જો PM મોદીમાં ઈન્દિરા ગાંધી જેટલો દમ હોય તો કહીં દે કે ડોનાલ્ડ ટ્રમ્પ ખોટા છે : રાહુલ ગાંધી
નવી દિલ્હી, 29 જુલાઈ : પહલગામમાં 22મી એપ્રિલે આતંકવાદી હુમલો કેવી રીતે થયો, ગુપ્તચર નિષ્ફળતા કેવી રીતે થઈ, આતંકવાદીઓ ક્યાંથી આવ્યા, ઓપરેશન સિંદૂર કેમ અધવચ્ચે જ બંધ કરી દેવામાં આવ્યું અને અચાનક યુદ્ધવિરામ કેમ જાહેર કરવામાં આવ્યો? વિપક્ષના આ પ્રશ્નો પર દેશની સંસદમાં ભારે ચર્ચા ચાલી રહી છે.
પહલગામ હુમલા અને ઓપરેશન સિંદૂર પર ચર્ચા દરમિયાન, લોકસભામાં વિરોધ પક્ષના નેતા રાહુલ ગાંધીએ કહ્યું કે પહેલગામમાં ભયાનક હુમલો થયો. પાકિસ્તાની આતંકવાદીઓએ નિર્દોષ ભારતીયોની નિર્દયતાથી હત્યા કરી. આ સમય દરમિયાન અમે સરકાર સાથે ખડકની જેમ ઉભા રહ્યા.
‘આપણા સૈનિકો વાઘ છે, તેમને છૂટ આપવી પડશે’
લોકસભામાં રાહુલ ગાંધીએ કહ્યું કે સિંહને મુક્ત છોડવો પડશે, તેને બાંધી શકાતો નથી. તેમણે કહ્યું કે, સેનાને ઓપરેશન માટે સંપૂર્ણ સ્વતંત્રતા આપવી પડશે. આપણા સૈનિકો વાઘ છે, તેમને છૂટ આપવી પડશે.
‘1971માં એક લાખ પાકિસ્તાની સૈનિકોએ આત્મસમર્પણ કર્યું’
રાહુલે કહ્યું, લશ્કરી કાર્યવાહી માટે મજબૂત ઇચ્છાશક્તિ હોવી જોઈએ. 1971માં ભારત પાસે મજબૂત ઇચ્છાશક્તિ હતી. ઇન્દિરા ગાંધીએ જનરલ માણેક શોને છૂટ આપી હતી. તત્કાલીન જનરલ સેમ માણેક શોએ કહ્યું હતું કે હું હમણાં હુમલો કરી શકતો નથી, પછી પીએમએ કહ્યું કે તમે ઇચ્છો તેટલો સમય લો. કામગીરીની સ્વતંત્રતા હોવી જોઈએ. એક લાખથી વધુ પાકિસ્તાની સૈનિકોએ આત્મસમર્પણ કર્યું, એક નવો દેશ બન્યો.
રાહુલ ગાંધીએ રાજનાથ સિંહ વિશે શું કહ્યું?
રાહુલ ગાંધીએ કહ્યું, ‘રક્ષા મંત્રી રાજનાથ સિંહે ગઈકાલે કહ્યું હતું કે ઓપરેશન સિંદૂર ૨૨ મિનિટ સુધી ચાલ્યું હતું, પછી અમે પાકિસ્તાનને ફોન કરીને કહ્યું હતું કે અમે બિન-લશ્કરી લક્ષ્યો પર હુમલો કર્યો છે, અમે યુદ્ધવિરામ ઇચ્છતા નથી. રાહુલે આરોપ લગાવ્યો કે રાત્રે ૧.૩૫ વાગ્યે સરકારે ડીજીએમઓને યુદ્ધવિરામ માટે કહ્યું. તમે તેમને કહ્યું હતું કે અમે લશ્કરી લક્ષ્યો પર હુમલો નહીં કરીએ, અમે યુદ્ધવિરામ ઇચ્છીએ છીએ. રાહુલે કહ્યું કે તમે પાકિસ્તાનને તમારી રાજકીય ઇચ્છાશક્તિ સીધી કહી દીધી કે તમે લડવા માંગતા નથી.
‘અમારા લડાકુ વિમાનો કેમ પડ્યા’
રાહુલ આપણા રાજકીય નેતૃત્વએ સેનાના હાથ બાંધી દીધા. શરૂઆતમાં જ તમે તેમને કહ્યું હતું કે અમારી પાસે રાજકીય ઇચ્છાશક્તિ નથી, કે અમે લડીશું નહીં, પછી તમે સેનાને લડવા માટે કહ્યું. પ્રશ્ન એ છે કે જેટ કેમ પડ્યા? રાહુલે સીડીએસ અનિલ ચૌહાણના નિવેદનનો ઉલ્લેખ કરતા કહ્યું, તમે કોઈ ભૂલ કરી નથી, સેનાએ કોઈ ભૂલ કરી નથી, ભૂલ રાજકીય નેતૃત્વ દ્વારા થઈ હતી અને અનિલ ચૌહાણ પાસે સ્પષ્ટપણે કહેવાની હિંમત હોવી જોઈએ કે સરકારે તેમના હાથ બાંધી દીધા હતા.
રાહુલ ગાંધીએ પીએમ મોદી વિશે શું કહ્યું?
ચર્ચા દરમિયાન રાહુલ ગાંધીએ આગળ કહ્યું, ઓપરેશન સિંદૂરનો હેતુ વડા પ્રધાનની છબી બચાવવાનો હતો. તેમના હાથ પહલગામમાં માર્યા ગયેલા લોકોના લોહીથી રંગાયેલા છે. તેમણે પોતાની છબી બચાવવા માટે વાયુસેનાનો ઉપયોગ કર્યો. યુએસ રાષ્ટ્રપતિનો ઉલ્લેખ કરતા રાહુલે કહ્યું કે ડોનાલ્ડ ટ્રમ્પે 25 વાર કહ્યું કે તેમણે યુદ્ધવિરામ કરાવ્યો, જો પીએમ મોદીમાં ઇન્દિરા ગાંધી જેવી હિંમત છે, તો તેમણે અહીં કહેવું જોઈએ. જો તેમની પાસે ઇન્દિરા ગાંધી જેવી 50 ટકા પણ હિંમત છે, તો તેમણે તે કહેવું જોઈએ.
