિત બંસલને કથિત મારામારી દરમિયાન માથામાં ગંભીર ઈજા થઈ હતી. ત્યારબાદ વકીલો અને પોલીસકર્મીઓ વચ્ચે તણાવ વધી ગયો હતો.

આ ઘટનાના વિરોધમાં જિલ્લા અદાલતોના વકીલોએ અનિશ્ચિત સમયની હડતાળ (Indefinite Strike) શરૂ કરી દીધી હતી. પરિસ્થિતિને કાબૂમાં લેવા માટે ACP મનસ્વી વશિષ્ઠ અને શાહદરા પોલીસ સ્ટેશનના તત્કાલીન SHO ઇન્સ્પેક્ટર અરુણ કુમારની બદલી કરવામાં આવી હતી.

બે મહિનાની તપાસના આશ્વાસન બાદ વકીલોએ હડતાળ સમેટી

વિવાદને શાંત કરવા માટે સંબંધિત ફરિયાદો અને FIRની બે મહિના સુધી તપાસ કરાવવાનું આશ્વાસન આપવામાં આવ્યું હતું. ત્યારબાદ વકીલોએ પોતાની હડતાળ પાછી ખેંચી લીધી હતી. જોકે, હવે આ જ બદલીના નિર્ણય સામે પોલીસકર્મીઓએ વિરોધ નોંધાવ્યો છે. બીજી તરફ, પ્રદર્શનમાં જોડાયેલા ACP મનસ્વી વશિષ્ઠને સસ્પેન્ડ કરવામાં આવતાં પોલીસ વિભાગમાં આ કાર્યવાહી ચર્ચાનો વિષય બની છે.

આ પણ વાંચો : તુષાર કપૂર પાસે ₹5 કરોડની ખંડણીની માંગ, લોરેન્સ બિશ્નોઈ ગેંગના નામે ધમકી