બ્રાઝિલમાં 80 વર્ષની વયે લૂલા દા સિલ્વાની ચોથી વખત રાષ્ટ્રપતિ તરીકે જીત
Election Victory : બ્રાઝિલમાં (Brazil) વામપંથી નેતા લૂલા દા સિલ્વા (Lula da Silva)એ રાષ્ટ્રપતિની ચૂંટણીમાં જીત મેળવી છે. આ જીત સાથે તેઓ 80 વર્ષની વયે ફરી એકવાર દેશનું રાષ્ટ્રપતિપદ સંભાળશે. ચૂંટણીમાં તેમણે ફ્લાવિયો બોલ્સોનારો (Flavio Bolsonaro)ને હરાવ્યા હતા. બ્રાઝિલના મીડિયા અહેવાલો અને ડેટાફોલ્હા (Datafolha)ના અંદાજ મુજબ, 99.97 ટકા મતગણતરી પૂર્ણ થતાં લૂલાને 51.76 ટકા માન્ય મતો મળ્યા હતા, જ્યારે ફ્લાવિયો બોલ્સોનારોને 48.24 ટકા મતો મળ્યા હતા.
બ્રાઝિલના લોકશાહી ઇતિહાસમાં નોંધપાત્ર સિદ્ધિ
ભૂતપૂર્વ ફેક્ટરી કામદાર અને વર્કર્સ પાર્ટી (Workers’ Party)ના નેતા લૂલાની આ જીત બ્રાઝિલના રાજકીય ઇતિહાસમાં મહત્ત્વપૂર્ણ માનવામાં આવે છે. તેમનો વર્તમાન કાર્યકાળ પૂર્ણ થતાં રાષ્ટ્રપતિ તરીકેનો કુલ કાર્યકાળ 16 વર્ષનો થશે. આ સાથે તેઓ દેશના લોકશાહી ઇતિહાસમાં સૌથી લાંબા સમય સુધી રાષ્ટ્રપતિપદે રહેનારા નેતાઓમાં સ્થાન મેળવશે. આ યાદીમાં તેમની આગળ માત્ર ગેટુલિયો વર્ગાસનું નામ છે.
પ્રથમ રાઉન્ડમાં પાછળ રહ્યા છતાં મેળવી જીત
ચૂંટણી પ્રચાર દરમિયાન મોંઘવારી, જીવનનિર્વાહનો વધતો ખર્ચ, ગુનાખોરી અને ભ્રષ્ટાચાર જેવા મુદ્દાઓ ચર્ચાના કેન્દ્રમાં રહ્યા હતા. CNNના અહેવાલ અનુસાર, 1989માં બ્રાઝિલમાં સીધી રાષ્ટ્રપતિ ચૂંટણીની શરૂઆત થયા બાદ આ પહેલી ઘટના છે, જ્યારે પ્રથમ તબક્કામાં બીજા ક્રમે રહેલા ઉમેદવારે અંતિમ ચૂંટણીમાં જીત મેળવી છે. લૂલા અગાઉ 2003થી 2010 સુધી બ્રાઝિલના રાષ્ટ્રપતિ રહી ચૂક્યા છે. તેમની નવી જીતથી દેશના રાજકારણમાં ફરી એકવાર તેમની સ્થિતિ મજબૂત બની છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
દેશની સંપ્રભુતા અને સ્વતંત્ર વિદેશનીતિ પર ભાર
ચૂંટણીમાં લૂલાને મોંઘવારી અને સુરક્ષાને લગતી ચિંતાઓ વચ્ચે કઠિન સ્પર્ધાનો સામનો કરવો પડ્યો હતો. તેમના પ્રતિસ્પર્ધી ફ્લાવિયો બોલ્સોનારોએ ગુનાખોરી સામે કડક કાર્યવાહી કરવાની અને ખાદ્ય ચીજવસ્તુઓના ભાવ ઘટાડવાની વાત કરી હતી.
બીજી તરફ, લૂલાએ બ્રાઝિલની સંપ્રભુતા (Sovereignty) અને સ્વતંત્ર વિદેશનીતિ (Foreign Policy)ને પ્રાથમિકતા આપવાનો સંકેત આપ્યો હતો. બંને ઉમેદવારો અને તેમના નજીકના લોકો સામે ભ્રષ્ટાચારના આરોપો પણ ચર્ચામાં રહ્યા હતા. લૂલાને અગાઉ ભ્રષ્ટાચાર સંબંધિત કેસોમાં એક વર્ષથી વધુ સમય જેલમાં રહેવું પડ્યું હતું, જોકે બાદમાં તેમની સામેના સંબંધિત કેસોમાં સજાને રદ કરવામાં આવી હતી.
લૂલાની જીતની આંતરરાષ્ટ્રીય અસર શું થશે?
રવિવારે યોજાયેલી ચૂંટણીના અંતિમ તબક્કામાં ભારે રાજકીય રસાકસી જોવા મળી હતી. ચૂંટણી અધિકારીઓ સમક્ષ બંને પક્ષોની અપીલ બાદ મતદાનનો સમય બે કલાક લંબાવવામાં આવ્યો હતો. લૂલાની જીતની અસર માત્ર બ્રાઝિલ પૂરતી સીમિત રહેવાની નથી. લેટિન અમેરિકાના સૌથી મોટા દેશ તરીકે બ્રાઝિલ વૈશ્વિક રાજકારણમાં મહત્ત્વપૂર્ણ સ્થાન ધરાવે છે. લૂલાએ અગાઉ વિકાસશીલ દેશોના સમૂહ ગ્લોબલ સાઉથ (Global South) સાથે સહકાર વધારવા અને ચીન (China) સાથે સંબંધો મજબૂત કરવા પર ભાર મૂક્યો છે. તેમની વિદેશનીતિમાં બ્રાઝિલના રાષ્ટ્રીય હિતો અને આંતરરાષ્ટ્રીય સ્વતંત્રતાને મહત્ત્વ મળી શકે છે.
યુનિયન નેતાથી રાષ્ટ્રપતિ સુધીની સફર
લૂલાએ 1970ના દાયકામાં ટ્રેડ યુનિયનના નેતા તરીકે રાજકીય કારકિર્દીની શરૂઆત કરી હતી. ત્યારબાદ તેમણે વર્કર્સ પાર્ટીની સ્થાપનામાં મહત્ત્વની ભૂમિકા ભજવી હતી. શરૂઆતમાં અનેક વખત રાષ્ટ્રપતિપદની ચૂંટણીમાં ઉમેદવાર તરીકે ઊભા રહ્યા બાદ, 2002માં તેમને સફળતા મળી હતી. 2006માં તેઓ ફરીથી ચૂંટાયા હતા. 2010માં તેમના મંત્રીમંડળમાં રહેલાં ડિલ્મા રુસેફે રાષ્ટ્રપતિપદ સંભાળ્યું હતું અને 2014માં તેઓ ફરી ચૂંટાયાં હતાં. હવે લૂલાની નવી જીતે બ્રાઝિલના રાજકારણમાં તેમના લાંબા અનુભવ અને પ્રભાવને ફરી ચર્ચામાં લાવ્યા છે.
