સરકારને થતા કરોડોના નુકસાનને પગલે શું બંધ થઈ રહ્યા છે આ સિક્કા, 1793માં કરવામાં આવ્યા હતા જારી

વોશિંગ્ટન, 25 મે, 2025: અમેરિકામાં સૌથી નીચા મૂલ્ય વાળા સિક્કા “પેની” (1 સેંટ)ની સફર હવે સમાપ્તિ તરફ આગળ વધી રહી છે. અમેરિકાના ટ્રેઝરી વિભાગે ઘોષણા કરી છે 2026ની શરૂઆતથી નવી પેની સિક્કાનું ઉત્પાદન બંધ કરી દેવાશે. આ ફેંસલો એવા સમયે લેવામાં આવ્યો છે જ્યારે સરકાર સિક્કાના વધુ પડતા ખર્ચ અને સીમિત ઉપયોગિતાને કારણે તેને બિનઉપયોગી માની રહી છે, આ ઐતિહાસિક ફેંસલાથી દર વર્ષે આશરે 477 કરોડ રૂપિયા (56 મિલીયન ડોલર)ની બચત થશે.

આ નિર્ણય કેમ લેવામાં આવ્યો?

હાલમાં, એક પેની સિક્કો બનાવવાનો ખર્ચ લગભગ 3.7 સેન્ટ (રૂ. 3.08) છે, જે તેના 1 સેન્ટના ફેસ વેલ્યુ કરતા લગભગ ચાર ગણો છે. વર્ષ 2024માં, યુએસ ટંકશાળે લગભગ 3.17 અબજ પેની સિક્કા બનાવ્યા હતા, જેના પર સરકારને 85 મિલિયન ડોલર (રૂ. 710 કરોડથી વધુ)નો ખર્ચ થયો હતો. આ ખર્ચ અને વપરાશમાં ઘટાડાને ધ્યાનમાં રાખીને, સરકારે 2026થી તેનું ઉત્પાદન બંધ કરવાનો નિર્ણય લીધો છે.

હાલના સિક્કાઓનું શું થશે?

કોઈ નવા પેની સિક્કા બહાર પાડવામાં આવશે નહીં, પરંતુ હાલમાં ચલણમાં રહેલા સિક્કા માન્ય ચલણ તરીકે ચાલુ રહેશે. સરકારે સ્પષ્ટતા કરી છે કે નાગરિકો તેમની પાસે રહેલા સિક્કાઓનો ઉપયોગ પહેલાની જેમ જ કરી શકશે. હાલમાં, યુનાઇટેડ સ્ટેટ્સમાં લગભગ 114 અબજ પેની સિક્કા ચલણમાં છે, જેનો ઉપયોગ નજીકના ભવિષ્યમાં પણ ચાલુ રહેશે.

રોકડ વ્યવહારો પર અસર

પેનીનું ઉત્પાદન બંધ થવાથી રોકડ વ્યવહારો પર થોડી અસર પડી શકે છે. વ્યવહારની રકમ હવે નજીકના 5 સેન્ટ સુધી રાઉન્ડ કરવામાં આવશે. ઉદાહરણ તરીકે, જો કોઈ વસ્તુની કિંમત 1.02 ડોલર હોય, તો તેને 1 ડોલર અથવા 1.05 ડોલર સુધી રાઉન્ડઅપ કરી શકાય છે. કેનેડા અને ઓસ્ટ્રેલિયા જેવા દેશોમાં પણ આવી જ સિસ્ટમ અપનાવવામાં આવી છે. જોકે, આની ડિજિટલ ચુકવણી પર કોઈ અસર થશે નહીં, કારણ કે ત્યાં વ્યવહારો ચોક્કસ માત્રામાં જ થાય છે.

તેનું ઊંડું સાંસ્કૃતિક મહત્વ પણ છે

પેની માત્ર એક નાનો સિક્કો નહોતો, તે અમેરિકન ઇતિહાસ અને સંસ્કૃતિનું પ્રતીક પણ હતો. તે સૌપ્રથમ 1793માં જારી કરવામાં આવ્યું હતું અને 1909થી તેમાં યુનાઇટેડ સ્ટેટ્સના 16મા રાષ્ટ્રપતિ અબ્રાહમ લિંકનનું ચિત્ર દર્શાવવામાં આવ્યું છે. આજે તેની ખરીદશક્તિ લગભગ શૂન્ય થઈ ગઈ હોવા છતાં, પૈસો લાંબા સમયથી અમેરિકન ખિસ્સા અને હૃદયનો ભાગ રહ્યો છે.

આ પણ વાંચોઃ લગ્ન માટે પણ મળે છે ખાસ લોન, અડધું ભારત નથી જાણતું સાચી રીત