Karan Johar Life Partner :   બોલિવૂડના જાણીતા ફિલ્મ નિર્માતા કરણ જોહરે પોતાના અંગત જીવન અંગે ખુલ્લા દિલે વાત કરી છે. કરણને જીવનમાં એક એવા સાથીની ઇચ્છા છે, જેની સાથે તેઓ પોતાની ખુશીઓ, લાગણીઓ અને જીવનની ખાસ પળો વહેંચી શકે. જોકે, તેમણે સ્વીકાર્યું હતું કે તેમના માટે લગ્ન કદાચ શક્ય ન હોય, પરંતુ જીવનસાથી મળવાની આશા હજુ પણ છે.

‘મારે જીવનની દરેક પળ કોઈની સાથે વહેંચવી છે’

કરણ જોહરના લોકપ્રિય શો ‘કોફી વિથ કરણ’ની વાતચીત દરમિયાન આ મુદ્દો સામે આવ્યો હતો. શોમાં અભિનેતા વિજય દેવરકોંડા અને અભિનેત્રી રશ્મિકા મંદાના મહેમાન તરીકે પહોંચ્યાં હતાં. વાતચીત દરમિયાન વિજયે કરણને પૂછ્યું હતું કે તેઓ પોતાના જીવનમાં શું ઇચ્છે છે.

જવાબમાં કરણે કહ્યું કે

તેઓ સંબંધમાં રહેવા માગે છે. તેમને એવી વ્યક્તિ જોઈએ છે, જેની સાથે તેઓ મનની વાત કરી શકે, પોતાની સફળતાઓની ઉજવણી કરી શકે અને જીવનની દરેક મહત્ત્વપૂર્ણ પળનો આનંદ માણી શકે.

બાળકો માટે પણ એવો સાથી જોઈએ, જે સમાન જવાબદારી નિભાવે

કરણ જોહરે પોતાના બંને બાળકો રૂહી અને યશનો પણ ઉલ્લેખ કર્યો હતો. કરણ સરોગસી દ્વારા પિતા બન્યા હતા અને બંને બાળકોનો ઉછેર કરી રહ્યા છે. તેમણે કહ્યું કે તેઓ એવા જીવનસાથીની ઇચ્છા રાખે છે, જે તેમના બાળકોને પણ પોતાના બાળકોની જેમ સ્વીકારે અને તેમના ઉછેરમાં સમાન જવાબદારી નિભાવે. કરણ માટે જીવનસાથીનો અર્થ માત્ર પ્રેમનો સંબંધ નથી, પરંતુ એવો સાથ છે જેમાં પરિવાર, લાગણીઓ અને જવાબદારીઓ પણ સામેલ હોય.

વિજય દેવરકોંડાએ કરણ માટે કરી પ્રાર્થના

આ વાતચીત દરમિયાન વિજય દેવરકોંડાએ રશ્મિકા મંદાના સાથેના પોતાના સંબંધનો ઉલ્લેખ કરતાં કહ્યું હતું કે તેઓ તેમનો હાથ પકડીને તેમને સુરક્ષિત હોવાનો અહેસાસ કરાવવા માગે છે. ત્યારબાદ વિજયે કરણને પૂછ્યું કે તેઓ શું ઇચ્છે છે. કરણનો જવાબ સાંભળ્યા બાદ વિજયે મજાકિયા અંદાજમાં કહ્યું કે તેઓ જૂના દેવતાઓ, નવા દેવતાઓ અને ‘કોફી’ તથા ‘સોફા’ના દેવતાઓને પ્રાર્થના કરશે કે કરણને પણ તેમનો મનગમતો સાથી મળી જાય. વિજયની આ વાત પર કરણે પણ પ્રતિક્રિયા આપતાં કહ્યું કે તેમની પ્રાર્થના સાચા દિલથી કરવામાં આવી હોય એવું લાગે છે.

લગ્ન અંગે અનિશ્ચિતતા, પરંતુ સાથની ઇચ્છા યથાવત્

કરણ જોહરની વાતોમાંથી જાણવા મળે છે કે તેઓ લગ્નને લઈને ભલે અનિશ્ચિત હોય, પરંતુ જીવનમાં કોઈ ખાસ વ્યક્તિની હાજરી ઇચ્છે છે. તેમની ઈચ્છા છે કે કોઈ એવો સાથી મળે, જે તેમને સમજે, તેમની સાથે જીવનની ખુશીઓ વહેંચે અને તેમના બાળકો સાથે પણ મજબૂત સંબંધ બનાવે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ફિલ્મી કારકિર્દીમાં પણ વ્યસ્ત છે કરણ જોહર

કરણ જોહર અંગત જીવનની સાથે ફિલ્મ નિર્માણના ક્ષેત્રમાં પણ સક્રિય છે. તેમની સાથે જોડાયેલા આગામી પ્રોજેક્ટ્સમાં ‘ઉડતા તીર’ અને કાર્તિક આર્યન અભિનીત ‘નાગઝિલા’નો સમાવેશ થાય છે. ‘નાગઝિલા’માં કાર્તિક આર્યન ઇચ્છાધારી નાગની ભૂમિકામાં જોવા મળશે. એક તરફ કરણ પોતાની ફિલ્મી કારકિર્દીને આગળ વધારી રહ્યા છે, તો બીજી તરફ તેમના અંગત જીવન અંગે કરેલી આ વાતે ચાહકોનું ધ્યાન ખેંચ્યું છે.

આ પણ વાંચો : ઈ-મુદ્રાના 8 ડિજિટલ સર્ટિફિકેટની સુરક્ષામાં મોટી ખામી! નકલી વેબસાઈટ બનાવી સાયબર છેતરપિંડીનો ખતરો, CERT-Inની ચેતવણી