જો રૂટે માન્ચેસ્ટર ટેસ્ટમાં પણ સદી ફટકારી…બ્રેડમેન-સ્મિથ-પોન્ટિંગનો રેકોર્ડ તોડ્યો હવે ફક્ત તેંડુલકરથી છે પાછળ

માન્ચેસ્ટર, 25 જુલાઈ : માન્ચેસ્ટરના ઓલ્ડ ટ્રેફોર્ડ મેદાન પર ભારત અને ઇંગ્લેન્ડ વચ્ચે ટેસ્ટ મેચ રમાઈ રહી છે. આ મેચના ત્રીજા દિવસે (25 જુલાઈ) ઇંગ્લેન્ડના બેટ્સમેન જો રૂટે અદ્ભુત રમત બતાવી છે. રૂટે ઇંગ્લેન્ડની પહેલી ઇનિંગમાં સદી ફટકારી હતી. રૂટે 178 બોલમાં પોતાની સદી પૂરી કરી હતી, જેમાં 12 ચોગ્ગાનો સમાવેશ થાય છે. આ રૂટના ટેસ્ટ કારકિર્દીની 38મી સદી અને ભારત સામે 12મી સદી હતી. ઉપરાંત, રૂટે સતત બીજી ટેસ્ટ મેચમાં સદી ફટકારી છે. અગાઉ, તેણે લોર્ડ્સ ટેસ્ટ મેચની પહેલી ઇનિંગમાં 104 રન બનાવ્યા હતા.

જો રૂટે ઘરઆંગણે ટેસ્ટ ક્રિકેટમાં ભારત સામે 9 ટેસ્ટ સદી ફટકારી છે. ઘરઆંગણે કોઈ ટીમ સામે બેટ્સમેન દ્વારા ટેસ્ટ સદી ફટકારવાની આ સૌથી વધુ સંખ્યા છે. તેણે ઓસ્ટ્રેલિયાના ડોન બ્રેડમેનને પાછળ છોડી દીધા છે. બ્રેડમેને ઘરઆંગણે ઇંગ્લેન્ડ સામે 8 ટેસ્ટ સદી ફટકારી હતી.

જો રૂટ હવે ભારત સામે ટેસ્ટ ક્રિકેટમાં સૌથી વધુ સદી ફટકારનાર બેટ્સમેન બની ગયો છે. રૂટે ઓસ્ટ્રેલિયાના ભૂતપૂર્વ કેપ્ટન સ્ટીવ સ્મિથને પાછળ છોડી દીધા, જેમણે ભારતીય ટીમ સામે ૧૧ સદી ફટકારી હતી.

ટીમ સામે સૌથી વધુ ટેસ્ટ સદી

• ૧૯ ડોન બ્રેડમેન (ઓસ્ટ્રેલિયા) વિરુદ્ધ ઈંગ્લેન્ડ
• ૧૩ સુનિલ ગાવસ્કર (ભારત) વિરુદ્ધ વેસ્ટ ઈન્ડિઝ
• ૧૨ જેક હોબ્સ (ઈંગ્લેન્ડ) વિરુદ્ધ ઓસ્ટ્રેલિયા
• ૧૨ સ્ટીવ સ્મિથ (ઓસ્ટ્રેલિયા) વિરુદ્ધ ઈંગ્લેન્ડ
• ૧૨ જો રૂટ (ઈંગ્લેન્ડ) વિરુદ્ધ ભારત

જો રૂટ હવે ટેસ્ટ ક્રિકેટમાં સૌથી વધુ રન બનાવવાના મામલે બીજા સ્થાને આવી ગયો છે. રૂટે આ મેચમાં પોતાનો ૧૨૦મો રન બનાવતાની સાથે જ રિકી પોન્ટિંગને પાછળ છોડી દીધો. પોન્ટિંગે ઓસ્ટ્રેલિયા માટે ૧૬૮ ટેસ્ટ મેચમાં ૧૩૩૭૮ રન બનાવ્યા હતા. હવે ફક્ત ભૂતપૂર્વ ભારતીય કેપ્ટન સચિન તેંડુલકર જ જો રૂટથી આગળ છે. તેંડુલકરે ૨૦૦ ટેસ્ટ મેચમાં ૧૫૯૨૧ રન બનાવ્યા હતા.

ટેસ્ટ ક્રિકેટમાં સૌથી વધુ રન

• ૧૫૯૨૧- સચિન તેંડુલકર (ભારત)
• ૧૩૩૭૯*- જો રૂટ (ઇંગ્લેન્ડ)
• ૧૩૩૭૮- રિકી પોન્ટિંગ (ઓસ્ટ્રેલિયા)
• ૧૩૨૮૯- જેક્સ કાલિસ (દક્ષિણ આફ્રિકા)
• ૧૩૨૮૮- રાહુલ દ્રવિડ (ભારત)
• ૧૨૪૭૨- એલિસ્ટર કૂક (ઇંગ્લેન્ડ)
• ૧૨૪૦૦- કુમાર સંગાકારા (શ્રીલંકા)
• ૧૧૯૫૩- બ્રાયન લારા (વેસ્ટ ઇન્ડીઝ)
• ૧૧૮૬૭- શિવનારાયણ ચંદ્રપોલ (વેસ્ટ ઇન્ડીઝ)
• ૧૧૮૧૪- મહેલા જયવર્ધને (શ્રીલંકા)

જો રૂટ હવે ટેસ્ટ ક્રિકેટમાં સૌથી વધુ સદી ફટકારનારા બેટ્સમેનોની યાદીમાં સંયુક્ત ચોથા સ્થાને પહોંચી ગયો છે. રૂટે કુમાર સંગાકારાની ૩૮ ટેસ્ટ સદીની બરાબરી કરી છે.

સૌથી વધુ ટેસ્ટ સદીઓ

• ૫૧ સચિન તેંડુલકર (ભારત)
• ૪૫ જેક્સ કાલિસ (દક્ષિણ આફ્રિકા)
• ૪૧ રિકી પોન્ટિંગ (ઓસ્ટ્રેલિયા)
• ૩૮ જો રૂટ (ઇંગ્લેન્ડ)
• ૩૮ કુમાર સંગાકારા (શ્રીલંકા)
• ૩૬ રાહુલ દ્રવિડ (ભારત)
• ૩૬ સ્ટીવ સ્મિથ (ઓસ્ટ્રેલિયા)

આ જો રૂટની ઇંગ્લેન્ડમાં ૨૩મી ટેસ્ટ સદી હતી. રૂટ ઘરઆંગણે ટેસ્ટ ક્રિકેટમાં સૌથી વધુ સદી ફટકારવાના મામલે સંયુક્ત રીતે પ્રથમ સ્થાને આવી ગયો છે. રિકી પોન્ટિંગ, જેક્સ કાલિસ અને મહેલા જયવર્ધનેએ પણ ઘરઆંગણે ટેસ્ટ ક્રિકેટમાં ૨૩-૨૩ સદી ફટકારી છે.