હોર્મુઝમાં જહાજો પર ફાયરિંગ બાદ ભારતે નવી એડવાઇઝરી જાહેર કરી, જાણો શું કહ્યું?
Hormuz Strait: હોર્મુઝ સ્ટ્રેટમાં 2 ભારતીય જહાજો પર થયેલી ગોળીબારની ઘટનાના બાદ 18 એપ્રિલે ભારતીય નૌસેનાએ સ્ટ્રેટની આસપાસ સુરક્ષા વ્યવસ્થા કડક કરી દીધી છે. ભારતીય નૌસેનાએ પર્શિયન ગલ્ફમાં ભારતીય ધ્વજવાળા જહાજો માટે નવી એડવાઇઝરી જારી કરી છે, જેમાં તેમને લારાક ટાપુથી દૂર રહેવા અને માત્ર નૌસેનાના નિર્દેશ મુજબ જ ત્યાંથી પસાર થવા માટે સૂચના આપવામાં આવી છે, જેથી સુરક્ષા સુનિશ્ચિત થઈ શકે.
સૂત્રોએ જણાવ્યું હતું કે ભારતીય નૌકાદળ હોર્મુઝ સ્ટ્રેટમાંથી પસાર થવાની રાહ જોઈ રહેલા તમામ ભારતીય જહાજોની સલામતીને પ્રાથમિકતા આપી રહ્યું છે. અત્યાર સુધીમાં 11 ભારતીય જહાજો સ્ટ્રેટમાંથી પસાર થઈ ચૂક્યા છે. છેલ્લું ટેન્કર, દેશ ગરીમા, 18 એપ્રિલના રોજ પાર થયું હતું. તે જ દિવસે ‘જગ અર્ણવ’ અને ‘સનમાર હેરાલ્ડ’ નામના બે ભારતીય જહાજો પર ઈરાની ગાર્ડ્સ દ્વારા ગોળીબાર કરવામાં આવતા તેમને પરત ફરવું પડ્યું હતું.
દેશ ગરિમા જહાજ ભારતમાં ક્યારે આવશે?
હોર્મુઝ સ્ટ્રેટમાંથી પસાર થયા પછી, દેશ ગરિમાને અરબી સમુદ્રમાં ભારતીય નૌકાદળ દ્વારા એસ્કોર્ટ કરવામાં આવી રહ્યું છે અને 22 એપ્રિલે મુંબઈ પહોંચવાની અપેક્ષા છે. લારાક ટાપુ હોર્મુઝ સ્ટ્રેટના સૌથી સાંકડા બિંદુ પર સ્થિત છે અને ઈરાનના તેલ માળખાનો નોંધપાત્ર ભાગ ધરાવે છે. આ ટાપુ ઈરાનના ઉર્જા ક્ષેત્ર માટે મહત્વપૂર્ણ છે, અને તેની આસપાસના જળક્ષેત્રમાં ભારે સુરક્ષા આપવામાં આવે છે.
ઈરાન લારાક ટાપુ અંગે સતર્ક છે
હોર્મુઝ સ્ટ્રેટમાંથી પસાર થતા જહાજો પર બંકરો અને રડાર સિસ્ટમના નેટવર્ક દ્વારા નજીકથી નજર રાખવામાં આવે છે. લારાક ટાપુ હોર્મુઝ સ્ટ્રેટમાં હોર્મુઝ ટાપુથી આશરે 33 કિલોમીટર દક્ષિણમાં સ્થિત છે, જે ઈરાન-યુએસ સંઘર્ષ પહેલા વૈશ્વિક તેલના લગભગ 20% પરિવહન માટે એક મહત્વપૂર્ણ માર્ગ હતો.
ભારતીય નૌસેનાના 7 જહાજ તૈનાત
અહેવાલ મુજબ, ત્યાં ઘણા ઈરાની ઠેકાણાઓ પણ કાર્યરત છે, જે નાના અને ઝડપથી આગળ વધતા જહાજોને નિશાન બનાવવામાં સક્ષમ છે. હાલમાં, 14 ભારતીય જહાજો પર્શિયન ગલ્ફમાં છે, જે હોર્મુઝ સ્ટ્રેટમાંથી પસાર થવાની રાહ જોઈ રહ્યા છે. ભારતીય નૌકાદળ આ જહાજો સાથે સતત સંપર્કમાં છે અને તેમને પરવાનગી મળ્યા પછી જ આગળ વધવાની સલાહ આપી છે. ભારતીય નૌકાદળના સાત જહાજો પર્શિયન ગલ્ફ નજીક તૈનાત કરવામાં આવ્યા છે અને હોર્મુઝ સ્ટ્રેટમાંથી પસાર થતા ભારતીય જહાજોને સુરક્ષા પૂરી પાડશે.
