Sabarmati Vande Bharat Hub :  ગુજરાતના અમદાવાદમાં સાબરમતી ખાતે વંદે ભારત ટ્રેનોની જાળવણી અને સમારકામ માટે આશરે ₹307 કરોડના ખર્ચે આધુનિક મેન્ટેનન્સ હબ (Maintenance Hub) તૈયાર કરવામાં આવી રહ્યું છે. ભારતીય રેલવેના હાઇસ્પીડ ટ્રેન નેટવર્કને વધુ મજબૂત બનાવવાના ભાગરૂપે આ પ્રોજેક્ટ વિકસાવવામાં આવી રહ્યો છે. પશ્ચિમ રેલવેના અમદાવાદ ડિવિઝન દ્વારા સાબરમતી ઇન્ટિગ્રેટેડ કોચિંગ ડેપો (ICD)ના બીજા તબક્કા હેઠળ આ સુવિધા ઊભી કરવામાં આવી રહી છે. આ હબમાં વંદે ભારત ટ્રેનોના કોચ, વ્હીલ અને ઇલેક્ટ્રિકલ સાધનોના સમારકામ માટે અલગ-અલગ આધુનિક સુવિધાઓ ઉપલબ્ધ થશે. ખાસ વાત એ છે કે અહીં 24 કોચ ધરાવતી વંદે ભારત ટ્રેનની નિર્ધારિત જાળવણી અને મોટા સમારકામની કામગીરી પણ થઈ શકશે.

એક જ સ્થળે ટ્રેનના મોટા સમારકામની સુવિધા

સાબરમતીમાં બની રહેલા આ મેન્ટેનન્સ હબનો મુખ્ય ઉદ્દેશ વંદે ભારત ટ્રેનોની નિયમિત જાળવણીથી લઈને મોટા સમારકામ સુધીની કામગીરી એક જ સ્થળે કરવાની સુવિધા ઊભી કરવાનો છે. હાલમાં મોટા સમારકામ માટે ટ્રેનોને અન્ય શહેરોમાં મોકલવાની જરૂરિયાત ઊભી થઈ શકે છે. નવી સુવિધા શરૂ થતાં આવી જરૂરિયાત ઘટવાની આશા છે. આ પ્રોજેક્ટને 24 કોચની વંદે ભારત ટ્રેનોના શોપ શેડ્યૂલ-I (SSI) અને શોપ શેડ્યૂલ-II (SSII) હેઠળની જાળવણીને ધ્યાનમાં રાખીને તૈયાર કરવામાં આવી રહ્યો છે.

એક ટ્રેનના સમારકામમાં 30થી 45 દિવસનો સમય

પ્રોજેક્ટની વિગતો અનુસાર, 24 કોચ ધરાવતી ટ્રેનની SSI જાળવણીમાં આશરે 30 દિવસનો સમય લાગી શકે છે, જ્યારે SSII જાળવણી માટે લગભગ 45 દિવસની જરૂર પડે છે. આ સમયગાળાને ધ્યાનમાં રાખીને મેન્ટેનન્સ હબમાં દર વર્ષે આશરે 12 ટ્રેન સેટની SSI જાળવણી અથવા 8 ટ્રેન સેટની SSII જાળવણી કરવાની ક્ષમતા રાખવામાં આવી છે. આ સુવિધાથી પશ્ચિમ રેલવેના અમદાવાદ ડિવિઝનમાં વંદે ભારત ટ્રેનોની જાળવણી વ્યવસ્થા વધુ કાર્યક્ષમ બનવાની અપેક્ષા છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

વ્હીલ અને એક્સલ રિપેર શેડનું કામ પૂર્ણ

સાબરમતીમાં વ્હીલ અને એક્સલ રિપેર શેડ (Wheel and Axle Repair Shed)નું કામ પૂર્ણ થઈ ગયું છે. આ શેડ 75 મીટર લાંબો અને 40 મીટર પહોળો છે. તેની સાથે સંકળાયેલી ઇમારત પણ હસ્તાંતરણ માટે તૈયાર હોવાનું જણાવાયું છે. આ ઉપરાંત, 6,458 ચોરસ ફૂટ વિસ્તારમાં બનેલી ઇલેક્ટ્રિકલ સબસ્ટેશન બિલ્ડિંગ (Electrical Substation Building)નું બાંધકામ પણ પૂર્ણ થઈ ગયું છે અને તેને રેલવેને સોંપવામાં આવી છે.

અમદાવાદના રેલવે માળખાને મળશે નવી ક્ષમતા

આધુનિક મેન્ટેનન્સ હબમાં ટ્રેનના કોચ, ઇલેક્ટ્રિકલ સાધનો અને વ્હીલના સમારકામ માટે અલગ વ્યવસ્થા ઉપલબ્ધ થવાથી જાળવણીની કામગીરી વધુ સુવ્યવસ્થિત બનશે. આ પ્રોજેક્ટ પૂર્ણ થયા બાદ સાબરમતી વંદે ભારત ટ્રેનોની જાળવણી માટેનું મહત્ત્વનું કેન્દ્ર બની શકે છે. તેનાથી પશ્ચિમ રેલવેના અમદાવાદ ડિવિઝનની આધુનિક ટ્રેનોના સમારકામ અને જાળવણીની ક્ષમતામાં વધારો થવાની અપેક્ષા છે.

આ પણ વાંચો : રાજ્યમાં પુરુષોમાં વધ્યું બ્રેસ્ટ કેન્સરનું જોખમ, સિવિલમાં 6 વર્ષમાં 100થી વધુ કેસ નોંધાયા