સુરતમાં કાયદાના રક્ષક તરીકે ઓળખાતા એક વકીલ દ્વારા જ કાયદાની તમામ હદો પાર કરી દેતો ગંભીર અને ચોંકાવનારો બનાવ સામે આવ્યો છે. જે વકીલ એક સગીરા પર થયેલા દુષ્કર્મ કેસમાં તેના પરિવાર તરફથી કોર્ટમાં લડી રહ્યો હતો, એ જ વકીલ પર સગીરાનું શારીરિક શોષણ કરવાનો આરોપ લાગ્યો છે. આરોપ છે કે વકીલે સગીરાને જૂનો કેસ નબળો પાડી દેવાની ધમકી આપી તેની સાથે દુષ્કર્મ આચર્યું હતું અને ઘટનાનો વીડિયો બનાવી બ્લેકમેઈલ કરવાનો પ્રયાસ કર્યો હતો.
આ મામલે સચિન જીઆઈડીસી પોલીસે તાત્કાલિક કાર્યવાહી કરતા આરોપી વકીલ પ્રણયરાજ ગોવિંદભાઈ રણવીર (ઉંમર 43 વર્ષ)ની ધરપકડ કરી છે. પોલીસ દ્વારા આરોપી વિરુદ્ધ પોક્સો એક્ટ સહિત ભારતીય ન્યાય સંહિતાની વિવિધ ગંભીર કલમો હેઠળ ગુનો દાખલ કરવામાં આવ્યો છે.
પીડિત પરિવારને હતો વકીલ પર વિશ્વાસ, પરંતુ વિશ્વાસનો જ થયો ભંગ
મળતી માહિતી મુજબ, વર્ષ 2025માં સુરતની એક 13 વર્ષીય સગીરા અપહરણ અને દુષ્કર્મની ઘટનાનો ભોગ બની હતી. તે સમયે સગીરાની ઉંમર માત્ર 12 વર્ષ અને 8 મહિના હતી. 19 સપ્ટેમ્બર 2025ના રોજ બે વ્યક્તિઓ દ્વારા તેનું અપહરણ કરવામાં આવ્યું હોવાની ફરિયાદ નોંધાઈ હતી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
આ ઘટનાને લઈને 22 સપ્ટેમ્બર 2025ના રોજ સચિન જીઆઈડીસી પોલીસ સ્ટેશનમાં અપહરણ અને દુષ્કર્મનો ગુનો દાખલ કરવામાં આવ્યો હતો. પોલીસે તપાસ હાથ ધરી 23 નવેમ્બર 2025ના રોજ સગીરાને શોધી કાઢી હતી અને બંને આરોપીઓની ધરપકડ કરી કોર્ટમાં ચાર્જશીટ પણ રજૂ કરી હતી. કાયદાકીય લડાઈમાં પોતાની દીકરીને ન્યાય મળે તે માટે સગીરાના પિતાએ વકીલ પ્રણયરાજ રણવીરને કેસ લડવા માટે રાખ્યા હતા. પરિવારને વિશ્વાસ હતો કે વકીલ તેમની દીકરી માટે ન્યાય મેળવવામાં મદદ કરશે. પરંતુ આ વિશ્વાસ જ અંતે સૌથી મોટો આઘાત બની ગયો.
ઘરકામ માટે રાખવાની વાત કરી, પછી ધમકી આપી સગીરાને પોતાની સાથે લઈ ગયો
પોલીસ તપાસમાં સામે આવેલી વિગતો મુજબ, 12 જુલાઈ 2026ના રોજ આરોપી વકીલ પ્રણયરાજે સગીરાના પિતાને ફોન કર્યો હતો. તેણે વાતચીત દરમિયાન જણાવ્યું હતું કે, તે તેમની દીકરીને પોતાના ઘરે ઘરકામ માટે રાખવા માંગે છે. આ દરમિયાન તેણે પરિવારનો વિશ્વાસ જીતવાનો પ્રયાસ કર્યો હતો. પરંતુ સાથે જ તેણે એવી ધમકી પણ આપી હતી કે જો દીકરીને તેની સાથે નહીં મોકલવામાં આવે તો અગાઉનો ચાલી રહેલો કેસ તે નબળો પાડી દેશે અને કોર્ટમાં પરિવારને નુકસાન પહોંચાડી શકે છે.
વકીલ કોર્ટની પ્રક્રિયા અને કેસની માહિતી જાણતો હોવાથી પરિવાર પર તેનો માનસિક દબાણ ઉભું થયું હતું. આ ધમકીના કારણે પીડિતાના પિતાએ પોતાની દીકરીને તેની સાથે મોકલી હતી. ત્યારબાદ આરોપી વકીલ સગીરાને પોતાની કારમાં બેસાડીને સુરતના ડીંડોલી વિસ્તારમાં આવેલા પોતાના રહેણાંક મકાનમાં લઈ ગયો હતો.
મકાનમાં લઈ જઈને માર માર્યો અને બળજબરીથી દુષ્કર્મ આચર્યું
પોલીસ ફરિયાદ પ્રમાણે, ડીંડોલી વિસ્તારમાં આવેલા વેદાંતવિલા સોસાયટીના મકાનમાં લઈ ગયા બાદ આરોપીએ સગીરાને ડરાવી-ધમકાવી હતી. આરોપ છે કે તેણે સગીરા સાથે મારપીટ કરી હતી અને તેની ઈચ્છા વિરુદ્ધ શારીરિક સંબંધ બાંધ્યા હતા.
આટલું જ નહીં, આરોપીએ સગીરા સાથે અકુદરતી કૃત્ય પણ આચર્યું હોવાની ફરિયાદ નોંધાઈ છે. પોલીસ મુજબ, આરોપીએ સગીરાને ડરાવવા અને ભવિષ્યમાં મોં બંધ રાખવા માટે સમગ્ર ઘટનાનો વીડિયો પોતાના મોબાઈલમાં ઉતાર્યો હતો. આરોપીએ વીડિયોના આધારે સગીરાને બ્લેકમેઈલ કરવાનો પ્રયાસ કર્યો હોવાનો પણ આક્ષેપ કરવામાં આવ્યો છે.
હિંમત કરીને પિતાને જણાવી સમગ્ર ઘટના, પોલીસમાં નોંધાઈ ફરિયાદ
ઘટના બાદ સગીરા ખૂબ જ ડરી ગઈ હતી. જોકે થોડા સમય બાદ તેણે હિંમત કરીને પોતાના પિતાને સમગ્ર હકીકત જણાવી હતી. દીકરી પાસેથી સમગ્ર વાત સાંભળ્યા બાદ પરિવાર ચોંકી ગયો હતો. જે વ્યક્તિને પરિવાર ન્યાય અપાવનાર માનતો હતો, એ જ વ્યક્તિ પર આવા ગંભીર આરોપો લાગતા પરિવાર દ્વારા તાત્કાલિક પોલીસનો સંપર્ક કરવામાં આવ્યો હતો. 13 જુલાઈ 2026ના રોજ સગીરાના પિતાએ સચિન જીઆઈડીસી પોલીસ સ્ટેશનમાં ફરિયાદ નોંધાવી હતી. ઘટનાની ગંભીરતાને ધ્યાનમાં રાખીને પોલીસે તાત્કાલિક તપાસ શરૂ કરી હતી.
પોક્સો સહિતની ગંભીર કલમો હેઠળ ગુનો નોંધાયો
સચિન જીઆઈડીસી પોલીસે આરોપી વકીલ વિરુદ્ધ ભારતીય ન્યાય સંહિતા (BNS) હેઠળ વિવિધ કલમો તેમજ પોક્સો એક્ટ હેઠળ ગુનો નોંધ્યો છે. આરોપી સામે BNSની કલમ 64(2)(જે), 65(1), 95, 115(2), 351(2) સહિત પોક્સો એક્ટ 2012ની કલમ 4, 6, 8 અને 10 મુજબ કાર્યવાહી હાથ ધરવામાં આવી છે. ફરિયાદ નોંધાયા બાદ પોલીસે અલગ અલગ ટીમો બનાવી આરોપીની શોધખોળ શરૂ કરી હતી અને ગણતરીના કલાકોમાં જ ડીંડોલી વિસ્તારમાંથી તેની ધરપકડ કરી લીધી હતી. હાલ પોલીસ આરોપીની પૂછપરછ કરી રહી છે. તેમજ ઘટનામાં ઉપયોગમાં લેવાયેલ મોબાઈલ ફોન અને અન્ય પુરાવા એકત્ર કરવાની કાર્યવાહી ચાલી રહી છે.
આરોપી વકીલનો જૂનો ગુનાહિત ઇતિહાસ પણ સામે આવ્યો
પોલીસ તપાસમાં આરોપી વકીલ પ્રણયરાજ રણવીરનો અગાઉનો ગુનાહિત રેકોર્ડ પણ સામે આવ્યો છે. પોલીસના જણાવ્યા પ્રમાણે આરોપી સામે અગાઉ અલગ અલગ પોલીસ સ્ટેશનોમાં કુલ 6 જેટલા ગુનાઓ નોંધાયેલા છે.
જેમાં અમદાવાદના બાવળા પોલીસ સ્ટેશનમાં પ્રોહિબિશન અને દહેજ ઉત્પીડનનો ગુનો, ચાંદખેડા પોલીસ સ્ટેશનમાં સરકારી કર્મચારી પર હુમલો અને જાહેર સંપત્તિને નુકસાન પહોંચાડવાનો ગુનો, સુરત ગ્રામ્યના ઓલપાડમાં જાહેરનામા ભંગનો કેસ નોંધાયેલો છે. આ ઉપરાંત ડીંડોલી અને સલાબતપુરા પોલીસ સ્ટેશનમાં દારૂ પીધેલી હાલતમાં વાહન ચલાવવાનો કેસ અને મારામારી જેવા ગુનાઓ પણ નોંધાયેલા હોવાનું સામે આવ્યું છે.
પોલીસ હવે પુરાવા એકત્ર કરી રહી છે
હાલ પોલીસે આરોપી વિરુદ્ધ તમામ પુરાવા એકત્ર કરવાની કામગીરી શરૂ કરી છે. સગીરાના નિવેદન, મોબાઈલ ફોન, વીડિયો સહિતના ટેક્નિકલ પુરાવાઓની તપાસ કરવામાં આવી રહી છે.
કાયદાની જાણકારી ધરાવતા અને ન્યાય અપાવવાની જવાબદારી ધરાવતા વ્યક્તિ સામે જ આવા ગંભીર આરોપો આવતા સમગ્ર મામલો ચર્ચાનો વિષય બન્યો છે. પોલીસનું કહેવું છે કે તપાસ પૂર્ણ થયા બાદ આરોપી સામે કોર્ટમાં મજબૂત ચાર્જશીટ રજૂ કરવામાં આવશે જેથી કાયદા મુજબ કડક કાર્યવાહી થઈ શકે.
