મુખ્યમંત્રી ભૂપેન્દ્ર પટેલે મેમનગર માનવમંદિર ખાતે કર્યા હોળી દર્શન, ‘વૈદિક હોળી’ દ્વારા આપ્યો પર્યાવરણ જતનનો સંદેશ

અમદાવાદ 2 માર્ચ 2026: ગુજરાતના મુખ્યમંત્રી ભૂપેન્દ્ર પટેલે અમદાવાદમાં હોળી પર્વની પરંપરાગત ઉજવણીમાં સહભાગી થઈને રાજ્યના નાગરિકોને શુભેચ્છાઓ પાઠવી હતી. મુખ્યમંત્રીએ શહેરના મેમનગર વિસ્તારમાં આવેલા સુપ્રસિદ્ધ માનવમંદિર ખાતે પવિત્ર હોળીના દર્શન અને પરિક્રમા કરી હતી. આ અવસરે તેમણે ભગવાનના ચરણોમાં શીશ ઝુકાવીને ગુજરાતના તમામ નાગરિકોની સુખાકારી, સુખ-શાંતિ, સમૃદ્ધિ અને રાજ્યના સર્વાંગી વિકાસ માટે હૃદયપૂર્વક પ્રાર્થના કરી હતી. મુખ્યમંત્રીની આ મુલાકાતથી ભાવિકોમાં પણ ભારે ઉત્સાહ જોવા મળ્યો હતો.

આ વર્ષે મેમનગરના માનવમંદિર ખાતે વિશેષ ‘વૈદિક હોળી’ પ્રગટાવવામાં આવી હતી, જે પર્યાવરણના જતનનો એક મહત્વપૂર્ણ સંદેશ આપે છે. લાકડાને બદલે ગાયના છાણ અને અન્ય વૈદિક સામગ્રીનો ઉપયોગ કરીને પ્રગટાવવામાં આવેલી આ હોળી દ્વારા પ્રદૂષણ ઘટાડવાનો પ્રયાસ કરવામાં આવ્યો હતો. મુખ્યમંત્રીએ આ પહેલને બિરદાવતા જણાવ્યું હતું કે, પર્યાવરણ પ્રત્યેની આવી જાગૃતિ ખરેખર પ્રશંસનીય છે. હોળી દર્શન કર્યા બાદ તેમણે પ્રખ્યાત માનવમંદિરની મુલાકાત લઈ ભગવાનના દર્શન કરીને ધન્યતા અનુભવી હતી અને મંદિરના ટ્રસ્ટીઓ તેમજ શ્રદ્ધાળુઓ સાથે શુભેચ્છા મુલાકાત કરી હતી.

આ પ્રસંગે મુખ્યમંત્રી ભૂપેન્દ્ર પટેલે જણાવ્યું હતું કે, હોળીનું આ પવિત્ર પર્વ અસત્ય પર સત્યના વિજયનું અને રંગોનું પર્વ છે. આ તહેવાર આપણા સૌના જીવનમાં રાગ-દ્વેષ ભૂલીને એકબીજાને સ્નેહથી મળવાનો અને સામાજિક સમરસતાનો અમૂલ્ય સંદેશ આપે છે. તેમણે વધુમાં ઉમેર્યું હતું કે, આપણે સૌએ સાથે મળીને આ રંગોત્સવ એવી રીતે ઉજવવો જોઈએ કે જેથી આપણી પ્રાચીન સંસ્કૃતિનું જતન થાય અને સાથે પર્યાવરણની પણ સુરક્ષા જળવાય. મુખ્યમંત્રીની આ મુલાકાતે તહેવારના માહોલમાં સામાજિક એકતા અને પર્યાવરણ રક્ષાનો સૂર રેલાવ્યો હતો.

આ પણ વાંચો: રાજકોટમાં SMCનો સપાટો, યાજ્ઞિક રોડ પર આંગડિયા પેઢીમાં દરોડો પાડી કરોડોના ડબ્બા ટ્રેડિંગના નેટવર્કનો પર્દાફાશ