B એટલે થર્ડ AC, A એટલે સેકન્ડ AC… તો પછી ટ્રેનમાં આ ‘AB’ કોચ શું હોય છે?
Indian Railway AB coach meaning: ભારતીય રેલવે દ્વારા દરેક વર્ગના મુસાફરોની સગવડ માટે અલગ-અલગ પ્રકારના કોચ બનાવવામાં આવે છે, જેમ કે સ્લીપર, જનરલ, થર્ડ એસી, સેકન્ડ એસી અને ફર્સ્ટ એસી. આ તમામ કોચને ઓળખવા માટે રેલવે દ્વારા ખાસ કોડ આપવામાં આવ્યા છે, જેનાથી સ્ટેશન પર કે ટિકિટમાં ડબ્બા સરળતાથી ઓળખી શકાય છે.
જેમ કે સ્લીપર ક્લાસના ડબ્બા ‘S’ થી ઓળખાય છે, થર્ડ એસી માટે ‘B’ અને સેકન્ડ એસી માટે ‘A’ કોડનો ઉપયોગ થાય છે. પરંતુ શું તમે ક્યારેય ટ્રેનમાં ‘AB’ લખેલો ખાસ કોચ જોયો છે? ઘણા મુસાફરો આ કોચ જોઈને મૂંઝવણમાં મુકાઈ જાય છે કે આખરે આ કયા ક્લાસનો ડબ્બો છે અને તેમાં કયા મુસાફરો બેસી શકે છે. ચાલો જાણીએ આ ‘AB’ કોચ પાછળની પૂરી વિગત.
કઈ કેટેગરીના મુસાફરો માટે હોય છે AB કોચ?
જે મુસાફરોની ટિકિટ થર્ડ એસીમાં કન્ફર્મ થાય છે તેમને ‘B’ સીરીઝના કોચ (જેમ કે B1, B2) ફાળવવામાં આવે છે, જ્યારે સેકન્ડ એસીના મુસાફરોને ‘A’ સીરીઝના કોચ મળે છે. આવામાં ‘AB’ કોચ એ ‘A’ (સેકન્ડ એસી) અને ‘B’ (થર્ડ એસી) બંનેનું કોમ્બિનેશન એટલે કે મિશ્રણ છે.
આનો અર્થ એ થાય કે આ એક જ ડબ્બામાં સેકન્ડ એસી અને થર્ડ એસી એમ બંને ક્લાસના મુસાફરો માટે વ્યવસ્થા હોય છે. આ કોચનો અડધો ભાગ થર્ડ એસીની સીટો મુજબ અને બાકીનો અડધો ભાગ સેકન્ડ એસીની સીટો મુજબ ડિઝાઇન કરવામાં આવ્યો હોય છે.
આ કોચની સૌથી મોટી ખાસિયત એ છે કે તેમાં એક જ નંબરની બે સીટો હોઈ શકે છે. ઉદાહરણ તરીકે, સીટ નંબર ૩ આ કોચમાં બે જગ્યાએ હશે – એક થર્ડ એસી વાળા સેક્શનમાં અને બીજી સેકન્ડ એસી વાળા સેક્શનમાં. તેથી જ્યારે પણ તમને આ કોચ ફાળવવામાં આવે, ત્યારે ખાસ ધ્યાન રાખવું કે તમારી સીટ કયા સેક્શનમાં છે જેથી ભૂલથી બીજાની સીટ પર ન બેસી જવાય.
ટ્રેનની અંદર તમારી સીટ ક્યાં છે તે કેવી રીતે ઓળખશો?
હવે સવાલ એ થાય કે ડબ્બાની અંદર ગયા પછી તમારી સાચી સીટ કેવી રીતે ઓળખવી? તેના માટે આ બે ખૂબ જ સરળ રીતો છે:
1. મિડલ બર્થ (Middle Berth): જો તમે થર્ડ એસીની ટિકિટ બુક કરાવી હશે, તો તમારી કેબિનમાં મિડલ બર્થ (વચ્ચેની સીટ) જોવા મળશે, એટલે કે એક સાઇડ ત્રણ સીટો હશે. જ્યારે સેકન્ડ એસી વાળા સેક્શનમાં મિડલ બર્થ હોતી નથી, ત્યાં માત્ર લોઅર (નીચેની) અને અપર (ઉપરની) બર્થ એમ બે જ સીટો હોય છે.
2. પડદા (Curtains): સામાન્ય રીતે રેલવેમાં થર્ડ એસીના સેક્શનમાં સીટોની આગળ પ્રાઇવસી માટે પડદા લગાવેલા હોતા નથી. જ્યારે સેકન્ડ એસી વાળા સેક્શનમાં મુસાફરોની સુવિધા અને પ્રાઇવસી માટે કેબિનની બહાર પડદા લગાવેલા હોય છે.
જો આ બંને રીતો પછી પણ કોઈ મૂંઝવણ રહે, તો તમે ટ્રેનમાં હાજર ટીટીઈ (TTE) નો સંપર્ક કરીને તમારી સાચી સીટ વિશે માહિતી મેળવી શકો છો.
આ પણ વાંચોઃ હોર્મુઝમાં નાગરિકો પરના હુમલાથી ભારત ગુસ્સે ભરાયું, ઈરાની રાજદ્વારીને સમન્સ પાઠવ્યું
આ પણ વાંચોઃ સુરતનો ચોંકાવનારો બનાવ: વકીલે જ પીડિતાને ધમકાવી શારીરિક શોષણ કર્યું
અમારી WhatsApp ચેનલમાં જોડાવા આ લિંક પર ક્લીક કરો
