GST કપાતથી સિમેન્ટની 50 KGની બેગ 30થી 35 સસ્તી થઇ શકે છે, ઘટશે બાંધકામ ખર્ચ

નવી દિલ્હી, 11 સપ્ટેમ્બર, 2025: GST દરોમાં કરવામાં આવેલા ફેરફારને કારણે સિમેન્ટની 50 કિગ્રાની બેગની કિંમતમાં 30-35 રૂપિયાનો ઘટાડો થઇ શકે છે. તેનાથી મકાનો અને  આવાસ પ્રોજેક્ટના બાંધકામ ખર્ચમાં પણ ઘટાડો આવશે. જીએસટી કાઉન્સિલના નિર્ણય અનુસાર 22 સપ્ટેમ્બરથી સિમેન્ટ પર કર દર 28 ટકાથી ઘટીને 18 ટકા જશે.

બુધવારે એક અહેવાલમાં ઇન્ડિયા રેટિંગ્સ એન્ડ રિસર્ચે જણાવ્યું હતું કે, GST દર ઘટાડવાનો નિર્ણય સિમેન્ટ ક્ષેત્ર માટે માળખાકીય રીતે સકારાત્મક સાબિત થશે. આનાથી સિમેન્ટ કંપનીઓ વચ્ચે સ્પર્ધા વધશે, જેના કારણે તેઓ કર દરમાં ઘટાડાનો લાભ ગ્રાહકો સુધી પહોંચાડી શકશે. આનાથી સિમેન્ટના ભાવમાં ઘટાડો થશે, એટલું જ નહી માળખાગત સુવિધાઓ અને રહેણાંક પ્રોજેક્ટ્સની કિંમતમાં પણ ઘટાડો થશે. જોકે, કંપનીઓની પ્રતિ બેગ વાસ્તવિક આવક એક શ્રેણીમાં રહેવાની શક્યતા છે.

સિમેન્ટની માંગમાં 5 થી 7 ટકાનો વધારો થવાની ધારણા છે

રિપોર્ટમાં ચાલુ નાણાકીય વર્ષમાં સિમેન્ટની માંગમાં 5 થી 7 ટકાનો વધારો થવાનો અંદાજ જાળવી રાખવામાં આવ્યો છે. આ મુજબ, જુલાઈ-સપ્ટેમ્બર ક્વાર્ટરમાં ચોમાસાની પ્રવૃત્તિને કારણે ધીમી બાંધકામ પ્રવૃત્તિઓને કારણે સિમેન્ટની માંગ દબાણ હેઠળ રહી શકે છે. શહેરી વિસ્તારોમાં નવા રહેણાંક પ્રોજેક્ટ્સના લોન્ચમાં ઘટાડાને કારણે માંગ નબળી રહે છે. જોકે, સારા ચોમાસા અને વાસ્તવિક વેતનમાં વધારાને કારણે ગ્રામીણ વિસ્તારોમાં સિમેન્ટનો વપરાશ મજબૂત રહેવાની ધારણા છે. એપ્રિલ-જૂન ક્વાર્ટરમાં સિમેન્ટ ઉદ્યોગે છ થી સાત ટકાનો વિકાસ નોંધાવ્યો હતો

ચાલુ નાણાકીય વર્ષના એપ્રિલ-જૂન ક્વાર્ટરમાં સિમેન્ટ ઉદ્યોગે છ થી સાત ટકાનો વિકાસ નોંધાવ્યો હતો. જુલાઈમાં વોલ્યુમ ગ્રોથ 12 ટકા હતો, જે એક સારી શરૂઆત છે. વ્યાજ દરમાં ઘટાડો ચાલુ નાણાકીય વર્ષના બીજા ભાગમાં શહેરી માંગમાં વધારો કરી શકે છે, પરંતુ ગ્રામીણ વિસ્તારો કરતાં વૃદ્ધિ દર નબળો રહેવાની ધારણા છે.

આ પણ વાંચોઃ શેરબજારમાં તેજી યથાવત્, જોકે નિફ્ટી હજુ પણ 25,000થી નીચે