અમદાવાદગુજરાતટ્રેન્ડિંગ
અમદાવાદમાં સારંગપુરની જર્જરિત પાણીની ટાંકી તોડવાનો નિર્ણય, ખાડિયામાં પાણીનો કકળાટ

અમદાવાદ 26 જુલાઈ 2025: અમદાવાદના સારંગપુર વિસ્તારમાં જર્જરિત હાલતમાં રહેલી પાણીની ટાંકીને તોડી નાખવાનો નિર્ણય લેવાયો છે, જેના કારણે ખાડિયા વિસ્તારમાં પાણીની સમસ્યા ગંભીર બની છે. ભર ચોમાસે પણ આ વિસ્તારમાં ટેન્કરો દ્વારા પાણીનો પુરવઠો કરવામાં આવી રહ્યો છે, પરંતુ રહેવાસીઓને ટેન્કરની રાહ જોવી પડે છે, જેના કારણે રોજિંદા જીવનમાં મુશ્કેલીઓ વધી છે.
ખાડિયાના પોળો અને એપાર્ટમેન્ટમાં રહેતા લોકો, ખાસ કરીને સિનિયર સિટીઝન્સને પાણી ઉપરના માળે લઈ જવામાં ભારે તકલીફ પડી રહી છે. રહેવાસીઓનો આક્ષેપ છે કે ટેન્કરો સમયસર આવતાં નથી, જેના લીધે ઘણા લોકો નોકરીના સ્થળે મોડા પહોંચે છે, જે તેમની રોજગારી પર પણ અસર કરે છે.
ખાડિયા વિસ્તારમાં હાલ દરરોજ 100 થી 150 ટેન્કરો દ્વારા પાણીનો પુરવઠો કરવામાં આવી રહ્યો છે, પરંતુ આ પણ પૂરતો નથી. રહેવાસીઓએ સ્થાનિક સત્તામંડળ પાસે પાણીની સમસ્યાના કાયમી ઉકેલની માગ કરી છે, જેથી આવી મુશ્કેલીઓનો અંત આવે.












