ગાળો આપવી કૂલ નથીઃ Gen-Zની ભાષા પર ઓલિમ્પિક મેડલિસ્ટ મનુ ભાકરનું મોટું નિવેદન
National News: ભારતની ઓલિમ્પિક મેડલ વિજેતા શૂટર મનુ ભાકરે આજના યુવાનોમાં વધી રહેલી અભદ્ર ભાષાના ઉપયોગ અંગે ચિંતા વ્યક્ત કરી છે. તેમણે સોશિયલ મીડિયા પર પોસ્ટ કરીને કહ્યું કે ગાળો આપવી ક્યારેય કૂલ હોઈ શકે નહીં અને વ્યક્તિની ઓળખ તેના શબ્દો અને ભાષા પરથી થાય છે.
તાજેતરમાં સોશિયલ મીડિયા પર Gen-Zની ભાષા, જાહેર ચર્ચાઓમાં અભદ્ર શબ્દોના ઉપયોગને લઈને ચર્ચા ચાલી રહી છે. આ દરમિયાન મનુ ભાકરે યુવાનોને સંદેશ આપતા કહ્યું કે ભાષા માત્ર વાતચીતનું સાધન નથી, પરંતુ તે વ્યક્તિના વિચારો, સંસ્કાર અને વ્યક્તિત્વનું પ્રતિબિંબ છે.
તમારા શબ્દો તમારી ઓળખ બનાવે છે
મનુ ભાકરે X પર લખ્યું કે આપણે જે ભાષાનો ઉપયોગ કરીએ છીએ તે આપણા વિચારો અને વ્યક્તિત્વને દર્શાવે છે. તેથી દરેક વ્યક્તિએ પોતાના શબ્દોની પસંદગી ખૂબ જ વિચારપૂર્વક કરવી જોઈએ. તેમણે કહ્યું કે સમય જતાં માણસ પોતાના વિચારો, શબ્દો અને કર્મો મુજબ ઓળખાય છે. તેથી સકારાત્મક અને સન્માનજનક ભાષાનો ઉપયોગ કરવો જરૂરી છે.
ગાળો આપવી ક્યારેય કૂલ નથી
મનુ ભાકરના જણાવ્યા મુજબ આજના સમયમાં કેટલાક લોકો અભદ્ર ભાષાને આત્મવિશ્વાસ, આધુનિકતા અથવા સ્ટાઇલ સાથે જોડીને જુએ છે, પરંતુ આ માન્યતા ખોટી છે. તેણે સ્પષ્ટ શબ્દોમાં કહ્યું કે ગાળો આપવી કૂલ નથી. અભદ્ર ભાષાનો ઉપયોગ કોઈપણ રીતે આધુનિકતા અથવા સ્માર્ટનેસનું પ્રતીક બની શકે નહીં.
The language we choose reflects our personality and the kind of person we are. Choose your words wisely, because over time, you become what you think, what you speak, and what you practice.
Using bad language is not cool. Abusing is not cool.
Let’s keep the definition of cool… pic.twitter.com/8LN53t4V0h
— Manu Bhaker🇮🇳 (@realmanubhaker) August 2, 2026
કૂલ બનવાની સાચી વ્યાખ્યા આપી
મનુ ભાકરે યુવાનો માટે કૂલ બનવાનો સાચો અર્થ પણ સમજાવ્યો. તેના મતે:
- મહેનતુ બનવું
- પોતાનું અને બીજાનું સન્માન કરવું
- ઈમાનદારીથી સફળતા મેળવવી
- માતા-પિતા અને દેશનું નામ રોશન કરવું
આ ગુણો જ વ્યક્તિને ખરેખર કૂલ બનાવે છે.
શા માટે આપ્યું આ નિવેદન?
મનુ ભાકરે સ્પષ્ટતા કરતાં જણાવ્યું કે છેલ્લા કેટલાક વર્ષોમાં રોજિંદી વાતચીતમાં અભદ્ર શબ્દોનો ઉપયોગ સામાન્ય બની ગયો છે. ઘણા લોકો વિચાર્યા વગર અપમાનજનક શબ્દો બોલે છે અને તેને ફેશન અથવા ટ્રેન્ડ માને છે, જે ચિંતાજનક બાબત છે.
અન્ય હસ્તીઓએ પણ વ્યક્ત કર્યો અભિપ્રાય
આ મુદ્દે અનેક જાહેર જીવનની જાણીતી હસ્તીઓએ પણ પોતાનો અભિપ્રાય વ્યક્ત કર્યો છે. અભિનેતા અનુપમ ખેરે કહ્યું કે લોકશાહી દરેકને અસહમતિ વ્યક્ત કરવાનો અધિકાર આપે છે, પરંતુ કોઈનું અપમાન કરવાનો નહીં. અભિનેતા આશુતોષ રાણાએ પણ જણાવ્યું કે વ્યક્તિની ઓળખ તેની ભાષા અને શબ્દોથી થાય છે. મનુ ભાકરનું નિવેદન સોશિયલ મીડિયા પર ચર્ચાનું કેન્દ્ર બન્યું છે અને ઘણા લોકો તેમની વાતને સમર્થન આપી રહ્યા છે.
